Luke 10 - Sümi Tiqhelimi Bible

Jisü no Lhotsüni Kini Puwu

¹ Hipathiu Ampeu no kütami lhotsüni kini süküsü shilu eno kini-ni no pa züu no pa no wu niye kutò akeu mishiphu eno aqha kümtsü lo puwue.

² Pa no panongu vilo pi, “Ghile hu kepu ye kupukuno shi ani ikemu ajumi ye aghulo likhi anie. Tighenguno ghile Mpeu vilo pa lu lo ajumiqo puhu tsü penike inikhulo.

³ Wulo! Ambeti no tüngtügha gholo ilolu ake toi I no nongu puwu anie.

⁴ Pisabo, jolabo momu apukhukuqho pewu kevilo; eno alà lo khiumu sasü petha shi kevilo.

⁵ “Kughou nongu no aki lo ilo nike no, ‘Aki hipau lo aloino keu alo,’ ipi paghilo.

⁶ Aloino keu ghenguno alomsü chekemi tile aghí aye, nongu lokiqi pano shou alu nani, tishimo aye O lau idechile ighive nani.

⁷ Aki tile ngo lo, eno panongu no kiu kutotsü keno chu eno sholo, kughengu akümlà kishiu ye pa jumeqo ithulu küzü ke. Aki-aki lo homüxa itsü wu kevilo.

⁸ “Kughou nongu no mishiphu lo ilo eno timi no nongu sasü kelo, kiu pesü nongu tsü keno ti chulo.

⁹ Küsükinimi tile akeqo shipivi lo eno panongu vilo pilo, ‘Alhou kükaphu ye nongu lau kupunú ighivae.’

¹⁰ Ikemu kughou nongu no mishiphu lo ilo keno nongu sasümo aye, tipau laghila lo wu no ishi pilo,

¹¹ ‘Now mishiphu lono ni pukhu müzá lo ayeghimukhu ikughive keu ghí nongu lachile keu michi shi kukhuqhivae. Ikemu mütsümishei hi ithilo: Alhou kükaphu ye nongu lau kupunú ighivae.’

¹² I no nongu vilo piani, küghakütha tsalà lo mishiphu tipau ye Sodom nguno alau aghime ithulu nani.

¹³ “Chorazin! O ghenguno ahaküsapue, Bethsaida! O ghenguno ahaküsapue, kughengu tsalá akümzapu kümlà nongu gholo shikeu Tyre eno Sidon lo mülà ke aye, panongu ye yeqhiyephi pepu püzü ayevǜ kuchhu no khaghi no amlo pebideve aghíni cheke.

¹⁴ Ikemu küghakütha tsalà ghuloki lo Tyre ngò Sidon nguno alau mishiphu tipau ghimeqhi nani.

¹⁵ Eno O Capernaum! No ye O pesü atsütsǘ kutólo süqhe iku niye keshea? Moe, no ye Hades lo iqive nanie.

¹⁶ “Khukhumu nongu tsa ini akeu ye I tsa ini anie, eno khukhumu nongu milive akeu ye I milive anie; ikemu khukhumu I mili kemi ye I no puwu akemi milive anie.”

¹⁷ Lhotsüni kini hu no alokivishi ideighi no pi, “Ampeu, tüghaküsaqo ghí O je vechewo ningu qhoqhüe.”

¹⁸ Pa no khochile, “Tsütsüpha toi atsütsǘ lono Satan ikiqi keu I no ithulue.

¹⁹ I no nongu pelo apighi, achuwa pazá, eno aghümi küká kümtsü shou qodalu pe nikeu kükagha tsüvae; kiunomu nongu ghüzamo nani.

²⁰ Tishi namu, aghawuqo no nongu qhoqhü keu lo alovi akevilo, ikemu nongu je atsütsǘ lo yèpüa keu ghenguno alovishe alo.”

²¹ Tipau tüqhüdo lo Aghungu Kimthe vechewo alokivi pesü Jisü hupite tsü, eno pa no ishi pi, “Atsütsǘ eno ayeghi Mpeu, Apùo, I no O sheqhe ani, kughengu nono alokütsümi eno ithisheve kemiqo lau no thime hipaqo küsüpe qhive, eno anuli itimiqo lau tipaqo pephe-piye ke. Iyei, Apùo, hitoi shikeu ye O pulou kiqi lono shikeu ke.

²² “I pù no thowkha kümtsü pesü I pichevetsüae. Apù nguno alau ye khumu Anu mthae, eno Anu nguno alau ye khunomu Apù mthae eno khunoqo lau Anu no Apù pephe-piye nike no tipaqo likhi no ithi cheni.”

²³ Tithiu Jisü no akhopemiqo lau tsüghǜ ighino lomo shi panongu vilo pi: “Nongu no kiu ithulu ani keno ti ithulu akeu nhethiqo ye müghae.

²⁴ I no nongu vilo piani, tungkupumi eno kükami kutomo no nongu no kiu ithulu ani keno ti ithulu nishi che kemu ithumlave, eno nongu no kiu chilu ani keno chilu nishi che kemu chimlave ke.”

Samariami Akiviu Holetsa

²⁵ Ghuthu lakhi ayeza lo shitsami lakhi no Jisü peju niye puthugho no iniju, “Akükütsüu, lhokta küxü ighilu nike ghenguno ni ye kiu shi moayesa kea?”

²⁶ Jisü no khochile, “Ayeza kaku lo kiu yèpüani eno no ye tile kíshi philu kea?”

²⁷ Pa no khochile, “No ye O mlo, O ngulho eno O kumto eno O kükümsü kümtsü pesü O Mpeu O Lhou kimiye lo; eno, ‘O likhi O toi O kisüghümi kimiye moayesae.’”

²⁸ Jisü no khochile, “No ye achipi shi khochilevae, hi shilo eno no ye xülu nani.”

²⁹ Ikemu ayeza kükütsüu ye pa likhi pa ye achipie pinishive kehu Jisü vilo iniju, “Imaye khuu no I kisüghümi kea?”

³⁰ Jisü no khochile ghi pi, “Timi lakhi Jerusalem lono Jericho lo iqi cheke lono süxakuchumiqo u lo ilove. Ikelo panongu no paw tiphiminiqo xalukhave, eno akithí kumlho shi pa heqhi pe qhive no wuve.

³¹ Khile no kela achinemi lakhi tipau là lo iqi che, kughou pa no timi hu ithulu keno, kughowu no müxüsü wuve.

³² Tihutoi, Levimi lakhi tipau-a lo ighi, kughou pa no timi hu ithulu keno kughowu no müxüsü wuve.

³³ Ikemu Samariami lakhi kicheghüzü shi chekeu no tipau-a lo ighino timi hu ithulu kelo ighono pa kimiyeqhiyive.

³⁴ Pa no pa lau wu püzü pa ghüzakuqo lo thazü ngò atsaizü lepuku no khave tsü. Tisheno timi hu paw khurha shou khape puku no pa sasü kicheghüzümi ki lo ighino pa tucho-mjoe.

³⁵ Tishiwo thoghiu pa no ghükayi kini ikhipe kicheghüzümi ki kheu tsüe. Eno pa vilo pi, ‘Pa tucho-mjo aghílo, nono hinguno alau puwove kepu shi namu I no ideghike lono O tsü chileve nani.’

³⁶ “Hipano küthü dolo no ye khikhiu no süxakuchumi u lo ilove keu lau akisüghümi kivi ghili pephe-piye kepi kümsülu ania?”

³⁷ Ayeza kükütsüu hu no khochile, “Kimiyekini kümlà shikeu hunoe.” Jisü no pa vilo pi, “Wu no titoi shilo!”

Jisü no Martha ngò Mary Ki lo wu

³⁸ Jisü ngò pa khopemiqo no kicheghüzü lo che kelo, pa no aphu lakhi tolu kelo totimi lakhi Martha ipikeu no li ki khaqhipe Jisü sasüe.

³⁹ Li tsünipu lakhi Mary ipikeu ye Ampeu pukhuphi lo iqa no pa no kiu pi akeno ini ae.

⁴⁰ Ikemu Martha ye mülà kepu kutomo akehu mighemghai akümlà shiae. Li no pa lau ighino iniju, “Ampeu, I tsünipu no akümlà kümtsü kulhuqhipe I tsüvea ke, no ghí jutsümo keshea? Li vilo I kuphulo pitsülo!”

⁴¹ “Martha, Martha,” ipi Ampeu no khochile ghi pi, “No ye thime kutomo kehu amlosa eno kütakihi ani,

⁴² ikemu thime lakhi likhi avehupu shi ani. Mary ye kiu no akiviu keno ti kisheluvea, eno tiye li lau no ikhisüwuve mülae.”