John 9 - Sümi Tiqhelimi Bible

Jisü no Apunu lono Anhethi Iche kemi lakhi Shipivi

¹ Pa no wuche kelo anhethi iche no punú kemi lakhi ithulu.

² Pa khopemiqo no pa vilo iniju, “Rabbi! Khuu no axiné shive no pa ye anhethi iche püzü punú kea, pa no keo pa pù-aza no kea?”

³ Jisü no khochile, “Timi hipau xiné momu pa pù-aza xiné ghenguno kumoe! Ikemu hi shive keu ye pa vechewo akughushu Lhou kümlà pephe-piye niye ke.

⁴ Atsala vüqai ake kutólo ningu ye khuu I puwu keno pa kümlàqo shiamase. Putho tsalà wochea, eno tiye khunomu akümlà shimla nani.

⁵ I no ayeghi lo ake dolo, ni ye ayeghilomi küvü ke.”

⁶ Hi pive kethiu pa no ayeghi lo müsü puku püzü pa mití pe aniba kunú no anhethi kighicheu nhethi lo nù tsü.

⁷ Jisü no pa vilo pi, “Wulo eno Siloam zükhe lono mitheve lo!” (Siloam kiqi ye puwu keu). Ikehu timi hu no wu püzü pa gi phave, eno aki lo ideighi kelo pa ye ithuluve.

⁸ Pa kisüghümiqo eno püzüu pa no khuchu che kelo ithi akeqo no ishi iniju, “Timi hipau ye iqa püzü khuchu chekeu ke kumo keshea?”

⁹ Khami no pa ye timi tipau ke ipie. Kütamiqo no, “Kumoe! Pa ye hupau kimihi ke,” ipie. Ikemu pa likhi pa no pikichichi ghi pi, “Timi tipau hu ye ni ke.”

¹⁰ “Tishiaye kíshi no O nhethi tsükholuvea kea?” ipi panoqo no iniju.

¹¹ Pa no khochile, “Panongu no Jisü ipi ku chekeu timi hu no aniba hami kunú pesü I nhethi lo nù tsüe. Pa no I vilo Siloam lo wu no mitheve lo ipi. Ike I no wu no mitheve kethiu ni ye ithuluvae.”

¹² Panongu no iniju, “Timi hipau khila ani kea?” “Ni ye mthae,” ipi pa no khochile.

Phariseemiqo no Shikipivi Vehu lo Phukuju shikeu

¹³ Panongu no anhethi iche no punú keu hu Phariseemiqo lau süghi.

¹⁴ Ike Jisü no aniba kunú pesü timi tipau nhethi khaqhi tsü keu ye Sabbath tsalà ke.

¹⁵ Tighenguno Phariseemiqo ghí pa vilo kíshi no pa ye ithuluve keno iniju. Timi hu no khochile, “Pa no I nhethi lo aniba sǘtsü eno I no azü pesü mitheve kelo ni ye itehi ye ithuluvae.”

¹⁶ Phariseemiqo khami no pi, “Timi hipau ye Alhou lau no ighi kemi kumoe, kughengu pa ye Sabbath tsalà ikhilu amoe.” Ikemu kütamiqo no iniju, “Kíshi no axinemi lakhi ye amichipu kümlà hitoi keqo shilu nani kea?” Ikehu panongu dolo kijethave.

¹⁷ Tisheno panongu no itaghi anhethi kighicheu lau tsüghǜ ighino pi, “Pa no O nhethi khaqhi tsüke, no ye pa ghili kiu pi kepu ani kea?” Timi hu no pi, “Pa ye Tungkupumi lakhie.”

¹⁸ Panongu ye anhethi kighicheu pù-aza ku süghimo ke kutólo pa ye anhethi iche ache no ithuluve kepi pülü müla no ake.

¹⁹ Panongu no iniju, “Hiye nokujo pú keshea? Anhethi iche no punú ipi nokujo no pikeu ye hi keshea? Pa ye kíshi no itehi ye ithuluvea kea?”

²⁰ Anhethi kighicheu pù-aza no ishi khochile, “Pa ye ni pú kepi nino ithi ani eno pa ye anhethi iche no punú kepi nino ithi anie.

²¹ Ikemu pa ye itehi ye kíshi no ithuluvea momu khuu no pa nhethi khaqhive tsü keno nikujo ye mthae. Pa vilo iniju lo. Pa ye kichimi shivae eno pa ye pa likhi pa ghenguno pilu nanie.”

²² Anhethi kighicheu pù-aza ye Jewmi sakiphemiqo kümsà lau no hi pike, kughengu Jewmi sakiphemiqo ye azüu no khukhumu Jisü ye Messiah kepi ikhilu kemi ye synagog lono hapheve nikeu shi xakütha shipepüa ke.

²³ Tighenguno pa pù-aza ye, “Pa ye kichimi shivea ke; pa vilo iniju lo,” ipi ke.

²⁴ Panongu no ghuthu akiniù anhethi iche no achekeu hu kusü püzü pa vilo ishi pi, “Amikucho tsa pikeu vechewo Alhou juküvü shitsülo. Ningu no ithi akeu no timi hipau ye axinemi ke.”

²⁵ Pa no khochile, “Pa ye axinemi keo kumo keno ni ye mthae. Ikemu I no thime lakhi ithi anie. Ike tiye, ni ye anhethi iche no ache ikemu itehi ye ni ye ithuluvae!”

²⁶ Ikelo panongu no pa vilo iniju, “Pa ye O lau kiu shi kea? Pa ye kíshi no O nhethi khaqhi tsü kea?”

²⁷ Pa no khochile, “I no nongu vilo pivae ikemu nongu no inimo ke. Nongu ye kushiye itaghi chilu nishi ani kea? Nongu ghí pa khopemi shinishi ani keshea?”

²⁸ Ikelo panongu no timi hu shikukujoqhi no pi, “No ye timi hipau khopemi ke! Ningu ye Moses khopemiqo ke!

²⁹ Ningu ye Alhou no Moses pütsa keu ithi anie, ikemu ningu ye timi hipau ye khilau no ighi keno ti ghí mthae.”

³⁰ Timi hu no khochile, “Ya tiye akichiqhie na! Nongu ye pa ye khilau no ighi keno mtha keghi pa no I nhethi khaqhi tsüke.

³¹ Ningu no ithi akeu no Alhou ye axinemiqo kighini chilutsü chemoe. Pa ye khuno no Alhou sümsa no pa gholu cheni keno tipaqo kighini chilutsü chenie.

³² Khunomu anhethi iche no punú kemi lakhi nhethi khaqhi tsü keu ghili chilu mphie.

³³ Tsalá timi hipau no Alhou lau no ighimo kemi shi aghí aye, pa ye kiumu shimlae.”

³⁴ Hipau lo panongu no khochile, “No ye apunu lonomu axiné lo thonhei acheke; no ye kíshi püzü ningu kütsü ani kea!” Tisheno panongu no synagog lono khalau pa hapheve.

Aghungu lo Anhethi Kighichemi

³⁵ Phariseemiqo no anhethi iche no achekeu hu hapheve ipikeu Jisü no chilu, eno kughou Jisü no pa ithulu keno pa vilo iniju, “No ye Timi Nu shou pülü anima?”

³⁶ Timi hu no iniju, “Akijeu, pa ye khuu kea? I no pa pülü nike pa ye khuu keno I vilo pilo.”

³⁷ Jisü no pi, “No ye itehi pa ithuluvae; kuchou lo ye O pütsa akeu hu no pa ke.”

³⁸ Ikelo timi hu no, “Ampeu, I no pülü ani,” ipi püzü pa no Jisü müláe.

³⁹ Jisü no pi, “Küghatha nike ghenguno ni ye ayeghi hipau lo ighike, tishianguno anhethi kighichemi pelo ithulu pe eno ithulu akemi pelo anhethi kighichemi shive peniye ke.”

⁴⁰ Phariseemiqo hami pa gholo ngo akemiqo no hi pikeu chilu püzü pa vilo iniju, “Kíshie pia? Ningu ghí anhethi kighichemi ya?”

⁴¹ Jisü no pi, “Nongu no anhethi kighichemi shi aghí ke aye, nongu ye axiné kipimí aghimoni cheke, ikemu itehi ye nongu no ithulu ani ipi pükha ani kehu nongu xiné kipimí ye aniae.”