Luke 4 - Sümi Tiqhelimi Bible

Jisü Ghuju keu

¹ Jisü ye Aghungu Kimthe no chhitoi shi no Jordan qhive püzü Alhou Ghungu no pa sasü küghünamokeu-a lo wuve,

² tile tüghami no atsala lhobidi pa ghujue. Tipau tsalà dolo pa ye kiumu chu-shomoe, ikehu hipaqo tsalà ashekha shive kelo pa ye müzüthive.

³ Tüghami no pa vilo pi, “Nono Alhou nu shi aghí aye atu hipau vilo asho ilhovelo pilo.”

⁴ Jisü no khochile, “Ishi yèpüani: ‘Timi ye achuqupu shou likhi bepe xülu chemoe.’”

⁵ Tüghami hu no pa sasü chuqumghai keu-a lakhi lo saiku no anhekütsükhavi lono ayeghi lo kükaphuqo kümtsü pa pìye.

⁶ Eno tüghami no Jisü vilo pi, “I no panoqo kükagha eno qhivütsüni akeu kümtsü O tsüní; hi kümtsü I tsüpe püani eno I no khukhumu tsüní shikeu tsüluve nani ke.

⁷ Tsalá nono I mülá aye hi kümtsü ow shive nani.”

⁸ Jisü no khochile: “Ishi yèpüani: ‘Ampeu O Lhou mülá lo eno pa likhi huthu lo.’”

⁹ Tüghami no Jerusalem lo Jisü sawu no pa pelo achineki kütsüqa lo puthugho pe. Pa no ishi pi, “Nono Alhou nu shi aghí aye, hile no ilhe iqivelo.”

¹⁰ Kughengu ishi yèpüani: “ ‘Pa no paw kungumi pelo O tucho eno jukuto khe penike azah tsü nani;

¹¹ tishianguno O pukhu pelo atu shoumu püsüpuku pemo nani, panongu no panongu u lono O khapeluve nani.’”

¹² Jisü no khochile, “Ishi pipüani: ‘No ye Ampeu O lhou theju kepu kumoe.’”

¹³ Kughou tüghami no ghuju keu hi kümtsü tave keno, pa ye adokivi ithulumo ke kutólo Jisü qhive no wuve.

Nazareth lo Jisü Milive

¹⁴ Jisü ye Aghungu küká lono Galilee lo ideighi, ikelo aphughi sükümxa kümtsü lo pa ghili pikülha wove.

¹⁵ Pa no panonguw Synagogqo lo kütsü kelo panongu kümtsü no pa sheqhe ae.

¹⁶ Pa no pa saputhukeu-a Nazareth lo wu, eno pa no shi chekeu kukhuaye kiqi lono pa ye Sabbath tsalà lo Synagog lo wu. Pa no liküküzü kaku phisü niye puthugho,

¹⁷ eno tile tungkupu Isaiah kaku ikhipe pa tsü. Pa no liküküzü kaku lhaphe kelo ishi yèpüaghi keu ithulu:

¹⁸ “Ampeu Ghungu I shou ani, kughengu atsakiviu pe kumlhomi lau asheshu peniye pa no ni nukishelu ke. Akughumi lau khakiqhi kütüghü peniye eno anhethi kighichemi pelo ithulu kithe peniye, neda-qoda püa kemi phepuwu peniye

¹⁹ eno Ampeu no paw timi xalu nikeu mpe shukiphe shipe niye I puwu ke.”

²⁰ Tishive no pa no kaku liküzüve no aghinikishiu tsü chileve no iqave. Synagog lo akemi kümtsü no anhethi süküqümo no pa ju ae.

²¹ Pa no panongu vilo pithu: “Nongu no chilu akeu vechewo ishí no Kuchoyesü hipau shikupuvae.”

²² Timi kümtsü no akishé pa tsü eno panongu ye pa kichí lono kimiyekini tsa pikeqo chilu no akichiqhive. Panongu no ishi iniju: “Hiye Joseph nopu ke kumo keshea?”

²³ Jisü no panongu vilo pi, “Kuchou no nongu ye I vilo ahole hipau tsatho pi nani: ‘Shikipivimi, O likhi O shipivi lo!’ Eno nongu no I vilo ishi pi nani, ‘Nono Capernaum lo mülà keu ningu no chilu keu toi O punugha hilehi ghí tipaqo shilo.’ ”

²⁴ Jisü no kibe ghi pi, “Kuchou no I no nongu vilo pìní, tungkupumi khiumu pano punugha lo ikhilu chemoe.

²⁵ I no mütsüqhei nongu vilo piakeu ye Elijah ghuloki lo kughou Israel lo ampe küthü tüxa ghumove no ayeghiqha kümtsü lo püqümiye ighi keno tilehi chimemi kutomo ache.

²⁶ Tishimu Elijah ye panongu lakhi laumu puwumoe, ikemu Sidon yeghi lo Zarephath phu lo chimemi lakhi lau puwue.

²⁷ Eno tungkupu Elisha ghuloki lo Israel lo apügha kupumi kutomo ache, ikemu Syrian Naaman nguno alau ye kütami lakhimu shipivi tsümoe.”

²⁸ Kughou Synagog lo akemiqo no hi chilu keno panongu ye ighono muqhumüzaive.

²⁹ Panongu no puthughove no pa sasü mishiphu lono khalau saipeve, eno pa pesü mishiphu shipuku keu toghi nhekikhi lo kulusüve nike ghenguno saiku.

³⁰ Ikemu pa ye aqokitikhi mtá dolo no shoxüsü pa là lo chesü wuve.

Jisü no Mithekumo Ghungu Haphe

³¹ Tisheno pa ye Galilee lo mishiphu Capernaum lo iqi, eno Sabbath tsalà lo timiqo kütsüe.

³² Panongu ye pa kükütsü ini pe akümzave kughengu pa tsa lo kükagha ake.

³³ Synagog lo timi lakhi mithekumo ghungu tüghami hu no tsüghape ae. Pa no ighamuku vekipighi pi,

³⁴ “Wuvelo! Nazareth nó ghami Jisü, no ye ningu lau no kiu avehupu shi ani kea? No ye ningu kütsave niye ighi ani keshea? No ye khuu keno I no ithi ani—no ye Alhou’w Akimtheu hu ke!”

³⁵ Ikemu Jisü no müghachhoi pa lomipi: “Inaqhoivelo! Pa lau no ipeghivelo.” Tishi kemtsa tüghaküsa no panongu kümtsü zülo no timi hu tukuluqhive püzü kiumu ghüza keu shimo no pa lau no ipeve.

³⁶ Timi kümtsü no akümzave no panongu lakhi no lakhi vilo ishi pi, “Hiye kiutoi keu tsa kea! Kükagha eno aküka lono pa no mithekumo ghunguqo vilo azah tsü kelo timi lau no ipeghivae!”

³⁷ Ikelo tipau sükümxa qha kümtsü lo pa ghili pikülha wove.

Jisü no Timi Kutomo Shipivi

³⁸ Jisü no Synagog qhive no Simon ki lo wu. Tile Simon pani ye muqhomüzai aghamiki aghí eno panongu no Jisü vilo li kuphu tsülo ipi.

³⁹ Ike pa no li phivilo itsaqi no aghakimki lomipi eno aghakimiki no li qhive no wuve. Li no paikhavi ithughive no achuqupu kutò pe panongu tsüe.

⁴⁰ Avelau shive kelo, timiqo no Jisü lau aküsǜ jeli no sǜ akemi kümtsü saighi, eno Jisü no pa u pesü panongu lakhi-khi shou be ghi panongu shipivi tsüe.

⁴¹ Tinguno alau tüghaküsaqo no timi kutomo phi lono ipeghino ishi igha, “No ye Alhou Nu hu ke!” Ikemu pa no panongu lomipi eno panongu pelo atsa pipemo, kughengu panongu ye Jisü ye Messiah kepi ithi ake.

⁴² Inaqhe vü ipeghive kelo, Jisü ye yenguikeu-a lo wuve. Timiqo ye pa phujua eno kughou panongu no Jisü no ngo akeu-a lo ighi keno panongu ye pa pelo panongu qhive pemo niye pükapütsae.

⁴³ Ikemu pa no pi, “Ni ye mishiphu kütauqo lo ghí Alhou kükaphu tsakiviu pikülha moayesa ani, kughengu hipau ghenguno I puwu ke.”

⁴⁴ Tisheno pa ye Judea lo Synagogqo lo kütsü auve.