Luke 17 - Sümi Tiqhelimi Bible

Axiné, Aküpülü, eno Akümlapu

¹ Jisü no pa khopemiqo vilo pi, “Timi pelo axiné lo ilove pe nikeu thimeqo ye ighini pütsa, ikemu khuno vechewo tipaqo ighini keno panongu ghenguno ahaküsapue.

² Timi khukhumu hi kitilaqo gholo milakhi pelomu axiné lo ilove pe aye panongu kuwo homüxa athì kütsüghǜ tuqu tsüghave no ayizü lo vesüve keu pavie.

³ Tighenguno O likhi O jukuto lo! “Tsalá nongu thiküzümi momu nongu chelimiqo no nongu lau akipimí shive aye panongu lomipi lo; eno tsalá panongu no amlo pebide aye panongu kipimí qhitsülo.

⁴ Panongu no atsala lo ghuthu tsünì nongu shou axiné shive no axiné shikeu kümtsü lo ideighi no ‘I kipimí qhitsülo,’ ipi nongu vilo pi aghimu nongu ye panongu kipimí qhitsü moayesae.”

⁵ Apostolmiqo no Ampeu vilo pi, “Ni küpülü kighishe tsülo.”

⁶ Jisü no khochile, “Nongu aghane thi pahi likhimu aküpülü aghí aye, nongu ye militasübo hipau vilo, ‘O kuhu lono O likhi O süjo pesü ayizü lo shosüve lo,’ ipi pilu nani eno tino nongu gholu nanie.

⁷ “Kümsüju kelo nongu lakhi gholo aqeu lakhi no alu hokide momu ambe jukutoa no kughou pa no alu lono ideghini keno pa ye aqeu vilo, ‘Mtazü ningu gholo iqa no ana chulo,’ ipi nani keshea?

⁸ Tishini ke züqhulo pa ye, ‘I ghenguno alibe kutólo, O ghili kutò püzü I no chuqu-kusho shiqhimo ke kutó I lojí lo, eno no ghí tithiu no chu-sho kepu shilo,’ ipi nani ke kumo keshea?

⁹ Aqeu no aghokulu shi kiu shilo pi keno shikeu ghenguno pa ye shikimthi nani keshea?

¹⁰ Titoi kughou nongu vilo azah tsü keu kümtsü shive kethiu nongu ghí ishi pi kepue, ‘Ningu ye aküzüpu kumo keu aqemiqo ke; ningu ye ningu kümlapù saje likhi shike.’ ”

Jisü no Apügha Kupumi Chighí Shipivi

¹¹ Jisü no Jerusalem lo wuche kelo Samaria ngò Galilee lughi dolo kicheghüzü shiche.

¹² Pa no aphu lakhi lo ilo che kelo apügha kupumi chighí no pa sasü kushoe. Panongu no putou puthugho

¹³ no ighamuku pi, “O Ampeu Jisü, ningu kimiye tsülo!”

¹⁴ Kughou Jisü no panongu ithulu keno pa no hitoi pi, “Wu no nongu likhi nongu pesü achinemiqo pìyelo.” Ikelo panongu ye wuchephi lono mitheluve.

¹⁵ Panongu gholo milakhi no kughou, pa ye vive aghí keu ithulu keno ighamuku Alhou sheqhe ghi ideighi.

¹⁶ Pa no Jisü pukhuphi lo iqi pishiqho pe ngo no pa shikimthi. Timi hipau ye Samariami lakhi ke.

¹⁷ Jisü no iniju, “Timi chighí shipivi ke kumo keshea? Pano tokú ye khile ani kea?

¹⁸ Kütami ye kíshive keno inami hipau likhi no Alhou shikimthi niye ideighi kea?”

¹⁹ Tisheno Jisü no pa vilo pi, “Ithu no wolo, O küpülü no O shipivivae.”

Alhou Kükaphu Ighi niye akeu

²⁰ Ghuthu lakhi Phariseemiqo no Jisü vilo Alhou kükaphu ye kughou no ighi nani kea ipi iniju kelo Jisü no khochile: “Alhou kükaphu ye chhejulu chekeu thime kumoe,

²¹ momu timi khunomu Alhou kükaphu ye, ‘Hilehi ani,’ momu ‘Tilehi ani,’ ipi pimo nani kughengu Alhou kükaphu ye nongu bocho lo anie.”

²² Tisheno pa no pa khopemiqo vilo pi: “Nongu no tsalà lakhi likhimu Timi Nu ithulu nishiqhiyi keu tüqhüdo ighi nani, ikemu nongu ye ti ithumla nanie.

²³ Timi no nongu vilo, ‘Pa ye hule anie,’ momu ‘Hilau anie,’ ipi nani, ikemu panongu thikhau posü wu kevilo.

²⁴ Kughengu Timi Nu ighi keu tsalà lo tsütsüpha no atsütsǘ shekha lakhi lono ashekha lakhi küdau kulo keu toi nani.

²⁵ Ikemu pa ye atüghishi shishe ime moayesa nani eno hipau tiqhelimi pelo pa milive pe nani.

²⁶ “Noah ghuloki lo toi, Timi Nu ghuloki lo ghí tishi nani.

²⁷ Noah no ashuka lo ilo ke tsalà kutólo timiqo ye chu-shoa, külakupu shia eno külakupu tsüae. Tishi ake lono züqo ighino panongu kümtsü kütsave ke.

²⁸ “Tiye Lot ghuloki lo toi nani. Timiqo ye chuqu-kusho shi, küqhü-kili shi, axa yisü eno aki shiqhepuku ake.

²⁹ Ikemu Lot no Sodom qhive ke tsalà lono atsütsǘ lono ami eno amitì tuqu ghuqhi püzü panongu kümtsü kütsave ke.

³⁰ “Timi Nu pephe-piye ke tsalà lo ghí hitoi shi nani.

³¹ Tipau tsalà lo timi khuu no pa ki kütsüqa lo ani keno pa ki alou anhemgha akeu lu niye iqighi kepu kumoe. Tihutoi, alu lo akemi khumu aki lo idewo kepu kumoe.

³² Lot nipu ghili kümsülulo!

³³ Khuno no pano likhi pano küxü süsho niye pükapütsa cheni keno pühave nani; khuno no pano küxü tsüveni keno xaluve nani.

³⁴ I no nongu vilo pìní, tipa jì lo azüa lakhi lo timi kini züa nani; lakhi sawuve no lakhi ye qhive nani.

³⁵ Totimi kini kümtsa ao shesü anani; lakhi sawuve no lakhi ye qhive nani.

³⁶ Timi kini alu lo akelo lakhi sawuve no lakhi ye qhive nani.”

³⁷ Akhopemiqo no iniju, “Ampeu, khile no tishini cheni kea?” Jisü no khochile, “Khile no akithí sükumo ani keno tilehi aluquqo no kumqo nani.”