Luke 22 - Sümi Tiqhelimi Bible

Judas no Jisü Thechu Shive nike Pulove

¹ Ike Kholaqhi sümo keu Sho Tiqhitini ipi no Hechekulu ghulhu shi chekeu kupunú ighive,

² eno achinetomi eno ayeza kükütsümiqo ye kíshi no Jisü pìthíveni keno alaghi hami phuju ae, kughengu panongu ye timiqo msà ake.

³ Ikelo Satan no Chighikini dolo lakhi Judas Iscariot ipi chekeu lolo ilove.

⁴ Eno Judas no achinetou ngò achineki khemiw hiyampemiqo lau wu püzü pa ye kíshi no Jisü thechu shiveni keno küptsae.

⁵ Panongu ye ighono alokivishive püzü pisa pa tsü nikeu pulove.

⁶ Judas ghí puloküqhave, eno pa ye aqokitikhi küküha lono Jisü pesü panongu u lo sǘvetsü niye adokivi miqeauve.

Ashekhau Ghulhu

⁷ Ikelo Hechekulu ghulhuw ambeti ghiqhi pe akümlagho shi no Kholaqhi sümo keu Sho ikhilu chekeu tsalà ighive.

⁸ Tile Jisü no Peter ngò John puwu no pi, “Wu püzü ningu no Hechekulu ghulhu chuni keu kutò lo.”

⁹ Pama no iniju, “No ye ikujo pelo Hechekulu ghulhu chuni ke ghenguno khile kutò penishi ani kea?”

¹⁰ Pa no khochile, “Nokujo no mishighüna lo ilo kelo timi lakhi alikoli lo azü xapusü nokujo sasü kusho nani. Pa no ilo keu ki lo pa papesü wulo,

¹¹ eno aki mpeu vilo ishi pilo, ‘Akükütsüu no ishi iniju ani: I no I khopemiqo sasü Hechekulu ghulhu chuni keu chebo khilehi ani kea?’

¹² Pa no aki jolha kunguu achebo kijè mülaqhi püakeu nokujo pìye nani. Tipa-a lo kutokughoi lo.”

¹³ Pama no wu kelo Jisü no pikeu toi thowkha tishi ithulu. Ikehu pama no Hechekulu ghulhu kutoe.

¹⁴ Kughou ado tove keno Jisü no apostolmiqo sasü aghulhu lipa lo iqae.

¹⁵ Eno pa no panongu vilo pi, “I no aghime shimphi lono ni ye nongu sasü Hechekulu ghulhu hipau ighono chuni shiqhiyi ake.

¹⁶ Kughengu I no nongu vilo pìní, Alhou kükaphu lo hipau shikupuve mphi kutólo ni ye khilemu hipau ghulhu chulumae.”

¹⁷ Tisheno Jisü no ajikhu ikhilu no shikimthi tsü ghi pi: “Hi ikhilu no nongu dolo kijélu lo.

¹⁸ Kughengu I no nongu vilo pìní, Alhou kükaphu ighimo ke kutólo ni ye atsaithi lono atsaizü ipeghi keu sholumae.”

¹⁹ Tisheno, pa no asho ikhilu no shikimthi tsü püzü süpho pe panongu tsü ghi pi, “Hiye I phimpi nongu ghenguno tsüve keu ke. I kümsüchilelu ghi hi shichelo.”

²⁰ Tipau gholau no aghulhu chuve kethiu pa no ajikhu ikhilu no pi, “Ajikhu hipau ye I jì vechewo puloshoqhi akitheu shiluve keu ke eno hiye nongu ghenguno peleve keu jì ke.

²¹ Ikemu I küghape thechu shiveni akeu u ghí I gholo aghulhu lipa lo anie.

²² Timi Nu ye kughupüa ketoi thive nani. Ikemu pa thechu shive keu tipau ghengu ye ahaküsapue!”

²³ Tile panongu likhi panongu dolo no khuu no hi shini cheni kela pi kighinikile thuve.

²⁴ Panongu dolo khuu no akijeu shi nani kea ipi kütsala ipeghive.

²⁵ Jisü no panongu vilo pi, “Jewkumomi kükamiqo no panow timiqo shou ampeu shi cheni; eno khunoqo no timiqo shou kükagha peitha cheni keno pano likhi pano pesü timi kukuphuu ipi ku cheni.

²⁶ Ikemu nongu ye tishi kepu kumoe. Tishini ke züqhulo nongu gholo akijeu no akitilau toi moayesa, eno khuu no ayè pe ani keno pa ye aqeu toive moayesae.

²⁷ Kughengu khuu no akijeu kea, aghulhu lipa lo iqa akeu no keo pa lojí akeu no kea? Aghulhu lipa lo iqa akeu no kumo keshea? Ikemu ni ye nongu gholo lokijimi lakhi toi acheni ke.

²⁸ Nongu ye iw shiluküsa peju keu kümtsü lo I gholo ngo ighivae.

²⁹ Eno I pù no akükaphu I tsü keu toi I no akükaphu nongu tsü anie,

³⁰ tishianguno nongu ye I kükaphu lo I gholo kümtsa chu-sho nani, eno aküka lakhü lo iqa no Israel lagha chighikini shou xakütha shi nani.

³¹ “Simon, Simon, Satan no amuu fuleve ketoi nongu kümtsü peju nike khuluvae.

³² Ikemu Simon, O küpülü iqeve pemo nike I no O ghenguno inikhuve tsüae. Eno kughou nono ideghiveni keno O thiküzümiqo shikumtolo.”

³³ Ikemu Simon no khochile, “Ampeu, ni ye akughuki eno akithí kutólo O gholo wuni ke kutò pe anie.”

³⁴ Jisü no khochile, “Peter, I no O vilo pìní, awudu no ishí tsalà lo igha mphi züu no no ye ghuthu küthü I milive nani.”

³⁵ Tisheno Jisü no panongu vilo iniju, “Kughou I no nongu pelo pisabo, jolabo eno apukhukuqho pumò no wupe keno nongu ye athokha shive keshea?” “Athokha shimoe,” ipi panongu no khochile.

³⁶ Jisü no panongu vilo pi, “Ikemu itehi ye tsalá nono pisabo aghí aye ti pelo eno jolabo ghí pelo; eno nono akihizüta küha aye ubephi jeve püzü lakhi qhüluve lo.

³⁷ Ishi yèpüani, ‘Pa ye ayeza hekibidemiqo gholo kihisüve’; eno I no nongu vilo piakeu toi hiye I lau no shikupuve moayesae. Iyei, I ghenguno kiu yèpeqhi keno shikupuveni cheae.”

³⁸ Akhopemiqo no pi, “Ampeu julo, akihizüta kini hi anie.” “Tiye lumkhae!” ipi pa no khochileve.

Olive Naghuto lo Jisü no Inikhu

³⁹ Thosülo toi Jisü ye Olive Naghuto lo wu eno pa khopemiqo ghí pa pape wue.

⁴⁰ Kughou a-a hu tolu keno Jisü no panongu vilo pi, “Nongu ye ghukuju lo ikiqimo nike inikhulo.”

⁴¹ Tisheno pa ye panongu lau no putosü lo kütümo no wu püzü qhoqhünhe pe ishi inikhu,

⁴² “Apùo, nono pulo aghí aye aghime jikhu hipau I lau no pesü wuve tsülo; tishimu I pulou kumoe ikemu O pulou shitsünie.”

⁴³ Kungugha lono kungumi lakhi pa lau ipeghino pa shikumto tsüe.

⁴⁴ Amlo kughuju kijè lau no pa no alau thümüyi inikhu eno tishikehu pa tsünhizü no ajì mqo kighiji hutoi ayeghi lo ìji iqie.

⁴⁵ Kughou pa no akighini shia püzü akhopemiqo lau ideighi keno panongu ye amloghime lau no akulhoshive püzü zü aghive keu ithulue.

⁴⁶ Ike pa no panongu vilo pi, “Nongu ye kushiye zü ani kea? Ithuvelo eno ghukuju lo ikiqimo nike inikhulo.”

Jisü Küghaluve

⁴⁷ Pa no atsa piaphi lono timi aqokitikhi lakhi ighive, eno akhopemi chighikini dolo lakhi Judas ipikeu hu no panongu sasü ighi. Pa no Jisü müma niye kupunú ighi,

⁴⁸ ikemu Jisü no pa vilo iniju, “Judas, no ye ghuthu lakhi müma keu pesü Timi Nu thechu shive ani keshea?”

⁴⁹ Kughou Jisü pape chekemiqo no kiu shive niye ani keno ithive kelo, panongu no pi, “Ampeu, ninguw akihizüta pe panongu küsaveni keshea?”

⁵⁰ Eno panongu dolo milakhi no achinetomiqo shou atou qeu shou ghipuku no pa kìní küsave tsü.

⁵¹ Ikemu Jisü no ishi pi, “Hikithipu shi kevilo!” Eno Jisü no timi tipau kìní bu tsü püzü pa shipivive.

⁵² Tisheno Jisü no achinetomi, achineki khemiw hiyampemi eno kichimi khunoqo pa kügha niye ighi keno tipaqo vilo pi: “Ni ye ayeza hekibidemi mqo sache ghí kepu toi nongu ye kushiye akihizüta ngò asüthaluqo pesü I kügha niye ighi ani kea?

⁵³ Ni ye nongu gholo tsalà kipetsü achineki khalau achemu nongu lakhimu I shou au bupukumoe. Ikemu hipau tüqhüdo ye nonguw ke tiye àküzǘ no ka nikeu ke.”

Peter no Jisü Milive

⁵⁴ Tisheno panongu no Jisü küghaluve püzü pa sasü achinetou ki lo wuve. Peter ye putou no pape che.

⁵⁵ Eno tilehi timi khami no aki khala mtá lo ami shipepüa eno ami sümxa pe iqa akeqo gholo Peter ghí iqa ae.

⁵⁶ Aqeliu lakhi no Peter no ami phivilo iqa akeu ithulu. Li no tsaqüi pa ju no pi, “Timi hipau ghí Jisü gholo cheke.”

⁵⁷ Ikemu Peter no li lachile ghi pi, “Totimio, ni ye pa mthae.”

⁵⁸ Ado kitila thiu timi khami no pa ithulu no pi, “No ghí panongu gholo lakhi ke.” Peter no khochile: “Timi ghí lai, ni ye kumoe!”

⁵⁹ Ayì kihedo lakhia thiu kütami no pülübeyi shi no pi, “Timi hipau ye mütsüqhei no Jisü gholo ae, kughengu pa ye Galileemi ke.”

⁶⁰ Ikemu Peter no khochile pi, “Timi ghí lai, nono kiu piani keno ni ye ithi amoe!” Pa no atsa piaphi lono awudu no ighae.

⁶¹ Ampeu no athiu jupuwo püzü vejoi Peter ju. Tile Peter ye Ampeu no pa vilo ishi pipüa keu tsa kümsüchilelu: “No ye ishí awudu no igha mphi züu ghuthu küthü I milive nani.”

⁶² Eno Peter ye khalau ipeve no kunotshütshü shi qa auve.

Ghükhemi no Jisü Thaigha

⁶³ Timi khunoqo no Jisü khe akeno panongu no Jisü thaigha eno heqhi thuve.

⁶⁴ Panongu no pa nhethi khave tsü eno pa vilo, “Khuu no O he ani keno tungkupumi toi piveju lo?” ipi iniju.

⁶⁵ Panongu no pa thaigha keu tsa jeli kütau kutomo pe pa vilo piae.

Jisü no Pilate ngò Herod Zülo Puthugho

⁶⁶ Kughou inaqhe vüipeghi keno Jewmi ampemi kichimiqo; achinetomi eno ayeza kükütsümiqo kinikujo aqoshi kusho, eno Jisü panongu zülo saipeghi.

⁶⁷ Panongu no iniju, “Nono Messiah shi aghí aye ningu vilo pilo.” Jisü no khochile, “Tsalá I no nongu vilo pi aye nongu no I pülümo nani,

⁶⁸ eno tsalá I no nongu vilo iniju namu nongu no khochilemo nani.

⁶⁹ Ikemu hinguno hilau ye Timi Nu ye Alhou akughushuu u ajeu küdau küghüqave nani.”

⁷⁰ Panongu kümtsü no iniju, “Imaye no ye Alhou Nu keo?” Jisü no khochile, “Ni ye tike ipi nongu no pivae.”

⁷¹ Tisheno panongu no pi, “Ningu ye kushiye hinguno alau thopi avehupu shi aní kea? Ningu no pa likhi pa kichí lono pikeu chiluvae.”