Kolosiami 1 - Sümi Tiqhelimi Bible

¹ Ni Paul, Alhou pulou vechewo Khristo Jisü’w apostolmi lakhi, eno ningu thiküzüu Timothy no,

² Kolosia lo Alhou’w akimthe timiqo, Khristo lono pükhübekulumi athiküzümi eno achelimiqo lau yèlu ani: Ningu Papù Alhou lau no ighi keu küpükini eno aloino keu nongu gholo apeniu.

Shikimthikütsü eno Akighini

³ Kughou ningu no nongu ghenguno inikhuni keno ningu ye alhokuthu ningu Mpeu Jisü Khristo Papù Alhou shikimthi cheni,

⁴ kughengu nongu no Khristo Jisü shou aküpülü akeu eno Alhou’w timiqo kümtsü lau nonguw kikimiye akeu ningu no chilu ke—

⁵ aküpülü eno kikimiye ye nongu ghenguno kungugha lo lajupu pekütsü pe püakeu lono qò ipeghi anike eno nongu lau atsakiviu kükütsü sütsa kuchou khikhi nongu lau ighi keno tile no nongu ye

⁶ lajupu hipau ghili chiluvea ke. Tihutoi, nongu no atsakiviu ghili chilu no kuchou no Alhou’w küpükini vethalu keu tsalà lono nongu gholo mülà ake toi, atsakiviu ye ayeghiqha kuchopu lo axathi pithí eno thuwu anie.

⁷ Nongu ye ningu no kimiye chekeu eno aqeu aküsàu Epaphras, khuu ningu züqhu shi Khristo’w pichebekulu qeu lakhi keno, pa lau no kikimiye shikalu ke,

⁸ eno pa no ningu vilo nongu no Aghungu lono kikimiye pighi akeu ghili pike.

⁹ Hi ghenguno, ningu no nongu ghili chilu ke tsalà lono huthu no nongu ghenguno tamo no inikhu acheni. Ningu ye tamo no Alhou vilo pa pulou kighithi eno Aghungu no tsü chekeu lokütsü eno vethakulu kümtsü pesü nongu tsülo ipi inikhu acheni,

¹⁰ tishianguno nongu pelo Ampeu no pulo keu aküzüpu küxü xülu no alaghi thowkha lono pa pulou shilu peniye ke. Eno akivi kümlà kümtsü lo axathi pithílu, Alhou kighithi lono thuwulu,

¹¹ nongu pelo shishe kutuukulu eno kheakulu shilu penike ghenguno pa juküvüpu kumto vechewo no aküka kümtsü pesü nongu shikumtolu,

¹² eno Apù khuu no nongu pelo aküvü kükaphu lo paw akimthe timiqo gholo amheghi küsajelu penike nongu pelo aküzüpu shilu pe keno alokiqi shikimthi pesü pa tsü ani.

¹³ Kughengu pa no àküzǘ kükaqha lono ningu xaphelu no pa no kimiye chekeu Nu kükaphu lo ningu sasü ighike,

¹⁴ pa vechewo ningu ye xachilekulupu shi axiné pevetsü keu ani.

Khristo ye Kümtsü nguno Akiqheu

¹⁵ Anu ye ithukümlau Lhou jukimihi ke, pa ye lhoqhipüa keu kümtsü nguno akiqheu ke.

¹⁶ Kughengu pa vechewo thime kümtsü lhophe ke: kungugha lo eno ayeghi shou thimeqo, ithukulu eno ithukümla, aküka lakhü momu ayekipeqha momu ayekipemi momu kükagha pe akemi shi aghí namu; thime kümtsü pa vechewo eno pa ghenguno lhosü tsü.

¹⁷ Pa ye thowkha kümtsü züu no ache, eno thowkha kümtsü pa gholo no tsüqü kumqo pe ani.

¹⁸ Eno pa phimpi ye akukuhou eno pa ye tipau kütsü ke; pa ye abothu ke eno pa ye kithimi dolo xüputhuve keu atüghiu ke, tishi keu lono pa pelo thowkha kümtsü lo akiqheu shilu peniye ke.

¹⁹ Kughengu Alhou ye pa lhoaye kuchopu pesü Khristo lolo ngo nikeu lo amlokiqi shike.

²⁰ Eno ayeghi lo thimeqo shi aghí na kungugha lo thimeqo shi aghí namu Khristo no kros lo pa jì peleve keu vechewo thowkha kümtsü pesü Apù Alhou lau külashilu peniye ke.

²¹ Ghuthu lakhi lo nongu ye Alhou lau no putosü pe acheke eno nonguw küsakügha ghiliaye ghenguno nongu mlo lono Alhou ghümi shi acheke.

²² Ikemu itehi ye tukutiye küha eno ngukube kepu kiumu küha no akimthe shi pa zülo ighilu penike ghenguno Khristo shi phimpi kithí vechewo pa no nongu sasü külashiluvae—

²³ tiye nongu no aküpülü lo aboqha kumto shou mutotoilu eno ithamo püzü lajupu akeu atsakiviu lo ache moayesa ke. Atsakiviu hipau ye nongu no chiluve keu ke eno atsütsǘ qholo lhoxü jeli kümtsü lau asheshuvae, eno atsakiviu hipau lo ni Paul pelo aqeu lakhi shilu pe ke.

Paul no Akukuhou ghenguno Mülà keu

²⁴ I no itehi kiu nongu ghenguno aghime sholu ani keno tipau ghenguno ni ye alovishe anie, eno I phi lo aghime sholu akeu vechewo Khristo no pa phimpi, akukuhou ghenguno tamo no aghime shikeu lo ni ghí tipau lo pichhilu anike.

²⁵ Alhou no I pelo nongu lau Alhou tsa kuchopu küsaje penike I pichetsü keu vechewo ni ye akukuhou qeu lakhi shivae.

²⁶ Hiye ado kusho eno wove keu tiqheli lo timiqo lau no küsüpe püa chekeu Alhou’w tuqhou vehu ke, ikemu itehi ye Ampeu’w timiqo lau pephe-piyevae.

²⁷ Kughengu Alhou no timiqo pelo tuqhou hipau juküvüw küakini Jewkumomiqo ghenguno ghí ani kepi ithi peniye nongu kishelu ke. Eno Alhou’w tuqhou ye hipau ke: tiye, nongu lolo Khristo akeu, ajuküvü lajupu hu ke.

²⁸ Ningu no asheshu chekeu ye Khristo ke. Alhou no alokütsü ningu tsü keu kümtsü pesü ningu ye timi kümtsü vilo kütüghü eno shika acheni, tishianguno timi kümtsü pesü Khristo lono tekhoi shi no Alhou zülo qhitsü niye ke.

²⁹ Hi ghenguno ni ye Khristo küká I lolo mülà akeu shou pükhübe no shishe ichhe-ime mülà acheni.