Luke 3 - Sümi Tiqhelimi Bible

John Baptiz Kishiu no Alaghi Ghe keu

¹ Tiberius Caesar no ka keu mpe chighí apunguu shi akelo, Pontius Pilate no Judea lo Angh shia, Herod no Galilee lo ayekipeu shia, pa thiküzüu Philip no Iturea ngò Traconitis lo eno Lysanias no Abilene lo ayekipeu shi akelo,

² Annas ngò Caiaphas pama no achinetou shi ake ghuloki lo küghünamokeu-a lono Alhou tsa Zechariah nu John lau ighi.

³ Pa no Jordan ghoki sükümxa kümtsü lo wu eno amlo pebideve püzü axiné qhikütsü ghenguno baptiz shive moayesa keu kütsüe.

⁴ Isaiah tungkupuu tsa kaku lo ishi yèpüani: “Küghünamokeu-a lono asütsa lakhi ighamuku ku ani, ‘Ampeu ghenguno alaghi ghepe qhitsülo, pa no wu kepu laghi müzüchoi shitsülo.

⁵ Akhilaqa kümtsü shepichhive nani, naghuto eno atoghi kümtsü külaqave nani. Ihoghülai keu laghi kümtsü shikümzüve nani, kukokilei keu laghi hu ye jokumduve nani.

⁶ eno timi kümtsü no Alhou’w xakulu ithulu nani.’ ”

⁷ John no aqokitikhi pa lau baptiz shitsü peniye ighi keqo vilo pi, “Nongu apighitiqo! Khuu no nongu pelo Alhou loghukighide chekeu lono polu penike pikichive kea?

⁸ Amlo pebideve keu toi xüpe pìyelo. Eno nongu ye, nolikhi no vilo, ‘Ningu ye Abraham no ningu papù ke,’ ipi pilu nani küghashi kümsü kevilo. I no nongu vilo pìní, Alhou ye atu hipaqo pesü Abraham ghenguno anuli kughulhopheve tsülu nani.

⁹ Amghü ye asüboqo kuhu phivilo kutò pe ani, eno asübo khijehi no axathi kivi pithímoni keno yeqhive no ami lo vesüve nani.”

¹⁰ Aqokitikhi no iniju, “Tishiaye ningu ye kiu shi moayesa kea?”

¹¹ John no khochile, “Timi khukhumu aphiküzü kini aghí aye khuu no küha keno pa sasü küsaje moayesa, eno timi khuu no achuqupu aghíni keno pa ghí titoi shi moayesa ke.”

¹² Asüqha küqhami ghí baptiz shitsü peniye ighi eno panongu no iniju, “Akükütsüu, ningu ye kiu shikepu kea?”

¹³ Pa no panongu vilo pi, “Nongu pelo qha peniye bethatsü keu nguno alau ye qha kevilo.”

¹⁴ Tile ghüshimi khami no pa vilo iniju, “Eno ningu ye kiu shilo pi kea?” John no khochile, “Pisa süxalu kevilo momu akimiki lono kütami nguku keu shi kevilo, O jume ithulu achekeu lo aghakiqi shi alo!”

¹⁵ Timiqo ye khekulhoshi khea eno panongu mlo lono John no Messiah shi aghí nani kepi kümsükimghei ae.

¹⁶ John no panongu kümtsü khochile, “I no azü lono nongu baptiz shitsü ani. Ikemu khuu I shelo cheni keno pa ye I nguno akumtou ke, ni ye pa pukhukuqho kütsügha kighimu kuqho nike aküzüpu kumoe. Pa no Aghungu Kimthe eno ami pesü nongu baptiz shitsü nani.

¹⁷ Paw fuleve kepu thigha ye pa u lo ani, eno pa no pa niqa shikimtheve püzü pa thì pekütsü pesü ale lo sǘ nani ikemu amuu ye khilemu ghapinhe müla keu mi lono pitive nani.”

¹⁸ John no atsa kütau kutomo pesü timiqo hakutho eno atsakiviu pesü panongu lau asheshue.

¹⁹ Ikemu kughou Herod ayekipeu no pa thiküzüu nipu Herodias sasü külakupu shive keu eno kütau akümlà lhoküsa jeliqo ghenguno John no pa lomipiqhi keno,

²⁰ Herod no hipaqo kümtsü kihiküqha no: pa no John akughuki lo khathave.

Jisü Baptiz Shikeu eno Paw Laghaphi

²¹ Kughou timi kümtsü baptiz shive keno, Jisü ghí baptiz shilue. Pa no akighini shi akelo, kungugha khaqhie,

²² eno Aghungu Kimthe ampi no miqhedu lakhi toi ighino pa shou iku ngove. Eno kungugha lono asütsa lakhi ighi: “No ye I no qhuivü chekeu, I nu ke; O shou I mlokiqi achenie.”

²³ Kughou Jisü no pa kümlà huthu keno, pa ye apunu mpe shighi qhalo shi ake. Timiqo ye ishi kümsü ae, pa ye Joseph nu, Heli nu,

²⁴ Matthat nu, Levi nu, Melki nu, Jannai nu, Joseph nu,

²⁵ Mattathias nu, Amos nu, Nahum nu, Esli nu, Naggai nu,

²⁶ Maath nu, Mattathias nu, Semein nu, Josek nu, Joda nu,

²⁷ Joanan nu, Rhesa nu, Zerubbabel nu, Shealtiel nu, Neri nu,

²⁸ Melki nu, Addi nu, Cosam nu, Elmadam nu, Er nu,

²⁹ Joshua nu, Eliezer nu, Jorim nu, Matthat nu, Levi nu,

³⁰ Simeon nu, Judah nu, Joseph nu, Jonam nu, Eliakim nu,

³¹ Melea nu, Menna nu, Mattatha nu, Nathan nu, David nu,

³² Jesse nu, Obed nu, Boaz nu, Salmon nu, Nahshon nu,

³³ Amminadab nu, Ram nu, Hezron nu, Perez nu, Judah nu,

³⁴ Jacob nu, Isaac nu, Abraham nu, Terah nu, Nahor nu,

³⁵ Serug nu, Reu nu, Peleg nu, Eber nu, Shelah nu,

³⁶ Cainan nu, Arphaxad nu, Shem nu, Noah nu, Lamech nu,

³⁷ Methuselah nu, Enoch nu, Jared nu, Mahalalel nu, Kenan nu,

³⁸ Enosh nu, Seth nu, Adam nu, ti Alhou nu.