Mark 11 - Sümi Tiqhelimi Bible

Jisü no Jerusalem lo Akükau shi Ighi

¹ Panongu no Jerusalem kupunúve no Olive Naghuto lo Bethphage ngò Bethany lo ighi kelo, Jisü no pa khopemi kini puwu

² ghi pama vilo pi, “Nokujo züu aphu akeu lo wulo eno nokujo no ilo kelo timi khunomu iku mphi keu khurhati lakhi tile tshüpe püaghi keu ithulu nani. Ti kuqho püzü hilau saighi lo.

³ Khuala no nokujo vilo, ‘Kushiye ti kuqho ani kea?’ ipi iniju aye, ‘Ampeu no hi avehupu shi ani eno kushuwa kumo lo hilehi tsüchile puwove nani,’ ipi lo.”

⁴ Pama no wu kelo khurhati ahukikha lo tshüpe alaghila khalau aghí keu ithulu. Pama no ti kuqho akelo,

⁵ timi khami tile puthugho akemi no, “Nokujo ye kushiye khurhati kuqho ani kea?” ipi iniju.

⁶ Pama no Jisü no pilo pikeu toi khochileve, ikelo timiqo no panoqo pelo wuve pe.

⁷ Kughou pama no khurhati Jisü lau saighi no panonguw ubephiqo pesü khurhati shou vebe pe qhi keno Jisü no tipau shou iqae.

⁸ Ikelo timi kutomo no panonguw ubephiqo pesü alà lo qhatsü, eno khami no asübo lono asǜ lokaqo miché pesü alaghi lo qhatsüe.

⁹ Azüu eno athiu pa pape chekemiqo no ishi igha che, “Hosanna!” “Khuu no Ampeu je lono cheni keno pa ye akümghau ke!”

¹⁰ “Ningu papù David kükaphu chekeu ye akümghau ke!” “Kungugha lo akiqheu Lhou sheqhelo!”

¹¹ Jisü no Jerusalem lo iloghi eno achineki khala lo wu. Eno pa no hokümxa kümtsü ju, ikemu tsüzüve kehu pa no akhopemi Chighikini sasü Bethany lo wuve.

Jisü no Mububo Ghusho eno Achineki Khala Shikimthe

¹² Tishiwo thoghiu panongu ye Bethany qhive no wuche kelo Jisü ye müzüthive.

¹³ Putou no pishipuwo mububo anipa minibobo shi aghí keu ithulu, ikehu pa no axathi lakhimu pithí ani keo mokeno ju niye wue. Ikemu mubuthiqo pithí keu ghuloki kumo kehu kughou pa no tile ighi keno lakhimu pithí aghimo eno anipaqo likhi aghí keu ithulue.

¹⁴ Ikelo pa no asübo vilo pi, “Timi khuu pelomu akiniù O xathi chupemove peniu.” Pa no piakeu akhopemiqo no ti chiluve.

¹⁵ Jerusalem tolu kelo, Jisü no achineki khala lo ilo, eno tilehi küqhü-kili shi akemiqo haphe thuve. Pa no pisa kili akemi eno miqhedu je akemiqow akibepu eno alakhüqo kümtsü tukulove tsüe,

¹⁶ eno khuu pelomu achineki khala lo kilhikishi shipemo nike lakhave.

¹⁷ Eno panoqo kütsü ghi, pa no ishi pi, “Kuchoyesü lo, ‘I ki ye shiye kümtsü ghenguno akighini ki ipi ku nani,’ ipi yèpüani ke kumo keshea? Ikemu nongu no hipau pesü süxakuchumiqo küghütshü-a lakhi kughulhove tsüae.”

¹⁸ Achinetomi eno ayeza kükütsümiqo ye ti chilu kelo Jisü pìthíve nikeu laghi phuthuve. Kughengu aqokitikhi kümtsü no pa kükütsü ini pesü akümzave kehu panongu ye Jisü msàve.

¹⁹ Kughou avela shive keno Jisü ngò pa khopemiqo ye mishighüna qhive no wuve.

²⁰ Inaqhe shive no panongu ye wuche kelo, panongu no mububo hu ye akuhu kutólo thizümüive aghí keu panongu no ithulu.

²¹ Peter no kümsüchilelu no Jisü vilo pi, “Rabbi, julo! Nono ghushove keu mububo hu ye thizümüivae!”

²² Jisü no khochile, “Alhou lau aküpülü alo.

²³ Kuchou no I no nongu vilo pìní, tsalá khuala no pano mlo lo lipimo no panongu no kiu pive keno tishi nani kepi pülü püzü naghuto hipau vilo, ‘Wulo, O likhi O pesü azüghi lo vesüve lo,’ ipi aye panoqo ghenguno tishive tsü nani.

²⁴ Tighenguno I no nongu vilo pìní, nongu no akighini lono kiu-kiumu khu kelo tipau ithuluvea kepi pülülo, eno tipau hu nonguw shiluve nani.

²⁵ Eno kughou nongu no puthugho püzü akighini shini keno, tsalá nono khuala lau akipimí aghí aye, panoqo kipimí qhive tsülo, tishianguno nongu Papù kungugha lo akeu hu no nongu xinéqo pevetsü nani ke.

²⁶ Ikemu nongu no kütami xiné pevetsümo aye, nongu Papù kungugha lo küau ghi nongu xinéqo pevetsümo nani.”

Jisü Kükagha Iniju keu

²⁷ Panongu ye itaghi Jerusalem lo ighi, eno Jisü no achineki khala lo alà cheche kelo, achinetomi, ayeza kükütsümi eno kichimiqo pa lau ighi.

²⁸ Panongu no pa vilo iniju, “No ye kiu kükagha pesü thime hipaqo shi ani eno khuu no kükagha hipau O tsü kea?”

²⁹ Jisü no khochile, “I no nongu vilo thime lakhi inijuni. I khochile lo, eno I no kiu kükagha pesü hipaqo shi cheni keno nongu vilo pìní.

³⁰ I vilo pilo, John no baptiz shi chekeu ye kungugha lono keo timi lau no ighi keu kea?”

³¹ Panongu likhi panongu dolo küptsaju ghi ishi piae, “Tsalá ningu no, ‘Kungugha lono,’ ipi aye pa no ishi pìní cheni, ‘Tishiaye nongu ye kushiye pa pülümo kea?’

³² Ikemu ningu no, ‘Timi lau no ighi ipini keno’…” (Panongu ye timiqo msàve, kughengu kümtsü no John ye mütsümishei no tungkupu lakhi kepi kihi acheke.)

³³ Ike panongu no ishi Jisü khochile, “Ningu ye mthae,” ipive. Ikelo Jisü no pi, “Ni ghi nongu vilo ni ye kiu kükagha lono hipaqo shi ani keno pimoe.”