Luke 9 - Sümi Tiqhelimi Bible

Jisü no Akhopemi Chighikini Puwu

¹ Kughou Jisü no akhopemi chighikiniqo ku kütsülu keno, pa no tüghaküsaqo kümtsü haphe kulupu eno küsükini shipivi kulupu küká ngò kükagha pesü panoqo tsüe,

² eno pa no Alhou kükaphu ghili pesü asheshu eno küsükinimi shipivi penike panongu puwue.

³ Pa no panongu vilo pi, “Nongu kicheghüzü ghenguno kiumu pe kevilo—aküsǘ, jolabo, achuqupu ngò pisa pe kevilo eno aphiküzü xakili kepu pe kevilo.

⁴ Khuno-khuno ki lo ilomu mishiphu tipau qhimo ke kutólo tile ngo lo;

⁵ Tsalá timi no nongu sasümo aye mishiphu tipau qhivelo eno panongu lachile akeu thopi michi shi nongu pukhu lo ayeghimukhu kukhuqhivelo.”

⁶ Ike panongu no alà cheve no aphu lakhi lono lakhi lo wu no atsakiviu pesü asheshu eno aqha kümtsü lo timiqo shipivie.

⁷ Tishi akelo Herod ayekipeu ye Jisü no kiu shi ani keno kümtsü chiluve. Eno pa ye ighono avehuizüve kughengu timi khami no John ye akithí lono xülethuva ipia,

⁸ kütami no Elijah ipeghiva ipi, eno khami no pikeu no khaghi ghuloki lou tungkupumi gholo lakhi xülethuvae ipi.

⁹ Ikemu Herod no pi, “I no John kütsü love tsüae. Imaye, timi hipau ye khuu keno ni ye hikithipu tsa chilu ani kea?” Tisheno Herod ye Jisü ju nike pükapütsae.

Jisü no Qhethonhe Pungu Loji

¹⁰ Kughou apostolmiqo no ideighi keno panongu no kiu mülàlu keno Jisü vilo pithive. Tithiu pa no panongu sasü pa gholo no mishiphu Bethsaida ipikeu lo wuve,

¹¹ ikemu aqokitikhi no ti ithive no pa papesü ighi. Pa no panoqo sasülu püzü Alhou kükaphu ghili pesü panongu vilo pi, eno khunoqo no shikipivi avehupu shi akeno tipaqo shipivi tsüe.

¹² Kughou tsüzüve keno akhopemi Chighikini no pa lau ighino pi, “Timi aqokitikhi hipaqo pelo aphu eno sükümxaqo lo wu no achuqupu ngò akùngó-a phulu penike puwovelo, kughengu ningu ye timi no küghünamokeu-a lo ngo anie.”

¹³ Jisü no khochile, “Nongu no kiuala chu kepu pesü panongu tsülo.” Panongu no khochile, “Ningu ye aqokitikhi hipaqo kümtsü ghenguno wu püzü achuqupu qhü pesü ighi nike kumo aye ashopa pungu eno akha kini likhi anie.”

¹⁴ (Tilehi kipitimi 5,000 qhalo ake.) Ikemu Jisü no pa khopemiqo vilo pi, “Amqo lakhi-khi lo timi lhopungu toi keu shi no iqave pelo.”

¹⁵ Akhopemiqo no tishive, eno timi kümtsü no iqave.

¹⁶ Jisü no Ashopa pungu eno akha kini ikhiluve no atsütsǘ lo jupuku püzü shikimthi tsü no asho süpho. Tisheno timiqo kijé tsü penike akhopemiqo tsü.

¹⁷ Panongu kümtsü aghakiqi shi chuve, eno tithiu akhopemiqo no chukha kumo munomughoqo ashoghi chighikini kichelu.

Peter no Jisü ye Messiah kepi Shuphetsü

¹⁸ Ghuthu lakhi Jisü no lomo shi inikhu akelo akhopemiqo ghí pa gholo ae, pa no panongu vilo iniju, “Timiqo ye ni pesü khuu ipi cheni kea?”

¹⁹ Panongu no khochile, “Khami no no ye John Baptiz kishiu; kütami no no ye Elijah, eno itaghi khami no no ye khaghi tungkupumiqo dolo lakhi xüchile ithughi ani ipi chenie.”

²⁰ Pa no iniju, “Imaye nongu ye kíshi kea? Nongu ye ni ye khuu ipi cheni kea?” Peter no khochile, “Alhou’w Messiah ke.”

Jisü no Pa Kithí Ghili Pichho

²¹ Jisü no panongu vilo hipau pesü khuu vilomu pi kevilo pi azah tsüve.

²² Eno pa no pi, “Timi Nu ye aghime jeli ithulu moayesa nani eno kichimiqo, achinetomi eno ayeza kükütsümiqo no pa milive nikeu pitsü. Eno pa ye pìthíve moayesa nani eno atsala aküthüu lo ye xüputhuve nani.”

²³ Tisheno pa no panongu kümtsü vilo pi: “I khopemi shinishi kemi ye pa likhi pa milive moayesa eno paw kros xapu no I pape moayesae.

²⁴ Kughengu khuno no pano likhi pano küxü süsho nishi keno pühave nani; ikemu khuno no I ghenguno pano küxü tsüveni keno pano ye xaluve nani.

²⁵ Timi lakhi no ayeghiqha kuchopu paw shive aghí namu pa likhi pa küxü pühave momu xamlave aye kiu alá ani kea?

²⁶ Khuno no I ghenguno eno I tsape ghenguno kujomzani keno Timi Nu ghí kughou pa no pa juküvü, Apù juküvü eno akimthe kungumiqo juküvü lo ighini keno timi tipaqo je piphe tsümo nani.

²⁷ “Kuchou no I no nongu vilo pìní, hilehi I gholo puthugho akemi dolo khami ye Alhou kükaphu aküka kumto lono ighi keu ithulu mphi züu ye akithí michemo nani.”

Ajukikili

²⁸ Jisü no hipau pive keu atsala tachea thiu pa no Peter, John eno James sasü naghuto shou no inikhu nike iqhoe.

²⁹ Pa no inikhu akelo pa ju kilive eno paw tiphiminiqo ye tsütsüpha kukulo toi miyetsüghoive.

³⁰ Paikhavi lono timi kini, Moses ngò Elijah pama ajuküvü lono qhivütsüni ipeghino Jisü sasü küptsae.

³¹ Jisü ye idewo püzü Jerusalem lono Alhou pulou shikupu niye akeu ghili panongu no küptsa ake.

³² Peter eno pa küsàmiqo ye züchei zühuve ikemu kughou panongu no idaithughi keno Jisü juküvü gholo timi kini puthugho aghí keu ithulue.

³³ Pama no Jisü qhive no wuve niye akelo Peter no Jisü vilo pi, “Ampeu, ningu ye hile ngo akeu pavi anie; ningu pelo apushonha küthü mülà puku pelo, lakhi no O sala, lakhi no Moses sala eno lakhi no Elijah sala.” (Peter ye pa no kiu pi akeno mthae.)

³⁴ Pa no atsa piaphi lono khüngküsü ighino panongu küzüpholuve; eno panongu ye khüngküsü lo ilove kelo msàve.

³⁵ Khüngküsü lono asütsa lakhi ighino ishi pi, “Hiye I nu, I no kisheluve keu ke; pa tsa inilo.”

³⁶ Asütsa pitave kethiu Jisü likhi aghive keu panongu no ithulu. Akhopemi pano küthü no kiu ithuluve keno panongu dolo qhiluve eno tipau ghuloki lo panongu no kiu ithulu keno pesü khuu vilomu pimoe.

Tüghaküsa no Tsüghape akemi Itimi lakhi Jisü no Shipivi

³⁷ Tishiwo thoghiu kughou panongu no naghuto lono iqighi keno timi kutomo no Jisü sasü kushoe.

³⁸ Aqokitikhi gholo timi lakhi no ighamuku pi, “Akükütsüu, I jutsü penike I no O qhüiniju ani, kughengu ni ye anu hilikhi ke.

³⁹ Aghawu lakhi no pa tsüqüluve cheni eno pa ye zülile no igha ipeghi acheni; tino pa süküghüthaqhi keu lono pa kichí lo mlaghubeive cheni. Hipau no pa phetsümo püzü pa shipüsa auvae.

⁴⁰ I no O khopemiqo vilo ti hapheve tsülo pi qhüiniju ikemu panongu ye haphe mülave ke.”

⁴¹ Jisü no khochile, “Nongu pülükümla eno hekibide tiqhelimiqo, ni ye khitohi nongu sasü anani kea? Ni ye khitohi nongu gholo ache nani kea? O nu hilau saighi lo.”

⁴² Anu no Jisü lau chephi lono mithekumo ghungu no süküghüthaqhi no ayeghi lo pa tukuluqhive. Ikemu Jisü no tüghaküsa ghawu lomipi no anu ye shipivive püzü papù lau puwuve.

⁴³ Panongu kümtsü no Alhou küká kumto jupe akümzave. Jisü no kiu mülà keno timiqo no jupe akümzaqhiyi akelo, pa no pa khopemiqo vilo pi,

Ghuthu Akiniù Jisü no pa Kithí Ghili Pichho

⁴⁴ “I no kiu pi niye ani keno tsaqüi inilo: Timi Nu ye ikhiphe pesü timiqo u lo sǘve tsüní cheni.”

⁴⁵ Ikemu hipau kiqi ye kiu keno panongu ye vethamlave. Tiye panongu lau no küsüpe püakeu ghenguno panongu ye vethamlave ke, eno panongu ye pa vilo hipau vehu iniju nikeu ighüve ke.

⁴⁶ Akhopemiqo dolo khuu no akijeu shi ani kea ipi panongu dolo kütsala keu ipeghive.

⁴⁷ Jisü no panongu kükümsü ithive kehu, itimi lakhi pa lau saighi pe no pa phivilo puthugho ngo pe.

⁴⁸ Tisheno panongu vilo pi: “Khukhumu I je lono itimi hitoi keu sasüni keno ni sasü anie, eno khuno no ni ikhiluni keno I puwu akeu ikhilu ani. Kughengu nongu gholo khuu no akitilau keno pa no kümtsü nguno akijeu ke.”

⁴⁹ John no Jisü vilo pi, “Ampeu, timi lakhi no O je lono tüghaküsaqo haphe aghí keu ningu no ithulu ke ikemu pa ye niqomi kumo ke ghenguno ningu no lakhave niye pükapütsa ke.”

⁵⁰ Ikemu Jisü no pi, “Pa lakha kevilo; kughengu khukhumu nongu lachilemo kemi ye nolaumi ke.”

Samariami Ghokichile

⁵¹ Kungugha lo Jisü saikuve kepu do kupunú woche kelo, pa no pa kükümsü ighomo no Jerusalem lo wuni keu shi.

⁵² Pa no azüu no aghinikishimiqo Samariami phu lakhi lo ilo no pa ghenguno thowkha kutò penike puwuve;

⁵³ ikemu tilehi timiqo ye pa sasümoe, kughengu pa ye Jerusalem lo wu niye cheke.

⁵⁴ Kughou akhopeu James ngò John pama no ti ithulu keno pama no iniju, “Ampeu, no ye ningu pelo kungugha lono ami ku piqi no panongu pitiqhi penishi anima?”

⁵⁵ Ikemu Jisü no kugho ighino pama sakiyive.

⁵⁶ Tisheno pa eno pa khopemiqo ye aphu kütau lo wuve.

Jisü Pape Nikeu Mekusho

⁵⁷ Panongu no alà lo cheche kelo, timi lakhi no Jisü vilo pi, “Nono khila wuni keno ni ghí O papesü wunie.”

⁵⁸ Jisü no khochile, “Aghalotsüqo ye ngo kepu tuki ani eno aghauqo ye apüsü anie, ikemu Timi Nu ye pa kütsü mükhü kepu-a ghí kühae.”

⁵⁹ Jisü no kütami lakhiu vilo pi, “I papelo.” Ikemu pa no khochile, “Ampeu, I pelo wu no I pù kumo shiqhove paghi pelo.”

⁶⁰ Jisü no pa vilo pi, “Kithimi pelo kithimi kumo shiqho apelo, ikemu no ye wu no Alhou kükaphu ghili pesü asheshu lo.”

⁶¹ Itaghi kütami lakhi no pi, “Ni ye O papeni Ampeu; ikemu I pelo aki lo idewo no nibolomiqo vilo akikini tsa pive paghi pelo.”

⁶² Jisü no khochile, “Khuu no akuphu tsüqüpe apülaghi athiu juni keno Alhou kükaphu lo ilo nikeu aküzüpu kumoe.”