Mark 4 - Sümi Tiqhelimi Bible

Apitikiveu Holetsa

¹ Itaghi Jisü ye ayizükucho mükü lo kütsü ae. Jisü süho pesü kumqo akemi aqokitikhi no ighono kutomo kehu Jisü ye ayizükucho lo ashuka lakhi akeu lo ikuve no tilehi iqave, eno timiqo kümtsü no ayizükucho phivilo azü mükü lo ngoe.

² Pano aholetsa lono thime kutomo panongu kütsüe. Pa no ishi panongu vilo pi:

³ “Inilo! Alukichimi lakhi no apitì ve niye wue.

⁴ Pa no apitì vesü akelo, hami no alaphe lo vesülu, ikelo aghauqo no ighino tipaqo mighive.

⁵ Hami no aghüma chilomo keu atusaye yeghi lo vesülu. Aghüma ilalei keu ghenguno apitì hu ye paikhavi thuwu ipeghive.

⁶ Ikemu kughou khetsünhe no müka ipeghive keno, abò tipaqo ye akuhu thonhei quilomo kehu phuqhive eno kimghoive.

⁷ Apitì hami ye asahuli dolo ikiqi ilove, aghibo tipaqo ye thuwu ipeghi kemu asahu no ghüsüve kehu athi pithímove.

⁸ Tishimu apitì hami ye aghüma kivi lo ikiqi ilolu. Apitì tipaqo no thuwu ipeghi püzü athi kutomo pithílu, hami no shighi, hami no lhotsügho eno hami no aqhe ishi küghüsü pithílue.”

⁹ Tisheno Jisü no pi, “Khunoqo no chilu nishi ani keno panoqo pelo chilu pelo.”

¹⁰ Kughou pa likhi akeno, panongu Chighikini eno kütami pa phivilo akemiqo no aholetsaqo vehu iniju.

¹¹ Jisü no panongu vilo pi, “Alhou kükaphuw tuqhou ye nongu tsüvae. Ikemu khalau akemiqo ghengu ye thowkha kümtsü aholetsaqo lono piani

¹² tishianguno, “ ‘Panongu ye juanamu khilemu vethamla nani, eno chilu anamu khilemu vethamla nani; tishimo aye, panongu ye xaideghi püzü akipimí qhivetsü luvi ke!’”

¹³ Tisheno Jisü no panongu vilo pi, “Nongu ye aholetsa hipau vethamla keshea? Tishiaye kíshi no nongu ye aholetsa kütau vethaluni kea?

¹⁴ Alukichiu hu no Alhou tsa vesü.

¹⁵ Timi khami ye alaphe lo apitì ikiqi iku keu toi Alhou tsa vesü ke. Ikemu panongu no Alhou tsa chiluve kemtsa, Satan no ighino Alhou tsa panongu lolo vesü püakeu ikhipe wuve cheni.

¹⁶ Kütami khami ye atusaye yeghi shou apitì vesü keu toi Alhou tsa chilukhavi alokivishi ikhilu cheni.

¹⁷ Ikemu panongu ye akuhu qüsümo kehu, panongu ye ado ikhonhei likhi xü cheni. Kughou atsakiviu ghenguno aküpüna eno pishi-puju keu ighini keno, panongu ye paikhavi ikiqive cheni.

¹⁸ Tishimu kütami khami ye asahuli dolo apitì ikiqi ilove keu toi Alhou tsa chilu cheni;

¹⁹ ikemu hipau küxü lo mloküsaqo, aküakini pishikiqhi eno kütau thime jeli mine keu no ighino Alhou tsa küpühalu eno tino athi pithí mülave pe chekeu kiqi ke.

²⁰ Kütami khamiqo ye aghüma kivi lo apitì ilolu keu toi Alhou tsa chilu eno ikhilu no athi kupukuno shi pithí cheni—eno vesü keu lono hami no shighi, hami no lhotsügho eno hami no aqhe ishi küghüsü pithílu cheni.”

Akibepu lo Akulu

²¹ Jisü no panongu vilo pi, “Nongu ye akulu pesü alì qholo momu alipa qholo sǘve cheni keshea? Tishini ke züqhu akibepu lo be cheni ke kumo keshea?

²² Kughengu küsüpe püakeu lakhimu pephe-piyemo keu shimo nani eno nhape püakeu lakhimu lhaphemo keu shimo nani.

²³ Chilu nishi kemi aghí aye chilu pelo.”

²⁴ Jisü no pikibe ghi pi, “Nongu no kiu chilu ani keno tsaqüi kümsüjulo. Nono kütami shou kiu qhemi mighibeni keno titoi Alhou no tipau qhemi momu tinguno alau ghí O shou mighibe nani ke!

²⁵ Khuno no ani keno, alau tsüküpha nani; khuno no küha keno, kitila akeu ghí pano lau no ikhisüwuve tsü nani.”

Apitì Thuwu keu Holestsa

²⁶ Jisü no hi ghí pi, “Alhou kükaphu ye hitoi ke. Timi lakhi no ayeghi lo apitì vesüe.

²⁷ Pa ye kíshi keu keno ithi chemo kemu putho-pucho pa no züa na ithu anamu apitì ye thuwuve cheni.

²⁸ Pa likhi pa kutoshi no aghüma no athì kughulhove tsü cheni—atüghishi anika lhoipeghi cheni, tisheno amzü eno tipau shelo amzü lono aghipe woipeghive cheni.

²⁹ Aghipe no nimzüyive kemtsa, ghile do tovea kehu timi no ayevǘ pesü aghì tipau ghove cheni.”

Aghane thi Holetsa

³⁰ Itaghi Jisü no pi, “Alhou kükaphu ye kiutoi ipini kea, momu tipau lhe nike ghenguno kiu holetsa peithani kea?

³¹ Tiye ayeghi lo apitìqo kümtsü dolo aghulou aghane thi lakhi toi ke.

³² Ikemu kughou tipau yisüni keno, tino aghutu lo atsüniqo kümtsü nguno akijeu shi thuwu ipeghi cheni, eno alokaqo no kijè shive püzü tipau kichiqho lo aghauqo no apüsü pesü chenie.”

³³ Jisü no aholetsa kimihi keu kutomo pesü panongu no vethakulupu qhemi lono pitsüe.

³⁴ Pa ye aholetsa sümo kelo ye panongu vilo kiu tsamu pimoe. Ikemu kughou pa no pa likhi pa khopemiqo gholo akeno, pa no thowkha kümtsü lhepe pivetsüe.

Jisü no Pasapagha Ghasüve

³⁵ Tipani avela shive kelo, Jisü no pa khopemiqo vilo ishi pi, “Ningu ayizükucho hukuku küdau wuni nolo.”

³⁶ Ike akhopemiqo no aqokitikhi qhive püzü Jisü no ngo akeu shuka lono aqoshi wuve. Tilehi ashuka kütauqo ghí pa gholo cheke.

³⁷ Ashuka lo che kelo muqhumüzai keu pasapagha lakhi ighi püzü ashuka küzüpholuve kepu toive, eno tisheno azü fukucho keu no ashuka chhive nike toive.

³⁸ Jisü ye ashuka athiu akütsü kümkhüpu-a shou bepe züae. Akhopemiqo no pa küdaputhu püzü pa vilo ishi pi, “Akükütsüu, ningu ye pütsüqhive niye shiva püzü no ye amlosamo keshea?”

³⁹ Pa no ithuve püzü amlhü lomipi eno azü fukucho akeu vilo ishi pi, “Inaqhoivelo! Iqünheive lo!” Ikelo amlhü no iqüghai ngove eno thowkha shishe iqünheive.

⁴⁰ Jisü no pa khopemiqo vilo pi, “Nongu ye kushiye ighono msà ani kea? Nongu ye aküpülü küha aphi keshea?”

⁴¹ Panongu ye akichiqhive no lakhi no lakhi vilo ishi iniju, “Hiye khiu kea? Amlhü eno azü fukucho kutólo pa gholu anie!”