Mark 12 - Sümi Tiqhelimi Bible

Mishichi Chekemiqo Holetsa

¹ Tisheno Jisü no aholetsaqo lono panongu vilo pithu: “Timi lakhi no atsailu lakhi chie. Pa no ti homüxa aghutu shive püzü atsaithi tsüghǜ nike ghenguno aqò chhupe qhi no aqoghe lakhi mülà pukuve. Tisheno pa no atsailu pesü alukichimi khami lau mishichive pe no a-a kütau wuve.

² Ghile ghuloki lo pa no pa qeu lakhi hapesü mishichi akemiqo lau atsailu lono atsaithi hami süghi penike puwu.

³ Ikemu panongu no pa tsüqüluve püzü pa kuoqhi no au kümsá pa puwuve.

⁴ Ikelo pa no aqemi kütami panoqo lau puwu; panongu no aqeu hipau kütsü lo ghatsü no shikukujoqhi eno pa kijipüsave.

⁵ Tishimu pa no kütami lakhi puwu, ikelo panongu no tipau pìthíve tsü. Pa no kütami kutomo puwu; ikelo panongu no khami kuoqhi eno kütamiqo pìthíve tsü.

⁶ “Pa ye puwu nike ghenguno timi lakhi likhive, tiye pa no kimiye chekeu panu ke. Pa no ishi pi ghi kümtsü gholo ashekhau puwu, ‘Panongu ye I nu gihu kepu ke.’

⁷ “Ikemu mishichi chekemiqo no lakhi no lakhi vilo ishi pi, ‘Hino amheghi kiyighiu ke, ningu pa pìthíveni, tishiaye amheghi ye ninguw shive nani.’

⁸ Ikehu panongu no pa küghape heqhipithíve, eno atsailu lono khalau vepheve.

⁹ “Tishiaye atsailu mpeu ye kiu shi nani kea? Pa ye ighino mishichi akemiqo pìthíve nani eno atsailu pesü kütami tsüve nani.

¹⁰ Nongu ye Kuchoyesü lo hipau tsajo philumo keshea: “ ‘Aki kishimi no milive keu tuqu no akhotou tuqu shivae;

¹¹ Ampeu no hipau shive tsüa, eno hiye ningu nhekithe lo akümzapue.’”

¹² Ikelo achinetomi, ayeza kükütsümi eno kichimiqo no pa küghaluve niye alaghi phuju ae, kughengu Jisü no aholetsa pikeu ye panongu vilo piani kepi panongu no ithi ake. Ikemu panongu ye aqokitikhi msà ae; ikehu panongu ye pa qhive no wuve.

Akükaqha Zame Caesar tsü keu

¹³ Hipathiu panongu no Phariseemi ngò Herod papemiqo khami hapesü Jisü tsa lono pa meluve nike puwu.

¹⁴ Panongu no pa lau ighino pi, “Akükütsüu, ningu no ithi akeu ye no ye kikhikighimi lakhi. No ye kütami no züluve chekemi kumo, kughengu panongu ye khuu keno no ye tipau akhotoshi chemo; ikemu no ye Alhou laghi kuchou ghili kütsü acheni. Imaye ningu no akükaqha zame Caesar tsü keu ye achipi keo mokea?”

¹⁵ Ningu ye tsü kepu keo mokea? Ikemu Jisü ye panoqow kühakügha ithi ake. Ike pa no ishi iniju, “Nongu ye kushiye ni kitime niye pükapütsa ani kea? Ghükayi lakhi I lau süghi lo eno I pelo ti ju pelo.”

¹⁶ Panongu no ghükayi peighi, ikelo pa no panoqo vilo iniju, “Hiye khuu julho kea? Eno khiu shisü püani kea?” “Caesar’w,” ipi panongu no khochile.

¹⁷ Ikelo Jisü no panongu vilo pi, “Kiu no Caesar’w keno Caesar tsüchilelo eno kiu no Alhou’w keno Alhou tsülo.” Ikelo panongu ye pa ju pesü akümzave.

Xülekuthu lo Külakupu

¹⁸ Tisheno xülekuthu kühae ipi chekemi Sadduceemiqo no Jisü lau iniju nike kutò pesü ighi.

¹⁹ Panongu no pi, “Akükütsüu! Moses no ningu ayeza tsü keu lo tsalá timi lakhi no pamu thive püzü atianuli küha no pa nipu likhi qhive aye, timi hu ye achimeu luve no pamu ghenguno anuli-kughuko tsü moayesa ipie.

²⁰ Athazümi pano tsünì ache. Atüghiu no anipu lu eno anuli küha no thive.

²¹ Akiniù no achimeu valuve, ikemu pa ghí anu küha no thive. Aküthüu ghi titoi shive.

²² Eno tihutoi, pano tsünì lakhimu anuli shimo no thikhave. Ashekha lo atotiu ghi thive.

²³ Xülekuthu tsalà lo li ye khuu nipu shive nani kea? Kughengu pano tsünì no li lupe püani ke?”

²⁴ Jisü no khochile, “Nongu ye Kuchoyesü mu Alhou küká ghilimu ithi amoke nongu ye shipimi anike kumo keshea?

²⁵ Kughou kithimi xüputhuveni keno, panongu ye külakupu shike kumo no külakupu tsü keu ghi shimo nani; panongu ye kungugha lo kungumiqo toive nani.

²⁶ Itehi kithimi xüputhu keu tsa lo nongu ye Moses kaku lo philumo keshea, asüminipho iqü keu ghili lo Alhou no kíshi pa vilo pi kea? ‘Ni ye Abraham Lhou, Isaac Lhou, eno Jacob Lhou ke.’

²⁷ Pa ye kithimi Lhou kumoe, ikemu küxümi Lhou ke. Nongu ye ighono shipimi anie.”

Azakütsü kümtsü nguno Akijeu

²⁸ Ayeza kükütsümi lakhi no ighi püzü panongu no kütsala akeu chilu. Eno Jisü no khokichile kivi panoqo tsü keu ithulu no, pa no Jisü vilo iniju, “Azakütsü dolo khipau no kümtsü nguno akhotou kea?”

²⁹ Jisü no khochile, “Kümtsü dolo akhotou ye hipau ke: ‘Inilo, O Israel: Ningu mpeu Alhou likhi no Ampeu ke.

³⁰ O mlo, O ngulho, O kükümsü, eno O kumto kümtsü pesü O Mpeu O Lhou kimiye lo.’

³¹ Akiniù no hipau ke: ‘O likhi O toi O kisüghümi kimiye lo.’ Hinguno azakütsü akijeu ye küha ke.”

³² Timi hu no khochile, “Akükütsüu, achipi shi pivae. Nono Alhou ye lakhi eno alhou kütau ye kühae ikemu pa likhie ipi akeu ye achipie.

³³ Nongu mlo kümtsü, nonguw vethakulu kümtsü eno nongu kumto kümtsü pesü Alhou kimiye nikeu, eno O likhi O toi O kisüghümi kimiye nikeu ye akipti kümlagho eno aghakishiqo kümtsü nguno akhotou ke.”

³⁴ Kughou pa no alokütsü shi khochileve keu Jisü no ithulu keno, Jisü no pa vilo pi, “No ye Alhou kükaphu lono putosümovae.” Eno tipathiu timi kümtsü no pa vilo iniju nikeu ighüve.

Messiah ye Khuno pú kea?

³⁵ Jisü no achineki khala lo kütsü akelo, pa no ishi iniju, “Kiu shike ghenguno ayeza kükütsümiqo ye Messiah ye David nu ipi cheni kea?

³⁶ David ampi no Aghungu Kimthe vechewo no ishi shuphe ke: “Ampeu no I mpeu vilo pi: I no O ghümiqo pesü O pukhu qholo qhitsümo ke kutólo I u ajeu iqalo.

³⁷ David ampi ghí pa vilo, ‘Ampeu,’ ipi ku ke. Imaye kíshi no pa ye David nu ipini kea?” Timi kutomo no alokivishi pa tsa inie.

Ayeza kükütsümiqo lau Pikichi keu

³⁸ Jisü no kütsü akelo ishi pi, “Ayeza kükütsümiqo lau no kutokupui lo. Panongu ye chijeboboi-phi kushuwa usü iqho-iqi nishi cheni eno alhikishi-a lo panongu gihu ghi petha tsüpe nishi cheni.

³⁹ Eno panongu ye synagog lo ghí kümtsü nguno akhotou lakhüqo lo iqanishi cheni, eno aghulhu-a lo ghí akhoto-a phu cheni.

⁴⁰ Panongu ye chimemiqo ki süxaluve cheni eno timi shipe pìye nike ghenguno akighini kushuwa shi cheni. Timi hipaqo ye aghime kitikhi shi ghimeqhi nani.”

Achimeu Kümlagho

⁴¹ Jisü no akümlagho tsü chekeu-a ghüngü lo iqa püzü aqokitikhi no achineki kinibohu lo pisa sǘ akeu chhejua. Ikelo kinímiqo kutomo no aküakini kutomo pesü akiníbohu lo vesü ae.

⁴² Ikemu athokhau chimemi lakhi ye ighino asapuyi no mülà keu ghükayi kititi kini pesü akiníbohu lo sǘe, tiye pisa kitila me qhemi ke.

⁴³ Jisü no pa khopemiqo ku no ishi pi, “Kuchou no I no nongu vilo pìní, athokhau achimeu hipau no kütamiqo kümtsü nguno alau akiníbohu lo süvae.

⁴⁴ Panongu kümtsü pütüta no kupukuno shi akeu lono pesü tsüe, ikemu li ye athokha shiamu li no akeu kümtsü pesü tsüve ke.”