Mark 15 - Sümi Tiqhelimi Bible

Pilate Zülo Jisü Sawu

¹ Inaqhe itheno achinetomiqo gholo kichimi, ayeza kükütsümi eno Jewmi hoho lo akemiqo kümtsü küqha no aküküpütsa shie. Tisheno panongu no Jisü tshü pesü wu no Pilate lau phesüve tsü.

² Pilate no iniju, “No ye Jewmiqo kükau keshea?” Jisü no khochile, “Nono ti pivae.”

³ Achinetomiqo no kütau kutomo pesü pa ngukue.

⁴ Ikehu Pilate no itaghi pa vilo iniju, “No ye khochileni chemo keshea? Panongu ye thime khijehimu pesü O nguku ani keno julo.”

⁵ Tishimu Jisü ye kiumu khochilemo, ikehu Pilate ye ighono akümzave.

⁶ Ike tiqhitini ghuloki lo alhoaye lono timiqo no qhüiniju keu kiqi lono akughumi dolo lakhi kuqhopheve tsüche.

⁷ Timi lakhi Barabbas ipikeu ye yepeka hebide ipeghi akemiqo eno timi heqhipithíve kemiqo gholo akughuki lo süpüae.

⁸ Aqokitikhi no Pilate lau ighino pa no thosülo shiche ketoi, panongu ghenguno shitsü penike khue.

⁹ Ikelo Pilate no iniju, “Nongu ye I pelo Jewmiqo kükau nongu lau kuqhopheve tsüpe nishi ani keshea?”

¹⁰ Pa ye achinetomiqo no panonguw lüthü lá ghenguno Jisü pesü pa u lo phesü püakeu ithi ake.

¹¹ Ikemu achinetomiqo no Pilate pelo Barabbas khaqhiphe tsü penike aqokitikhi xukuthove.

¹² Ikelo Pilate no iniju, “Imaye nongu no Jewmi kükau ipi ku chekeu pesü I vilo kiu shivelo pi kea?”

¹³ Panongu no ighamuku pi, “Pa yedavelo!”

¹⁴ Pilate no iniju, “Kushiye kea? Pa ye ayeza heküxá kümlà kiu shipüani kea?” Ikemu panongu no alau shi, “Pa yedavelo!” ipi igha kithe auve.

¹⁵ Aqokitikhi lopiqive tsü niye Pilate no Barabbas khaqhiphe pe panoqo tsüve. Tisheno, Jisü ye akighikipili pesü heqhi no yeda pìthíve penike ikhiphe pe tsüve.

Ghüshimiqo no Jisü Junuqhi

¹⁶ Ghüshimiqo no Jisü sasü akükaki lo ilove (hiye angh no ngo chekeu ki ke) eno ghüshimi mqo kümtsü kukütsüluve.

¹⁷ Panongu no hughai keu chijeboboi-phi pesü pa pu-u, tisheno asahu ghoküna pe akütsükuqho mülà no pa pipe.

¹⁸ Eno panongu no ighamuku ishi pithuve, “Jewmiqo kükau sheqhelo!”

¹⁹ Panongu no aqhe-küsǘ pesü pa kütsü lo ide-ide hepuku tsü eno pa shou müsüte puku. Eno iqi qhoqhünhe no agigihu pa tsüke ghili shie.

²⁰ Eno kughou pa junuqhi tave keno, panongu no hughai keu chijeboboi-phi xave tsü püzü paw tiphimini pesü pa pu-uve. Tisheno pa yedave nike sasü wuve.

Jisü Yedave keu

²¹ Cyrenemi lakhi, Alexander ngò Rufus pama papù, Simon ye tipa qha hokümxa lono ighino tipau hechesü wuche, ikelo ghüshimiqo no anguka lono pa pelo kros xapu pe.

²² Panoqo no Jisü sasü Golgotha (tipau kiqi ye “akütsü boghe-a”) ipikeu-a lo ighi.

²³ Tisheno panongu no aji pesü müsüghüta lo kiteve keu pe Jisü tsü, ikemu pa no tipau ye tsümoe.

²⁴ Eno panongu no pa yedave. Tisheno panongu no Jisü’w tiphimini kijé no khiu no kiu ithulu kepu keno asaqhibejue.

²⁵ Panongu no Jisü yeda kelo inaqhe ayì tokú he ake.

²⁶ Jisü shou akipimí tsü keu yepìthi tsa hitoi yèpeqhie: Jewmiqo Kükau.

²⁷ Panongu no hekibidemi kini pa gholo yeda pe qhie, tiye lakhi no pa u ajeu eno lakhi no pa u piyiu.

²⁸ Eno Kuchoyesü lo ishi pipüa keu shikupuve, “Pa ye ayeza heküxami gholo kihisüve.”

²⁹ Tipau vechesü wukemiqo no Jisü thaigha keu tsa pa shou pipuku eno panongu kütsü küngü ghi ishi pi, “No ye achineki kuboleve no atsala küthü lono shiqhepukuve niye kutò anike kumo?

³⁰ Kros lono iqighive no O likhi O xalulo!”

³¹ Titoi achinetomi eno ayeza kükütsümiqo no panongu dolo no pa junuqhi. Eno ishi pi, “Pa ye kütami xalu kemu pa likhi pa xalu amoe!

³² Israel kükau Messiah hipau pelo kros lono iqighive pelo, tishianguno ningu no ithulu püzü pülü nike.” Pa gholo yedapüa keu pama ghí pa pipütha.

Jisü Kithí

³³ Puchomta lono avelau ayì küthü kutólo àküzǘ no ayeghiqha kümtsü küzüpholuve.

³⁴ Ikelo avelau ayì küthü kihe lo Jisü no asütsa kuloghi lono igha no pi, “Eloi, Eloi, lema sabachthani?” (hipau kiqi ye, “I Lhou, I Lhou, no ye kushiye I qhivea kea?”).

³⁵ Tilehi puthugho akemiqo dolo khami no ti chilu püzü no ishi pi, “Inilo, pa ye Elijah ku anie.”

³⁶ Tishi kemtsa panongu dolo milakhi no powu püzü aghüshi lakhi lo akiqhizü pütsüve püzü Jisü pelo müsüye penike aküsǘ lakhi lono jì pesü chhopuku tsüe. Ikemu kütami no pi, “Palokutove aghílo. Elijah no ighi püzü pa xalu nani keo xamla nani keno ningu juni nolo.”

³⁷ Jisü no aghügha kuloghi shi igha no pa thuthu süthahuve.

³⁸ Tishi kemtsa, achineki lo nhaqhiphi hu no atsǜqo lono abò kutólo ixü kütüta kini shive.

³⁹ Eno kughou aqhe shou zatsüu no Jisü zülo puthugho püzü pa no kíshi thive keno ithulu kelo, pa no pi, “Kuchou no timi hipau ye Alhou Nue!”

⁴⁰ Totimi khami ye putou ngo no jukuto ae. Panoqo gholo Mary Magdalene, Joseph thiküzüu ayitiu James eno pama pazá Salome ishi ake.

⁴¹ Totimi hipaqo ye Jisü no Galilee lo akelo, pa pape eno pa vehupuqo jukuto tsü cheke. Totimi kütami kutomo khunoqo pa gholo no Jerusalem lo iqhoghi keno tipaqo ghí tile ae.

Jisü Qhove keu

⁴² Hiye Kutokughoi keu Tsalà shi ake (tiye Sabbath tsalà zülo). Ike avelau shive kelo

⁴³ Arimathea nó ghami Joseph no amlo kumto shi Pilate lau wu püzü Jisü sükumo khue. Joseph ye Mijetsümi mqo lo akhotomi lakhi eno pa ye Alhou kükaphu ighi nikeu ngokhe acheke.

⁴⁴ Pilate ye Jisü thiva pikeu chilu no akümzave. Ike pa no aqhe shou zatsüu ku no pa vilo Jisü ye thivea keshea ipi iniju.

⁴⁵ Kughou Pilate no Jisü ye thivea kepi aqhe shou zatsüu lau no ithive keno, pa no Jisü sükumo Joseph tsüve.

⁴⁶ Ikehu Joseph no phephei keu phì hami qhü, eno kros lono akumo ikhiqhive püzü phephei keu phì pe küzüve no atu chhupho keu kumoki alou sǘve. Tisheno pa no atu tukulo pewo akumoki hukikha khave.

⁴⁷ Mary Magdalene eno Joseph pazá Mary pama ye asükumo khile qhove keno ithuluve.