Luke 1 - Sümi Tiqhelimi Bible

Kilekithi tsa

¹ Timi kutomo no ningu gholo thime shikupuve keqo kihikülai yèpeqhi nikeu shiju ke.

² Inahuu thebei shi ithulu kemi eno asütsa pe veküpha kemi no kiu ningu vilo pi keno tipaqo panongu no yeluve.

³ Akiqheu Theophilus, hipau amlo lo qhi no ni ghí O ghenguno kithikiyi shi kiu shive keno yè nikeu shi xathaluvae, kughengu ni ampi no tsaqütsalei abothu lono kümtsü phujukhavea ke,

⁴ tishianguno O vilo pive keu thimeqo ye kuchou kepi ithi peniye ke.

John Baptiz Kishiu Punú nikeu Ghili Azüu no Pi

⁵ Herod no Judea ghakhu lo akükau shi ake ghuloki lo achinemi lakhi Zechariah ipikeu ache, pa ye achinemi kikijé lo Abijah mqo lo ke; pa nipu Elizabeth ghí Aaron tikughuko lono ighi kemi ke.

⁶ Pama kinikujo Alhou zülo amikucho shi xüche eno Ampeu zakütsü ngò ayeza kümtsü kupukülai shi pape chekemi ke.

⁷ Pama ye anu küha kughengu Elizabeth ye anuhami eno pama kinikujo ighono kitemi shive.

⁸ Ghuthu lakhi Zachariah mqo no pano kikiphi tsalani kümlapu shia akelo Zechariah no Alhou zülo achine kümlà shiae,

⁹ pa ye achinemi kukhuaye kiqi lono Ampeu chineki lo ilo no müsüghüta piti penike asaqhi ke lono kishelu ke.

¹⁰ Eno kughou müsüghüta piti kepu do ighi keno, kumqo pesü mülá akemiqo kümtsü khalau akighini shia.

¹¹ Tilehi Ampeu’w kungumi lakhi no müsüghüta kümlá-khache ajeu küdau puthugho no pa lau ipeghi.

¹² Kughou Zechariah no pa ithulu keno pa ye akümsa no thüghüive.

¹³ Ikemu kungumi hu no pa vilo pi: “Zechariah, msà kevilo; Alhou no O kighini chiluve tsüae. O nipu Elizabeth ye anu lakhi punú nani eno no ye pa je John kütsü nani.

¹⁴ Pa ye O ghenguno alokivi eno alokiqipu shi nani, eno pa punú keu ghenguno timi kutomo no alovishe nani,

¹⁵ kughengu pa ye Ampeu zülo kijè shi nani. Pa ye khilemu atsaizü jeli momu atsaizü kümkaqo peithamo nani, eno pa ye punú mphi züu no Aghungu Kimthe no chhitoive nani.

¹⁶ Pa no Israelmi kutomo panongu Mpeu Lhou lau saideghi nani.

¹⁷ Pa no Ampeu ghenguno paw timi kutò pe qhini ke Elijah gholo achekeu küká eno ghungu vechewo apùnoqo pelo panongu nuliqo lau amlotsüqhiyilu eno agholumo kemiqo pelo achipiu lokütsü lo ighilu penike Ampeu züu no wu nani.”

¹⁸ Zechariah no kungumi vilo iniju, “Ni ye kíshi no hiye kuchou kepi ithini kea? Ni ye kichimi shivea eno I nipu ghí ampe kutomo shivae.”

¹⁹ Kungumi no pa vilo pi, “Ni ye Gabriel ke. Ni ye Alhou phivilo puthugho acheni eno I pelo O pütsa eno asütsa kivi hipau O vilo pipe nike I puwu ke.

²⁰ Eno itehi ye no ye hipau shikupumo ke tsalà kutólo atsa pimlave no inaqhoive nani, kughengu nono I tsa khikhi ado achipi lono shikupu niye ani keno tipau hu pülümo ke.”

²¹ Tishi ake dolo timiqo ye achineki khalau Zechariah khea eno pa ye kushiye achineki lo ado kushuwa ngo auvea kepi akümza ae.

²² Kughou pa no khalau ipeghi keno, pa ye panongu pütsa mülave. Panongu no pa ye achineki lo kungunhetsü ithulu kepi vethaluve, kughengu pa no pa u kulo pesü panongu pìye-a ikemu atsa pimla no ae.

²³ Kughou pa kümlà kishekhave keno pa ye aki lo idewove.

²⁴ Hipathiu pa nipu Elizabeth ye mishiluve eno li ye aqhi pungu kutó aki lo akulhoqhi auve.

²⁵ Li no pi: “Ampeu no I ghenguno mülave tsüae. Kughou pa no kimiyeqhiyi keu I shou jupuku keno tipau tsalà lono timi zülo no I kukujo ikhipeve tsüe.”

Jisü Kupunú Ghili Azüu no pi

²⁶ Elizabeth no mishí keu aqhi tsügho shi akelo Alhou no Galilee lo mishiphu Nazareth lo,

²⁷ totimi athathe lakhi lau paw kungumi Gabriel puwu. Li ye David laghami Joseph ipikeu no küsükha püa. Ayiliu je ye Mary ke.

²⁸ Kungumi hu no li lau wu no pi, “Alovilo, no ye shishe müghavae! Ampeu no O gholo anie.”

²⁹ Mary ye kungumi tsa chilu püzü shishe amlo save eno kiutoi keu lokivi sütsa shi aghí nani kea ipi akümza ae.

³⁰ Ikemu kungumi no li vilo pi: “Mary, msà kevilo. No ye Alhou mlokiqi shiluvae.

³¹ No ye mishiluve no anu lakhi punú nani, eno no ye pa je Jisü kutsü nani.

³² Pa ye kijè shi nani eno Alhou Akiqheu Nu ipi ku nani. Ampeu Alhou no papù David küká lakhü pesü pa tsü nani,

³³ eno pa no lhokta kutólo Jacob tikughukomiqo shou ka nani; pa kükaphu ye khilemu ashekha shivemo nani.”

³⁴ Mary no kungumi vilo iniju, “Ni ye ilimi lakhi shi aphike kíshi no hi shilu nani kea?”

³⁵ Kungumi no khochile: “Aghungu Kimthe no O shou ikughi nani eno Alhou Akiqheu küká no O küzüluve nani. Eno akimthe ngá punú niye shi akeu ye Alhou Nu ipi ku nani.

³⁶ No sholokumi Elizabeth ghí kitemi shivemu anu lakhi punú niye ani. Timiqo no li ye anuhau ipi cheni ikemu li ye mishí keu hi aqhi akütsüghou lo cheni.

³⁷ Kughengu Alhou lau no ighi keu tsa ye khilemu tomla keu shimo nani.”

³⁸ Mary no khochile, “Ni ye Ampeu qeliu ke, nono I lau piqhi keu tsa shikupulu peniu.” Tisheno kungumi hu no li qhive no wuve.

Mary no Elizabeth Xuju

³⁹ Tipathiu Mary no aghili kutove püzü akìmighi shi Judea ghakhu lo naghuto küdau mishiphu lakhi lo chesü wu.

⁴⁰ Eno li no Zechariah ki lo ilo no Elizabeth sasü petha shi.

⁴¹ Kughou Elizabeth no Mary sasü petha shi keno li po lo angá no pakütashi ithae, eno Elizabeth ye Aghungu Kimthe no chhitoive.

⁴² Li no asütsa müghachhoi keu lono pi: “No ye totimiqo dolo akümghau ke, eno O po lo angá mishí niye akeu ye akümghapue!

⁴³ Ikemu ni ye khuu kepi I mpeu pazá pelo I lau ighi pe kea?

⁴⁴ Nono petha shikeu sütsa I kini tove kemtsa I po lo angá no alokivi lau no pakütashi itha ke.

⁴⁵ Totimi khuu no Alhou no paw tushokiqhiqo li lau shikupu tsüní ipikeu lo pülü keno li ye müghae!”

Mary le

⁴⁶ Mary no pi: “I ngulho no Ampeu sheqhe ani,

⁴⁷ eno I ghungu no I Xakulu Lhou lau alovishe ani,

⁴⁸ Kughengu pa no paw aqhokigheu qeliu kümsülue. Hinguno hilau ye tiqhelimi kümtsü no I vilo akümghau ipi kuniae,

⁴⁹ kughengu akumto Lhou no I ghenguno akümlà kijè mülave tsüae, pa je ye akimthe ke.

⁵⁰ Pa sümsa kemi kümtsü shou tiqheli no tiqheli kutó kimiye keu pìye cheni.

⁵¹ Pa no Pa kumto u chhopuwo no akümzapu kümlà mülae; pa no akükümsü lo qheza chekemiqo apanaghave tsüe,

⁵² pa no ayekipemiqo panongu küká lakhü lono ikhiqhive, ikemu aqhokighemi sünheqhepuku ke.

⁵³ Pa no thime kivi pesü müzüthi kemi aghapiqi tsü, ikemu kiními au kümsá puwuve.

⁵⁴ Pa no küpüqhiyi nikeu kümsülu no pa qeu Israel kuphu ke

⁵⁵ Pa no nipù-asü vilo tushoqhi püakeu toi Abraham eno pa tikughukomi lau pülhapuju küpüqhiyi ke.”

⁵⁶ Mary ye Elizabeth gholo aqhi küthüa toi keu ngoa eno tithiu aki lo idewove.

John Baptiz Kishiu Punu

⁵⁷ Elizabeth no angá punú kepu do tove kelo, li no anu lakhi punú.

⁵⁸ Li kisüghümi eno abolomiqo no Ampeu no akümzapu li lau mülà keu chilu no panongu kümtsü li gholo alovi küqhae.

⁵⁹ Atsala tache thiu panongu no aphighüyiko-küghá ghenguno anu sasü ighi, eno panongu ye papù je paphi shi pa je Zechariah kutsü niye shiae,

⁶⁰ ikemu pazá no pi: “Moe! Pa je ye John ipi kunie.”

⁶¹ Panongu no li vilo pi: “No sholokumi dolo aje titoi keu lakhimu küha aphie.”

⁶² Tithiu panongu no au kukulo lono papù vilo anu je khuu kutsü penishi ani kea ipi iniju.

⁶³ Zachariah no yèpuku kepu atupha lakhi khu, eno pa no ishi yè, “Pa je ye John.” Ikelo panongu kümtsü no akümzave.

⁶⁴ Tipa mtsa Zachariah kichí eno amili xukho kitheluve eno pa no Alhou sheqhe ghi atsa pithuve.

⁶⁵ Tipa qhalo akemi kümtsü no akümzave eno Judea yeghi lo naghuto lo aphu akeqo kümtsü lo timiqo no hipau ghili kügha wove.

⁶⁶ Hi chilu kemi kümtsü no akümzave eno panongu no ishi iniju ghi pi, “Tishiaye anu hipau ye kiu shi nani kela?” Kughengu Ampeu küká no pa gholo ae.

Zachariah le

⁶⁷ John papù Zechariah ye Aghungu Kimthe no chhitoive no tungkupu tsa hitoi pi:

⁶⁸ “Israel Lhou Ampeu sheqhelo, kughengu pa no paw timiqo lau ighino panoqo xachilelu ke.

⁶⁹ Pa no pa qeu David lagha lono ningu ghenguno xakulu kükau kijè süqhe tsüke

⁷⁰ (pa no püzüu paw akimthe tungkupumi vechewo pipüa ke),

⁷¹ pa no ni ghümi eno ni mithi chekemi kümtsü lau no xaphelu nani—

⁷² tiye nipù-asü lau küpüqhiyi keu pìye niye ke, eno pa kimthe shoqhi kümsüchilelu niye ke,

⁷³ ashoqhi tiye pa no ningu papù Abraham lau shikeu ke.

⁷⁴ ni ghümi lau no ni xaphelu niye, eno ningu pelo msàmo no

⁷⁵ aküxü kupuju akimthe eno amikucho shi pa qe peniye ke.

⁷⁶ “Eno I nu, no ye Alhou Akiqheu wu tungkupu lakhi ipi ku nani; kughengu no ye Ampeu züu no pa laghi ghepe qhini ke wu nani,

⁷⁷ tiye paw timiqo lau axiné qhikütsü vechewo xakulu kighithi tsü niye ke.

⁷⁸ Kughengu Alhou’w kimiyeqhiyi keu vechewo kungugha lono khetsünhe ningu lau ighi nani

⁷⁹ tiye àküzǘ yeghi lo xü akemi eno akithí yekükhü lo akemi, ni pukhu nepa kichesü aloino keu là lo sawu nikeu ghenguno ke.”

⁸⁰ John ye mutotoi thuwuve eno aghungu küxü lo mutotoive; eno pa ye Israelmi aqha zülo pephe-piyemo ke tsalà kutólo küghünamokeu-a lo xüache.