Mark 3 - Sümi Tiqhelimi Bible

Jisü no Sabbath Tsalà lo Shipivi

¹ Itaghi Jisü no Synagog lo ilo kelo ye au ithamlave kemi lakhi tilehi aghí.

² Timi khami ye akipimí Jisü tsü niye ajeku phuju akehu Jisü ye timi hipau Sabbath tsalà lo shipivi nani keo shipivimo nani keno tsaqüi chheju ae.

³ Jisü no au ithamlave keu vilo ishi pi, “Timi kümtsü gizülo puthugho lo.”

⁴ Tisheno Jisü no panongu vilo iniju, “Ayeza kiqi lo Sabbath tsalà lo khikhiu shikeu no achipi kea: akivi kümlà shikeu no keo küsakügha kümlà shikeu no kea, aküxü xalu keu no keo pìthíve keu no kea?” Ikemu panongu ye kiumu khochile mülave.

⁵ Jisü no pa mlo ide ghi ighowo panongu jupuwo, eno panoqo mlo kuthò ithulu no pa mloküsa shive püzü timi tipau vilo pi, “O u xachholo.” Pa no pa u xachho eno pa u ye kupukülai athoputholuve.

⁶ Ikelo Phariseemiqo ye khalau ipeve no Herod papemiqo sasü kíshi no Jisü pìthíve nike no kuchughu thuve.

Aqokitikhi no Jisü Pape

⁷ Jisü ye pa khopemiqo sasü ayizükucho lo wuve, ikelo Galilee lono timi kutomo no panongu pape ighie.

⁸ Judea, Jerusalem, Idumea lono, Jordan ko-aqha hechesü Tyre eno Sidon lono timiqo no Jisü no mülà keqo ghili chilu püzü timi kutomo no pa lau ighie.

⁹ Aqokitikhi pelo pa küzüpholuve pemo nike ghenguno Jisü ye pa khopemiqo vilo pa ghenguno ashuka aghulo lakhi kutò lo pi.

¹⁰ Kughengu pa no timi kutomo shipivive kehu aküsǜ jeli xapu akemiqo no pa bu niye tuhakilesü azüu ighi ae.

¹¹ Kughou mithekumo ghunguqo no Jisü ithulu keno, panongu no pa gizülo ikiqive no, “No ye Alhou Nue,” ipi ighamuku.

¹² Ikemu pa ghili pesü kütamiqo vilo pipemo nike tsatsái azah panongu tsüve.

Jisü no Chighikini Kishesülu

¹³ Jisü no naghuto küdau iqho püzü pa no khunoqo ku nishi keno tipaqo ku, eno timi tipaqo no pa lau ighi.

¹⁴ Pa no timi chighikini süküsü shi, tiye panoqo pelo pa gholo ngo pe, aqha lo kütsüwu pe,

¹⁵ eno tüghaküsaqo haphelu nikeu kükagha ape niye ke.

¹⁶ Pa no timi chighikini süküsü shilu keu ye hipaqo ke: Simon (pa no Peter ipi kuve tsü keu),

¹⁷ Zebedee nu James eno John pama (Jisü no pama je pesü Boanerges ipi kuve tsü, tipau kiqi ye “Tsütsüpha nuliqo”),

¹⁸ Andrew, Philip, Bartholomew, Matthew, Thomas, Alphaeus nu James, Thaddaeus, Simon azá yeghi kimiye kicheu

¹⁹ eno Jisü jekuchuu Judas Iscariot.

Jisü Kibolomi eno Ayeza Kükütsümiqo no pa Nguku

²⁰ Tipathiu Jisü no aki lakhi lo ilo, ikelo itaghi aqokitikhi no kumqoluve püzü pa eno pa khopemiqo ye chu-sho nikeu ghí shimlave.

²¹ Kughou pa kibolomiqo no hipau ghili chilu keno, panongu no pa saluve niye wu eno panongu no ishi pia, “Pa ye izüwuvae.”

²² Jerusalem lono ayeza kükütsümi iqighi kemiqo no ishi pi, “Pa phi lo Beelzebul ilovae! Eno pa ye tüghaküsaqow kükapuu küká vechewo tüghaküsaqo haphe anie.”

²³ Tishikehu Jisü no panongu ku saighi püzü aholetsaqo lono ishi panongu vilo pi: “Satan ye kíshi no Satan haphe luni kea?

²⁴ Akükaphu lakhi lono kijetha keu ipeghive aye akükaphu tipau ye ipove nani.

²⁵ Akibo lakhi lono kijetha keu ipeghive aye, akibo tipau ye ipove nani.

²⁶ Eno Satan no pa likhi pa mjochile no kijethave aye, pa ye ngopushumlave no ashekha lo ye pa kükaqha kühave nanie.

²⁷ Kuchou lo ye, akumtomi lakhi ki lepu wuni ke ghenguno atüghishi pa tsüghape qhivemo kelo ye aki tipau lepu wumlae.

²⁸ Kuchou no I no nongu vilo pìní, timi no axiné shikeu eno pipütha keu jeli kümtsü kipimí qhivetsülu nani,

²⁹ ikemu Aghungu Kimthe pipütha kemiqo ye khilemu akipimí qhitsümo nani; timi tipaqo ye lhokta xiné shivae.”

³⁰ Ayeza kükütsümiqo no, “Pa lolo mithekumo ghungu ani,” ipikeu ghenguno Jisü no hi pike.

³¹ Ikelo, Jisü pazá ngò pa thiküzümiqo ighie. Panongu ye khalau puthugho püzü timi khami pelo Jisü ku peniye puloe.

³² Aqokitikhi no Jisü vehope iqa akelo Jisü ku peniye ipulo kemiqo no pa vilo ishi pi, “O zá ngò O thiküzümiqo ye khalau O phu chenie.”

³³ “Khuu no I zá eno I thiküzümiqo kea?” ipi pa no iniju.

³⁴ Tisheno tilehi pa homüxa pesü iqa akemiqo lau ju no ishi pi, “Timi hipaqo no I zá eno I thiküzümiqo ke!

³⁵ Khuno no Alhou pulou shi cheni keno tipaqo no I thiküzüu, I chepu eno I zá ke.”