Kolosiami 3 - Sümi Tiqhelimi Bible

Khristo lono Aküxü Kithe

¹ Tishiaye nongu ye Khristo gholo xüputhuvea ke ghenguno, nongu mlo pesü kunguu Khristo no Alhou u ajeu iqa akeu thimeqo shou belo.

² Nongu kükümsü pesü kungu lo thimeqo shou belo, ayeghi lo thimeqo shou kümsüpuku kevilo.

³ Kughengu nongu ye thivae, eno itehi nongu küxü ye Khristo gholo no Alhou no küsüpe qhivae.

⁴ Khristo khuu nongu küxü kuchou keno kughou pa no ipeghini keno nongu ghí ajuküvü lono pa gholo ipeghi nani.

⁵ Tighenguno, kiu no ayeghi lo lhoaye keno tipaqo pìthívelo; tiye kipito xüküpsa, mithekumo, ghaghu, küsakügha kümlà shinishi keu eno alakimine, kughengu alakimine ye ajulho kümlá ke.

⁶ Hipaqo ghenguno Alhou loghu ye hekibidemi shou ighi nani.

⁷ Ghuthu lakhi lo nongu ye hipaqo laghi lo cheche eno nongu ye tipau lo xüache ke.

⁸ Ikemu itehi ye nongu ghí nolikhi nongu lolo amlokighide, muqhumüza keu, axeküsü shikeu, pipütha keu, eno nongu kichí lono kuchube keu tsa ipeghi chekeu thime hipaqo kümtsü qhive moayesae.

⁹ Nongu lakhi no lakhi vilo mikí kevilo, kughengu nongu ye nongu lhoaye aqau gholo tipauw ghushoghiliqo ghí qhivea

¹⁰ eno alhoaye akitheu pepuluvea ke. Alhoaye akitheu hu ye Pulhosükütsü Lhou no pa ithive no pa toi shiluve peniye shikithe tsü acheni.

¹¹ Alhoaye akitheu küxü hipau lo ye Jewmi momu Jewkumomi, aphighüyiko ghave kemi momu aphighüyiko ghamo kemi, ayekümthami, Scythiami, aqüaxemi momu kuqhopheve kemi kühae, ikemu Khristo no kümtsü nguno akhotou eno pa ye kümtsü lolo anike.

¹² Tighenguno, Alhou no kimiye no akimthe shi xüpe niye kisheluve kemi akehu, kimiyeqhiyi keu, küpüqhiyi keu, akuchunu shikeu, akümtsha eno kutuukulu shikeu pesü nongu likhi nongu nanu shi pepulo.

¹³ Lakhi no lakhi lau küsüqhikulu shilo eno nongu khuala no kütami lau kumchhokumnu shikeu aghí aye lakhi no lakhi kipimí qhitsülo. Ampeu no nongu kipimí qhitsü ketoi nongu ghí lakhi no lakhi kipimí qhitsülo.

¹⁴ Eno alhoaye kivi hipaqo kümtsü shou kikimiye pepulo, kughengu kikimiye no alhoaye kiviqo kümtsü kupukülai shi tsüghaküqha tsü cheni.

¹⁵ Khristo’w aloino keu pelo nongu mlo lo ayè pelu pelo, kughengu aphimpi lakhi lo kihiküsümi toi aloino keu lo nongu kulùvea ke. Eno Alhou shikimthiqhiyi achelo.

¹⁶ Nongu no kütsü eno shika kelo nongu kükütsü sütsa lo Khristo tsakiviu pelo nongu gholo kinikülü shi ngolu pelo. Eno alokütsü shi no nongu mlo lo shikimthiqhiyi keu xapusü lakhi no lakhi vilo leshele, akishé le, eno Aghungu lo le vechewo Alhou sheqhelo.

¹⁷ Eno nongu no kiu-kiu shimu, atsa lo na akümlà lo namu, Ampeu Jisü je vechewo Apù Alhou lau shikimthi tsü ghi thowkha kümtsü shilo.

Khristomi Kiboqo ghenguno Shikakütsü

¹⁸ Anipuqo, nongu kimi qhoqhü lo, kughengu Khristomi ghenguno tishi keu no achipi ke.

¹⁹ Akiminoqo, nongu nipu kimiye lo eno panongu lau ayiküsa shi kevilo.

²⁰ Anuliqo, thowkha lo nongu pù-aza gholulo, kughengu tishi keu no Ampeu lokiqipu shilu cheni ke.

²¹ Apù-aza noqo, nongu nuliqo ihulo ghasü kevilo, tishiaye panongu no amlo mtomove nosake.

²² Aqüaxemiqo, nongu mpemiqo pelo alovi penike ghenguno panongu no ju akelo likhi no aghokulu shi kevilo ikemu nongu no Khristo gholu chekeu toi agigihu eno sükümsa gholo amikucho mlo xapusü ayeghi lo nongu mpemiqo sükümsa shilo.

²³ Nongu no kiu-kiu shi namu, ayeghi lo ampemiqo qe anike kumo no Ampeu qe akeshi nongu mlo tsüqhiyi mülà itha lo,

²⁴ kughengu nongu ye Ampeu lau no qesaxu mheghi ithulu nani kepi nongu no ithi anike. Nongu no qe akeu hu ye Ampeu Khristo ke.

²⁵ Khukhumu achipikumo shikeu ye panongu no achipikumo shikeu ghenguno lochile nani, kughengu Alhou ye agikuju shichemo ke.