Kolosiami 2 - Sümi Tiqhelimi Bible

¹ Ni ye nongu ghenguno eno Laodicea lo akemi ghenguno, eno khunoqo I sasü lüthü shi kusho mülà no aphi keno kümtsü pelo I no kíshi ime ani keno ithi penishi ani.

² I kimiji ye panongu pelo amlo shikumtolu eno kikimiye lono küqhalu peniye ke, tishianguno panongu pelo Alhou’w tuqhou, khikhi Khristo ampi keno, tipau kinikülü shi akeu kupukülai shi vethalu peniye ke.

³ Khristo lolo alokütsü eno akighithi kinikhuki kümtsü küsüpe püani.

⁴ I no hipau nongu vilo piakeu ye timi khuu pelo nomu pishikiqhi tsa vechewo nongu pishiqhive pemo niye ke.

⁵ Kughengu I no aphimpi no nongu gholo küha pinamu, aghungu lono ni ye nongu gholo ani eno nongu no kíshi aghokulu shi ani eno kíshi Khristo lono nongu küpülü ithamo no ani keno ithulu püzü alokiqishi ani.

Khristo lono Aghungu Xü lo Chhitoi

⁶ Tishiaye, nongu no Khristo Jisü pesü nongu Mpeu shi ikhiluve keu toi, nongu ye tamo no pa gholo no xüche lo.

⁷ Pa gholo nongu kuhu qüsülo eno nongu küxü shiqhepuku chelo, eno nongu kütsü pìyeve ketoi aküpülü lo akumto shilo eno shikimthi keu no qochili alo.

⁸ Khristo lau no ighi keu kumo aye, khuu pelo nomu abokümsa eno pishikiqhi phukutho khikhi timi kukhuaye eno hipau yeghi ghawu thime küká shou pükhübe keu vechewo ighi cheni keno tipaqo pelo nongu küghasüwuve pe kevilo.

⁹ Kughengu Alhou lhoaye kuchopu kupukülai shi Khristo phimpi lo anike,

¹⁰ eno Khristo lono nongu pelo kupukülailu pe ke. Pa ye aküka eno kükagha kümtsü shou akütsü ke.

¹¹ Pa vechewo nongu ghí aphighüyiko ghavae ikemu tiye timi u no aphighüyiko-gha keu kumoe. Kughou nongu no Khristo vechewo aphighüyiko ghave keno timi lhoaye no nongu phimpi kuchopu shou ayè pe chekeu ikhivea ke.

¹² Baptiz shikeu vechewo Khristo gholo qhovea ke, eno nongu ghí Alhou no akithí lono Khristo xüputhuve keu küká no mülà akeu lo nongu küpülü vechewo Khristo gholo nongu ghí xüputhuvea ke.

¹³ Kughou nongu no nongu xiné lo thive no ache eno aphighüyiko ghamo no ache keno, Alhou no Khristo vechewo nongu püxü tsüe. Pa no ningu xiné kümtsü pevetsü ke.

¹⁴ Ayeza kiqi lo ningu lau lakichile eno kiléqhive püzü akipimí tsü ghi api-ashe akeu hu kümtsü pa no ikhive tsüke; eno pa no kros lono ti kümtsü yedave no pevetsü ake.

¹⁵ Hipau ghola lono pa no aküka eno kükaghaqo küká ikhiluve tsüke eno kros lono panongu shou toluve keu vechewo mìshí zülo no panongu shikukujo ke.

Timi Yeza lono Kuqhokiphe

¹⁶ Tighenguno timi khuu pelo nomu nongu no kiu chu eno sho cheni, momu tiqhitini tsalà ikhilu chekeu, Aqhi Kithe momu Sabbath tsalà ikhilu chekeu vechewo nongu shou küghathabe pe kevilo.

¹⁷ Hipaqo ye ighi niye shi akeu thimeqow yekükhü lakhi ke; eno kuchou ampi ye Khristo lolo likhi no ithulu cheni.

¹⁸ Timi khunoqo no akuchunu ghili shi no kungumiqo mülá cheni keno tipaqo pelo nongu theqhive pe kevilo. Timi hitoi kemi ye panongu no kungunhetsü kiu ithulu keno tipau chixechilei pi cheni ke; panongu ye ayeghi lo timi kükümsü pesü akiqi kiumu kühamu akuchhoma shi acheni.

¹⁹ Panongu ye Khristo, khuu akütsü keno, pa gholo kimepe movae. Khristo lau no atüqhü ngò anhüqo vechewo aphimpi kuchopu kütshükimelu cheni eno aphi lo küdapu shilu cheni, tisheno Alhou no thuwu penishi ketoi thuwulu cheni.

²⁰ Nongu ye Khristo gholo thive no ayeghi hipau ghungu kükaqo lono kuqhopheve keghi nongu ye kushiye ayeghi küká laumiqo toi tipau yezaqo pape ani kea:

²¹ “Peitha kevilo! Micheju kevilo! Bu kevilo!”?

²² Ayeza jeli hipaqo kümtsü peitha ghi pühaveni keqo ke eno hipaqo ye timi no mülà keu zakütsü eno shikükaqo likhi ke.

²³ Yezashi hitoi keqo ye alokütsü shi aghí kepu toi, alikhi ampi ghasüpe achineye lo amlotsüqhiyi aghí kepu toi, pano likhi pano shikuchunulu eno aphimpi püghüqhilu ake toi ithulu aghiluvi, ikemu tipaqo ye ashi-aji lo ngosükümla eno ghasükulupu shini keu lo kiumu amekühae.