Kolosiami 4 - Sümi Tiqhelimi Bible

¹ Ampemiqo, nongu qüaxemiqo lau achipi eno amikucho shilo, kughengu nongu no ithi akeu toi nongu Mpeu ghí kungugha lo anike.

Shikakütsü Alau

² Tamo no inikhulo, jukutokughoi lo eno Alhou shikimthiqhiyi alo.

³ Eno Alhou pelo atsakiviu ghenguno ningu laghi khaqhi tsü penike ningu ghenguno ghí inikhu tsü alo, tishianguno ningu pelo Khristo’w tuqhou ghili pesü asheshulu pe kepu shi, kughengu ni ye hi ghenguno akughuki lo anike.

⁴ I no shi moayesa akeu hutoi, mütsümishei asheshulu penike I ghenguno inikhu tsü alo.

⁵ Alhou pülümo kemi gizülo nongu ye alokütsü shi no xü pìyelo; eno adokivi ithukulu kümtsü akivishi peitha lo.

⁶ Nongu tsapi lo alhokuthu küpükini no chhitoi shi no jumghai shilo, tishianguno nongu ye kíshi timiqo kümtsü khochilelu moayesa keno ithi peniye ke.

Ashekha Petha

⁷ Tychicus no nongu vilo I ghili kishékulu pitsü nani. Pa ye ningu no kimiye chekeu athiküzüu, pükhübekulu qeu eno Ampeu lono qe küqha akemi lakhi ke.

⁸ Nongu pelo ningu ye kiu tüqhüdo lo ani keno ithi peniye eno pa pelo nongu mlo shikumto tsüpe nikeu kimiji lono ni ye pa pesü nongu lau puwu ani.

⁹ Tychicus ye athiküzüu Onesimus khuu nonguw timi eno ningu no pülübe eno kimiye acheni keno, pa gholo no cheni. Hilau kiu kíshive ani keno thowkha kümtsü panongu no nongu vilo pi nani.

¹⁰ I gholo akughumi shi akeu Aristarchus no petha nongu tsüpuwu ani, eno titoi Barnabas nó bolomi Mark ghí petha tsüpuwu ani. (Nongu vilo Mark ghili ashe-azü shi kichevetsü akehu tsalá pa no nongu lau ighi aye, pa sasǘ lo.)

¹¹ Jisü (Justus ipi ku chekeu) ghí petha nongu tsüpuwu ani. Alhou kükaphu ghenguno Jewmiqo dolo I gholo mülà küqha akemi ye panongu likhi ke, eno panongu ye shishe I lokughuno tsü acheni ke.

¹² Epaphras khuu Khristo Jisü qeu lakhi eno nongu gholo kuposhu ache keno pa ghí petha tsüpuwu ani. Pa ye pülhapuju nongu ghenguno pulopiniyi inikhu acheni, tiye nongu pelo thowkha kümtsü lo Alhou pulou shilu no ithamo püzü tekhoi eno mütsüqhei shi puthugholu peniye ke.

¹³ Ni ampi no Epaphras ghenguno ashepe shitsü ani, ike tiye pa ye Laodicea eno Hierapolis lo akemiqo eno nongu ghenguno shishe akümlà shi achenie.

¹⁴ Ningu no kimiye chekeu shikipiviu Luke ngò Demas pama ghí petha tsü ani.

¹⁵ Iw petha pesü Laodicea lo athiküzümi eno achelimiqo eno Nympha eno li ki lo kuho chekemiqo lau küsaje tsülo.

¹⁶ Nongu lau yèsü hipau phisüve kethiu Laodiceami kukuho lo ghí phisü pìye kepu shilo eno nongu ghí I no Laodicea lau yè keu yèsü nongu lau ighi nani ke tipau phisü kepu shilo.

¹⁷ Archippus vilo ishi pilo: “No ye Ampeu no pichebekümlà O tsü keu hu shikhave moayesa nani kepi ithilo.”

¹⁸ Ni Paul ampi no petha hipau yè ani. Ni ye akughuki lo ani ipi kümsülulo. Alhou’w küpükini nongu gholo apeniu.