Mark 13 - Sümi Tiqhelimi Bible

Achineki Kütsave nikeu eno Ashekha Ghuloki Michipuqo

¹ Jisü no achineki lono ipeche kelo, pa khopemiqo dolo milakhi no pa vilo ishi pi, “Julo, akükütsüu! Kiutoi keu jukighilepu tuqo kea! Hiye kiutoi keu jukighilepu kiqo kea!”

² Jisü no khochile, “Nongu ye aki kuloghi hipaqo kümtsü ithulu ani kema? Hilehi atu lakhimu lakhi shou bepekile ngomove nani eno kümtsü tuleqhive nani.”

³ Jisü no achineki ghüngü lo Olive Naghuto lo iqa akelo, Peter, James, John eno Andrew noqo no lomo shi pa vilo iniju,

⁴ “Thime hipaqo ye kughou no shikupu nani kea? Eno hipaqo kümtsü shikupu nikeu michipu ye kiu kea?”

⁵ Jisü no panongu vilo pi: “Khuu pelomu nongu pishiqhive pemo nike jukuto alo.

⁶ Kutomo no, ‘Ni ye pa ke,’ ipi no I je lono ighi püzü kutomo pishiqhive nani.

⁷ Kughou nongu no aghükishi sütsa chilu eno aghüshi ani ipikeu uyewu sütsa chiluni keno msà kevilo. Hipaqo ye shikupu moayesa nani, ikemu ashekha ghuloki ye ighini aphike.

⁸ Shiye lakhi no shiye lakhi mjochile ipeghi nani, eno kükaphu lakhi no kükaphu lakhi mjochile ipeghi nani. Tile a-a kutomo lo ayeghi küghüthaqo eno püqümiye ighi nani. Hipaqo ye apunu küsǜ huthu akeu paphi ke.

⁹ “Nongu ye nolikhi nongu khekuto amoayesae. Nongu pesü no-a lo mijetsümiqo u lo sǘve no synagogqo lono nongu heqhi nani. Eno I je ghenguno nongu ye angh eno kükamiqo zülo puthugho no panongu lau I shepe shi nani.

¹⁰ Eno atsakiviu pesü atüghishi shiyeqo kümtsü lau kütsüve paghi moayesae.

¹¹ Kugho-kughomu nongu küghaluve no atsa kükügha-a lo süghi kelo, kiu pi nani keno azüu no amlosa kevilo. Ado tipau lo O lolo müzüsütsü keu likhi pilo, kughengu tiye nono pi anike kumoe, ikemu Aghungu Kimthe no pi anike.

¹² “Athiküzüu no athiküzüu thechu shive no pìthíve nani, eno titoi apù no anu lau shi nani. Anuliqo no panongu pù-aza mjochile nani eno panoqo pìthíve nani.

¹³ I ghenguno kümtsü no nongu mithi nani, ikemu khuno no ashekha kutólo mutotoi puthugho aghíni keno xaluve nani.

¹⁴ “Kughou nongu no ‘aphikümqhüpu khikhi küghüküghaleive pe cheni keno’ tipau no ngomo kepu-a lo puthugho aghí keu ithuluni keno (phi akeu hu no hi vethalulo) Judea lo akemiqo pelo naghutoqo lo pove pelo.

¹⁵ Aki kütsüqa lo akemi khumu aki lo anhemgha ikhi phelu niye aqhou iqighi kepu kumoe.

¹⁶ Alu lo akemi khumu idewo panonguw ubephi luwu kepu kumoe.

¹⁷ Atsala tipaqo lo totimi mishí akemi ngò azá angapini akemiqo ghenguno kiutoi akümsapu kea!

¹⁸ Süsü tsalà lono hipau shipemo nike inikhu alo,

¹⁹ hipau tüqhüdo lo aghime kitikhi anani, eno tiye Alhou no ayeghiqha lhophe ke lono ishi kutólo titoi ighi mphi keu—eno ighi nikeu lomu titoi akiniù ighimo nikeu ke.

²⁰ “Tsalá Ampeu no atsala tipaqo kughukhove moaye, timi khumu xüluni chemoe, ikemu pa no khunoqo kisheluvea keno, tipaqo je lono atsala tipaqo ye kughukhove nani.

²¹ Tipau süchedo lo tsalá khiuala no O vilo, ‘Julo, Messiah hi chenie!’ momu, ‘Pa ye hu cheni!’ ipi aghí namu ti pülü kevilo.

²² Kughengu kichileu messiahqo ngo kichileu tungkupumiqo no pishiqhi niye ipeghi püzü akümzapu eno amichipu kümlà kijè shi nani, eno tsalá shikulupu shi aye, kisheluve kemiqo ghí pishiqhi niye shi nani.

²³ Ikehu nongu likhi nongu khekuto alo; I no thowkha ashe-azü shi nongu vilo pive anie.

²⁴ “Ikemu aghime kitikhi tsalà hipaqo thiu paikhavi lono, “ ‘khetsünhe no züchiyive nani, eno aqhi no pa küvü tsümove nani;

²⁵ ayepuqo no atsütsǘ lono ikiqive nani, eno atsütsǘ lo akeu jeli kümtsü süküghütha nani.’

²⁶ “Atüqhüdo tipau lo timiqo no khüngküsü lono Timi Nu no aküka kijè eno ajekipi lono chekeu ithulu nani.

²⁷ Eno pa no paw kungumiqo puwu no ayeghi cheku bidí lono pa no kisheluve kemiqo hekütsü nani, eno tiye ayeghi ashekha lono ashekha kutólo kisheluve kemiqo hekütsü nani.

²⁸ “Mububo lono akükütsü hipau shikalulo: Kughou aloka lo apishe ipeghive püzü tipau nipa no miní ipeghiveni keno, nongu no tiye mütsü tsalà chea ipi ithive cheni.

²⁹ Tihutoi, kughou nongu no hipaqo kümtsü ithuluni keno, ashekha tsalà kupunúvea eno tiye ahukikha lo ighivea kepi ithilo.

³⁰ Kuchou no I no nongu vilo pìní, hipaqo kümtsü mütsümishei shikupumo ke thaqhülo hipau tiqheli ye kühave keu shimo nani.

³¹ Atsütsǘ eno ayeghi ye hauve nani, ikemu I tsa ye khilemu hauvemo nani.

Atsala eno Asüchedo Mthae

³² “Ikemu atsala momu ayì kihedo ghili ye khunomu mthae, kungugha lo kungumiqo ke kumo no Anu ghí mthae ikemu Apù likhi no ithi anie.

³³ Kutokupui khealo! Kutokughoi shilo! Nongu ye kughou no ado tipau ighi nani keno mtha ke.

³⁴ Hiye timi lakhi no kicheghüzü lo wuve niye pa qemiqo lakhi-khi lau akümlà pichebeve keu toi ke, eno ahukikha lo akeu vilo jukuto alo ipikeu toi ke.

³⁵ “Aki mpeu ye avelau no keo, zübumta lono keo, momu awudu no igha ke lono keo, momu tsükuthou no ideighi nani keno nongu ye mtha ke ghenguno jukuto alo.

³⁶ Tsalá pa no zülile no ighive aye, pa pelo nono zü aghí keu phulu pe kevilo.

³⁷ I no nongu vilo kiu piani keno ni ye kümtsü vilo piani: ‘Jukuto alo!’ ”