Luke 8 - Sümi Tiqhelimi Bible

Apitikiveu Holetsa

¹ Tipathiu, Jisü ye Alhou kükaphu sütsa kiviu pesü asheshu ghi mishiphu eno aphu lakhi lono lakhi lo kicheghüzü shisü wu. Apostolmi chighikini ye pa gholo che,

² tüghaküsa ghawu eno küsükini lono shipivive kemi totimi khami ghí tile che: Mary (Magdalene ipi chekeu) li lau no tüghami tsünì ipeghive keu ngò

³ Herod kibo püghükütsüu Chuza nipu Joanna, tinguno alau Susanna eno kütami kutomo ghí che. Totimi hipaqo no panonguw küakini laghi akeu pesü Jisü ngò pa khopemi kuphu che.

⁴ Timi kutomo kumqo pe akeu gholo mishiphu kütüta lono timiqo tamo no Jisü lau ighi akelo, pa no kimghi pìye keu tsa hipau pi:

⁵ “Alukichimi lakhi no apitì ve niye wue. Pa no apitì vesü akelo, hami no alaphe lo vesülu eno tipaqo ye qodave, eno aghauqo no ighino tipaqo mighive.

⁶ Hami no aghüma chilomo keu atusaye yeghi lo vesülu, eno kughou tipaqo lhoipeghi keno tiye ighono qhai keu-a ke ghenguno asüboqo ye ighüive.

⁷ Apitì hami ye asahuli dolo ikiqi ilove, aghibo tipaqo ye asahu gholo thuwu ipeghi kemu asahu no ghüsüve.

⁸ Tishimu apitì hami ye aghüma kivi lo ikiqi ilolu. Tino lhoipeghi no apitì vesü keu nguno alau aqhe kutólo küghüsü ghi pithílu.” Jisü no hipaqo pive, eno müghachhoi shi püzü pi, “Khunoqo no chilu nishi ani keno panoqo pelo chilu pelo!”

⁹ Jisü khopemiqo no hipau kimghi pìye keu kiqi ye kiu kea ipi iniju.

¹⁰ Jisü no pi, “Alhou kükaphuw tuqhou ghili ithukulupu pesü nongu tsüvae; ikemu ni ye kütami lau ye kimghi pìye keu lono pi cheni, tishianguno, “ ‘panongu ye ju pülaghi ithumla nani, eno ini pülaghi vethamla nani.’

¹¹ “Kimghi pìye keu kiqi ye hike: apitì hu ye Alhou tsa ke.

¹² Apitì alà lo ikiqive keqo ye chiluve kemiqo, ikemu tüghami no ighino panongu mlo lono atsa ikhisüwuve tsüke miqo, tiye panongu pelo pülü eno xalu pemo niye ke.

¹³ Apitì atusaye yeghi shou ikiqi keqo ye Alhou tsa chilu kelo alokivishi ikhilu keqo ke; ikemu panongu ye akuhu qüsümoe. Ikehu ado kitila ghenguno pülüa no thekuju ighi kelo ikiqive kemiqo ke.

¹⁴ Apitì asahu gholo ikiqi ilove keu kiqi ye Alhou tsa chiluve kemiqo, ikemu aküxü lo mloküsa, kinikülü lo amlo tsü eno ashi pulou shikeu vechewo panongu ye thuwu mülave no ghüsüve keu kiqi ke.

¹⁵ Ikemu ayeghi kivi lo apitì vesülu keu ye xüpivi chekemi eno amlo kivimiqo, panongu ye Alhou tsa chilu no ikhilu kemiqo, eno akumto shikeu vechewo athi kutomo pithílu kemiqo ke.

Akulu Akibepu lo akeu

¹⁶ “Khunomu akulu küqü pesü ayeghi lì lakhi no küsüpe qhive chemoe momu alipa qholo qhive chemoe. Ikemu, akibepu lo be cheni, tishianguno aki lo iloghi kemi pelo aküvü ithulu peniye ke.

¹⁷ Kughengu küsüpe püakeu lakhimu pephe-piyemo keu shimo nani eno nhapüa keu lakhimu ithive pemo keu shimo nani.

¹⁸ Tishiaye, no ye kíshi ini acheni keno kutokupui lo. Khuno no ani keno alau tsü nani; khuno no küha keno panongu no kiu ani ipi kümsü ani keno ti ghí ikhipe wuve tsü nani.”

Jisü Pazá eno Pa Thiküzümiqo

¹⁹ Jisü pazá eno athiküzümiqo ye pa ye kiutoi ani keno ju niye ighi, ikemu aqokitikhi ghenguno panongu ye pa phivilo wumla no ae.

²⁰ Timi khami no Jisü vilo pi, “O zá ngò O thiküzümiqo ye O ju nishiqhiyi khalau puthugho anie.”

²¹ Jisü no khochile, “I zá eno I thiküzümi ye khuno no Alhou tsa ini eno tipau peitha cheni keno tipaqo no ke.”

Jisü no Pasapagha Ghasüve

²² Ghulo lakhi Jisü no pa khopemiqo vilo pi, “Ningu ayizükucho hukuku küdau wuni shilo.” Ikehu panongu no ashuka lo iku no wuve.

²³ Panongu no wuche kelo Jisü ye zü auve. Tipau dolo pasapagha mülhü paküta keu shi ayizükucho shou ikughi, Tishi kelo ashuka ye azü no chhive nike toive eno panongu ye kümsapu kijè dolo ngove.

²⁴ Akhopemiqo no wu no Jisü küdaputhu ghi pi, “Ampeu, Ampeu, ningu pütsüqhive niye shivae!” Jisü no idaithughi püzü amlhü eno azü fukucho lomipi ikelo amlhü ye iqüighai ngove eno thowkha shishe iqünheive.

²⁵ Pa no akhopemiqo vilo iniju, “Nongu küpülü khile ani kea?” Akichiqhi eno akümsa lau no akhopemi lakhi no lakhi vilo pi: “Hiye khuu kea? Pa no amlhü ngò azü vilo ghí azah tsü anie, eno tipaqo no pa gholu anie.”

Tüghaküsa Akemi Shipivi

²⁶ Panongu no Galilee ghüngü lo Gerasenes ko-aqha lo ashuka lono wue.

²⁷ Kughou Jisü no ayizükucho mükü lo ipeghi keno mishiphu lono tüghaküsa alolo akemi timi lakhi kusholu. Timi hipau ye tiphimini pepumo eno ado kushuwa aki lo ngomove kemi, eno pa ye akumokiqo lo ngo acheke.

²⁸ Kughou pa no Jisü ithulu keno, ighamuku ghi Jisü pukhuphi lo ikiqive, eno pa no asütsa kuloghi lono ishi igha ghi pi, “Shishe Akiqheu Lhou Nu Jisü, no ye I lau kiu avehupu shi ani kea? I no O qhüiniju ani, I shikighime tsü kevilo!”

²⁹ Jisü no mithekumo ghungu vilo timi lau no ipeve penike azah tsüe. Kughengu ghuthu kutomo aghawu hipau no pa tsüqüluve che eno ayikichhe no pa phi-au tshüve no khekuto anamu, pa ye ayikichhe kighiqo ghí süthave no tüghaküsa no hasasü aghasaqo lo wuve che.

³⁰ Jisü no pa vilo iniju, “O je khuu kea?” Pa no pi, “Legion,” kughengu tüghaküsaqo kutomo pa lolo ilove ke.

³¹ Ikelo tüghaküsaqo no aqokutho lo panongu halesü tsü kevilo pi anguno-anguno Jisü qhüiniju ae.

³² Tilehi awo amqo kijè lakhi atoghi küdau nguchu ae. Tüghaküsaqo no panongu pelo awo tipaqo phi lo ilolu pelo pi Jisü qhüiniju, eno Jisü no panongu pelo tishive penike azah tsüve.

³³ Kughou tüghaküsaqo no timi phi lono ipeghive keno awoqo phi lo ilove; eno awo kümtsü atuxu lo kohakive iqive no ayizükucho lo ilove püzü pütsüqhi khave.

³⁴ Awo khemiqo no kiu shive keno ithulu kelo, panongu ye pove eno hipau vehu pesü mishiphu lo eno aphughi sükümxa lo pikülhave tsü,

³⁵ eno timiqo no kiu shive keno ju niye wukhae. Kughou panongu no Jisü lau ighi keno, timi tipau phi lono tüghaküsa hapheve aghí eno tiphimini pepuve püzü akükümsü achipi shive püzü Jisü pukhuphi lo iqa aghí keu ithulu no msàve.

³⁶ Ti ithulu kemiqo no tüghaküsa no tsüghape achekeu timi hu ye kíshi viluve keno kütamiqo vilo pi wove.

³⁷ Tilehi Gerasenes sükümxa qhalo küami kümtsü no Jisü vilo panongu lau no wuvelo ipi, kughengu panongu kümtsü shishe msàve ke. Ikehu pa ye ashuka lo iku no wuve.

³⁸ Timi khuu phi lono tüghaküsa hapheve keno Jisü gholo wuni ipi qhüiniju, ikemu Jisü no pa puwove ghi pi,

³⁹ “O ki lo idewolo eno Alhou no O ghenguno kiu mülave tsü akeno pilo.” Timi hu no wo püzü Jisü no pa ghenguno khijehi mülà tsü keno mishiphu qha kümtsü lo asheshue.

Jisü no Angá Thive keu Xüputhuve eno Aküsüu Totimi Shipivi

⁴⁰ Kughou Jisü no ideighi keno aqokitikhi no alokivishi pa sasüe, kughengu panongu kümtsü pa khelho ake.

⁴¹ Tishi akelo, synagog lo sakiphemi lakhi Jairus ipikeu ighino Jisü pukhu phivilo iluikiqive püzü kimiye no pa ki lo ighi tsülo pi qhüiniju

⁴² kughengu pa ngá lakhi likhi akeu hu ye thive niye shive ke. Li ya ampe chighikini shi ake. Kughou Jisü no Jairus ki lo wuche keno aqokitikhi no pa tsakibi pesü che.

⁴³ Totimi lakhi ampe chighikini ajì poache eno khunomu li shipivi müla no akemi lakhi ghí tilehi che.

⁴⁴ Li no aqokitikhi gholo no Jisü thiu no ighi püzü paw ubephi ashe lo bue, ikelo paikhavi lono li no ajì poache keu tave.

⁴⁵ Jisü no iniju, “Khuu no I bu kea?” Kümtsü no pa bumoe piwu khave, tilehi Peter no pi, “Ampeu, timi hijejehi no O sühope ani eno O tsakibikhoi pesü chenie.”

⁴⁶ Ikemu Jisü no pi, “Milakhi no I buvae, kughengu aküka I lau no ipeve keu I no ithivae.”

⁴⁷ Ikelo atotiu hu ye itshü müla keu ithive, eno khokhoshi Jisü pukhuphi lo ikiqive. Li no tile akemi kümtsü zülo no li ye kushiye pa bu eno kíshi bukhavi lono viluve keno pie.

⁴⁸ Jisü no li vilo pi, “Angá, O küpülü no O shipivivae. Aloino wolo.”

⁴⁹ Jisü no atsa piaphi lono, synagog lo sakipheu Jairus ki lono timi lakhi ighi. Pa no Jairus vilo pi, “O ngá ye thiva ke, akükütsüu shipüna akevelo.”

⁵⁰ Kughou Jisü no ti chilu keno Jairus vilo pi, “Msàkevi no pülülo, eno li ye viluve nanie.”

⁵¹ Kughou Jisü no Jairus ki tolu keno, Peter, James, John eno angá papù eno azá pama nguno alau ye kütami lakhimu pa gholo alou iloghi pemoe.

⁵² Hipau dolo, angá ghenguno timi kümtsü amlokithikumo shi mloqa ae. Jisü no pi, “Igha qa kevelo, li ye zü anike thono thimphie.”

⁵³ Panongu no Jisü junuqhie, kughengu li ye thive keu panongu no ithi ake.

⁵⁴ Ikemu Jisü no li u tsüqüpe no pi, “Ningá, ithulo!”

⁵⁵ Ikelo li ghungu ye ideghive eno tipa mtsa li ye puthughove. Tisheno kiuala chu kepu pe li tsü penike Jisü no panongu hakite.

⁵⁶ Li pù-aza ye akichiqhive, ikemu kiu shivea keno khuu vilomu pipemo nike Jisü no panongu azah tsüve.