Luke 24 - Sümi Tiqhelimi Bible

Jisü ye Xüchilethuvae

¹ Apine tsalà atüghiu lo, inaqhe itheno totimiqo ye panongu no axokütsüngü kutò pe püakeu pesü akumoki lo wue.

² Panongu no akumoki lo atu tukulove aghí keu ithulu,

³ ikemu kughou panongu no alou iloghi keno, panongu ye Ampeu Jisü sükumo ithumlae.

⁴ Panongu no hipau ghenguno avehu izüqhiyi akelo paikhavi lono timi kini tsütsüpha toi yevüqai keu phimini pepu püzü panongu phivilo puthugho aghíe.

⁵ Totimi pama ye msà kelau no pama gi ayeghi lo pishiqho pe ngove, ikemu timi hu no pama vilo pi, “Nongu ye kushiye kithimi gholo küxümi phu cheni kea?

⁶ Pa ye hile kühae; pa ye xüchilethuvae! Pa no Galilee lo nongu gholo aphi lono kíshi nongu vilo pi keno kümsülulo:

⁷ ‘Timi Nu ye axinemiqo u lo phesüve tsü moayesae, pa ye yeda pìthíve no aküthüni ye xüchileputhuve nani.’ ”

⁸ Tile no panongu no pa tsaqo kümsüchilelu.

⁹ Kughou panongu no akumoki lono idechile ighi keno panongu no hipaqo kümtsü pesü akhopemi chighiqhaqhi eno kütamiqo kümtsü vilo pive.

¹⁰ Tiye Mary Magdalene, Joanna, James pazá Mary eno kütami panongu gholo akemiqo no hipaqo pesü apostolmiqo vilo pike.

¹¹ Ikemu panongu ye totimiqo pülübemoe, kughengu totimiqo tsa ye panongu ghenguno akiqi küha ketoi kümsüve.

¹² Tishi akelo Peter ye ilheithu akumoki lo posü wuve. Pa no itsaqi no ju kelo phephei keu phì kushuwa likhi tile aghí, ike pa ye idewove eno kiu shive keno pa vehu izüqhiyi auve.

Emmaus Là lo che kelo

¹³ Tipau tsalà lo mikini ye Emmaus ipikeu aphu lakhi lo wuche, tiye Jerusalem lono kilometer chighiqhaqhi qhalo ke.

¹⁴ Pama ye lakhi no lakhi vilo kiu shive keno tipau ghili kümtsü pikile ghi che.

¹⁵ Ike pama no hipaqo vehu pama dolo küptsa eno küsajekile ghi che kelo Jisü ampi no ighino pama gholo alà cheche wuve,

¹⁶ ikemu pama pelo pa michilu pemo no cheke.

¹⁷ Jisü no pama vilo iniju, “Nokujo ye alà che ghi kiu küptsa chenia?” Pama ye agi khümüyi inaqhoi puthugho pe ngove.

¹⁸ Pama dolo Cleopas ipikeu no Jisü vilo iniju, “Jerusalem xuju wu kemi dolo O likhi no ishi dolo tilau kiu shivea keno mtha no ani keo?

¹⁹ “Kiu shivea kea?” ipi Jisü no iniju. Pama no khochile, “Nazareth nó ghami Jisü ghili. Pa ye tungkupumi lakhi eno pa ye Alhou eno timi kümtsü zülo atsa eno akümlà lo akümzapu küká akemi ke.

²⁰ Achinetomi eno ninguw ayekipemiqo no pa pìthíve penike ikhiphe pe tsüve, eno panongu no pa yeda pìthíve;

²¹ ikemu ningu ye Israelmi xaphe niye akeu ye pa ke ipi laju ake. Tinguno alau, tipaqo kümtsü shive keu hi atsala aküthüu shi anie.

²² Hipau gholo niqomi totimi khami no ningu shikümsa püani. Panongu no isüna inaqhe itheno akumoki lo wu,

²³ ikemu panongu ye pa sükumo phumlave. Tisheno panongu no ideighi no ningu vilo pikeu ye panongu ye kungunhetsü lono kungumiqo ithulu püzü kungumi no pikeu ye, pa ye xü aphi ipi ke.

²⁴ Ike ni küsàmiqo khami no akumoki lo wuju kelo totimiqo no pikeu toi tishi aghíe, ikemu panongu ye Jisü ithumlae.”

²⁵ Jisü no panongu vilo pi, “Nongu ye kiutoi nikhanigha kea, eno tungkupumiqo no pikeu kümtsü lo pülübe nikeu lo nongu ye kiutoi akuchhoma shi kea!

²⁶ Messiah ye hipaqo kümtsü ime no pa juküvü lo ilo nikeu shike kumo keshea?”

²⁷ Tisheno pa no Moses lono huthu no tungkupumiqo no Kuchoyesü lo pa ghili kiu pipüani keno pesü chixechilei pama vilo pitsü.

²⁸ Pama no wuche keu aphu kupunúve kelo Jisü ye tinguno alau izüwu niye ake toi wuve.

²⁹ Ikemu pama no tsümomo pa lakha ghi pi, “Ningu gholo ngove lo kughengu itehi ye avelau shivea eno tsüzüveni chea ke.” Ikehu Jisü no pama gholo ngove nikeu shive.

³⁰ Kughou pama gholo alibe chu niye iqa keno Jisü no asho ikhilu eno shikimthi Alhou tsü no asho süpho püzü pesü pama tsüe.

³¹ Tile no pama nhethi xukhove eno pama ye Jisü michiluve, ikelo Jisü ye pama nhekithe lono hauve.

³² Pama no lakhi no lakhi vilo pi, “Kughou pa no alà lo nikujo pütsa eno Kuchoyesü lhepe nikujo pìye keno nikujo mlo lo lüvüi ighike kumo keshea?”

³³ Pama ye ilheithu no paikhavi Jerusalem lo idechile ighive. Ikelo tile panongu Chighiqhaqhi no panongu gholo akemi sasü kumqo no ishi pi aghí keu ithulu,

³⁴ “Hiye kuchoue! Ampeu ye xüithuvae eno Simon lau ipeghi pìyevae.”

³⁵ Ikehu pama no alà lo che kelo kiu shive eno Jisü no asho süpho ke lono pama ye kíshi Jisü michilu keno lhepe pìye.

Jisü no Akhopemiqo lau Ipeghi

³⁶ Pama no hipau ghili piaphi lono Jisü ampi no panongu gholo puthughove no panongu vilo pi, “Aloino keu nongu gholo apeniu.”

³⁷ Panongu ye aghawu ithulu ani küghashi kümsüve no kutuxoxo eno kichi-mamaive.

³⁸ Jisü no panongu vilo pi, “Nongu ye kushiye amlo küpüna ani kea, eno kushiye nongu kükümsü lo lipi ani kea?

³⁹ I u eno I pukhu julo. Hiye ni ke! I bu no julo; aghawu lakhi ye ashi eno aghì puchemoe, eno nongu no ithulu ake toi ni ye ashi eno aghì pù anie.”

⁴⁰ Pa no hi pive kethiu, pa u eno apukhu panongu pìye.

⁴¹ Eno tishimu panongu no alokivi eno akümza kelau no pülübe müla no auve kelo pa no panongu vilo iniju, “Nongu ye hile kiuala chu kepu anima?”

⁴² Panongu no ami no püghave keu akha aleqhi lakhi pa tsü,

⁴³ ike pa no tipau ikhilu no panongu nhekithe lono chuve.

⁴⁴ Pa no panoqo vilo pi, “I no nongu gholo aphi lono hipau nongu vilo pivae: Moses Yeza, Tungkupumi eno Lesheleqo lo I ghili yèpüa keu kümtsü shikupu moayesae.”

⁴⁵ Tisheno pa no panoqo pelo Kuchoyesü ithikuthulu penike panongu kükümsü khaqhi tsü.

⁴⁶ Pa no panoqo vilo pi, “Kiu yèpüani keno tiye hike: Messiah ye ime nani eno aküthüni ye akithí lono xüchilethuve nani,

⁴⁷ eno Jerusalem lono huthu no shiye kümtsü lau pa je lono amlo pebide eno axiné qhivetsü keu sütsa pesü asheshu nani.

⁴⁸ Nongu ye thime hipaqow thopimiqo ke.

⁴⁹ I pù no kiu piqhipüani keno I no nongu lau puwu nani. Ikemu nongu ye kunguu no aküka nongu shou ikughi moke kutólo mishighüna lo ngo aghílo.”

Jisü Kunguu Saikuve keu

⁵⁰ Kughou Jisü no panongu sasü Bethany kupunú lo wu keno, pa no pa u peqhe püzü panongu kümgha tsü.

⁵¹ Pa no panongu kümgha tsü ghi panoqo qhive, eno pa ye kunguu saikuve.

⁵² Tisheno panongu no pa müláe eno alokivi kijè lono Jerusalem lo idechile wove.

⁵³ Eno panongu ye tamo no Alhou sheqhe ghi achineki lo ngove.