John 8 - Sümi Tiqhelimi Bible

¹ ikemu Jisü ye Olive naghuto lo wuve.

² Tsükutho lau itaghi pa ye achineki khala lo ideighi, tilehi timi kümtsü no pa sühomxa pe kumqo eno pa no panongu kütsü niye iqa.

³ Ayeza kükütsümi ngò Phariseemiqo no totimi lakhi shupu ake lono küghalu keu süghi. Panongu no li pelo aqó zülo puthugho pe

⁴ no Jisü vilo pi, “Akükütsüu! Totimi hipau ye shupu keu kümlà shi ake lono küghalue.

⁵ Moses yeza lo totimi hitoi keu ye atu pesü veqhi pìthíve pe nikeu yeza ningu tsüpüani. Ike no ye kiu pi nani kea?”

⁶ Panongu ye Jisü ngukuni keu boqha aní keu ghenguno alichhe shi ghi Jisü vilo hi iniju ke. Ikemu Jisü no itsaqi no pa u loti pesü ayeghi lo yè thuve.

⁷ Kughou panongu no Jisü vilo iniju tamove keno Jisü no müzüchoi puthughove püzü panongu vilo pi, “Nongu dolo khuu no axiné küha keno pa paghi no li shou atu vepukuluve lo.”

⁸ Itaghi pa no itsaqive no ayeghi lo yèpuku.

⁹ Ikelo tilehi chikulumiqo dolo kichimiqo paghi no atüghishi püzü lakhi-khi no wokhave püzü ashekha lo totimi puthugho akeu ngo Jisü likhive.

¹⁰ Jisü no puthugho no atotiu vilo iniju, “Totimio! Panongu ye khilehi ani kea? Khumu O pipüthamove keshea?”

¹¹ Li no pi, “Akijeu, khunomu tishimoe.” Ikelo Jisü no ishi ipi, “Tishiaye ni ghí O pipütha amoe. Wulo eno axiné shikithe kevilo.”

Jisü’w Thopi Vehu lo Kimpi Keu

¹² Jisü no itaghi timiqo pütsa ghi ishi pi, “Ni ye ayeghilomi küvü ke. Khukhumu I pape kemi ye khilemu àküzǘ lo chechemo nani, ikemu aküvü küxü lo cheche nani.”

¹³ Phariseemiqo no pa khü ghi pi, “No ye hilehi O likhi ow thopi shi ighi anie; ow thopi ye peithakulupu kumoe.”

¹⁴ Jisü no khochile, “I no I likhi I züqhu shi thopi shi aghimu iw thopi ye peithakulupu ke, kughengu ni ye khilau no ighi eno khila wu niye shi ani keno I no ithi anie. Ikemu ni ye khilau no ighi momu khila wucheni keno nongu ye khumu mthae.

¹⁵ Nongu ye timi gholau no küghathabe cheni; Ni ye khuu shoumu küghathabe puku chemoe.

¹⁶ Ikemu tsalá I no küghathabe aye, iw xaküthaqo ye kuchou ke, kughengu ni ye I likhi anike kumoe. Ni ye Apù khuu I puwu keno pa gholo puthugho anie.

¹⁷ Nongu likhi nongu yeza lo timi kini no thopi shikeu ye kuchou kepi yèpüanie.

¹⁸ Ni ye I likhi I ghenguno thopi shi akeu lakhi ke; iw thopi lakhiu ye I puwu keu Apù hu ke.”

¹⁹ Ikelo panongu no pa vilo iniju, “O pù ye khila ani kea?” Jisü no khochile, “Nongu ye ni momu I pù mu ithi amoe. Tsalá nongu no ni ithi aghí ke aye, nongu ye I pù ghí ithini cheke.”

²⁰ Atsa hipaqo ye achineki khala lo akümlaghoqo süche keu phivilo kütsü ake lono pikeqo ke. Ikemu pa do ighimo no akehu timi khumu pa küghamoe.

Jisü ye Khuu kea?

²¹ Itaghi Jisü no panongu vilo pi, “Ni ye wuchea, eno nongu ye I phuju nani, eno nongu ye nongu xiné lo thive nani. I no khile wuni keno, nongu ye tilehi ighi mülae.”

²² Hi ghenguno Jewmiqo no ishi iniju, “Pa ye pa likhi pa pìthíve nani keshea? Hi ghenguno pa ye, ‘I no khile wuni keno, nongu ye tilehi ighi mülae,’ ipi ani keshea?”

²³ Ikemu Jisü no ishi pikibe, “Nongu ye aqhou lono ke; Ni ye kungu lono ke. Nongu ye hipau yeghi lono ighike; ikemu ni ye hipau yeghi lono ighimoe.

²⁴ I no nongu vilo nongu ye nongu xinéqo lono thive nani ipi ke; tsalá nongu no ni ye pa ke ipi pülümo aye, nongu ye kuchou no nongu xinéqo lono thive nani.”

²⁵ Panongu no ishi iniju, “No ye khuu kea?” Jisü no khochile, “I no abothu lono nongu vilo pi ighike toi,

²⁶ ni ye nongu vehu lo kutomo pi kepu ani eno nongu shou küghathabe kepu kutomo ani. Ikemu khuu I puwu keno pa ye pichebekuluu ke, eno ni ye pa lau chilu keu pesü ayeghilomi vilo pi achenie.”

²⁷ Panongu ye Jisü no Papù ghili pi anike ipi vethamlae.

²⁸ Ike Jisü no pi, “Nongu no Timi Nu pesü kros lo pepukuve kethiu no nongu no ni ye pa kepi ithi nani eno ni ye I likhi I kutoshi ye kiumu shichemo kemu Apù no kiu I shika keno ti pi cheni kepi ithi nani.

²⁹ Khuu I puwu keno pa ye I gholo ani; pa ye I likhi qhive mphi, kughengu ni ye alhokuthu kiu no pa pulou keno tipau shi cheni.”

³⁰ Pa no piaphi lono timi kutomo no pa pülüve.

Jisü Lakichilemiqo ye Khuno Tianuliqo kea ipi Kimpi keu

³¹ Jisü no pa pülüluve kemi Jewmiqo vilo ishi pi, “Nongu no I kükütsü papelu aye nongu ye kuchou no I khopemiqo ke.

³² Tishianguno nongu no kuchou ithi nani, eno kuchou no nongu khaqhiphe nani.”

³³ Panongu no Jisü khochile, “Ningu ye Abraham tikughukomiqo ke eno ningu ye khilemu khuu qüaxemu shiju mphie. No ye kíshi püzü ningu ye khaqhipheve nani kepi pilu nani kea?”

³⁴ Jisü no khochile, “Kuchou no I no nongu vilo pìní, axiné shi chekemiqo kümtsü axiné qüaxemi ke.

³⁵ Aqüaxemi lakhi ye alhokuthu ghenguno akibo lo akütsa shi ngo chemoe ikemu anu lakhi ye pülhapuju ghenguno akibo lo kihiküsümi ke.

³⁶ Ike tsalá Anu no nongu khaqhipheve aye nongu ye kuchou no khaqhipheve nani.

³⁷ Nongu ye Abraham tikughukomiqo kepi I no ithi anie. Tishi keghi nongu ye I pìthíve nikeu laghi phu anie, kughengu I tsa ghenguno nongu lolo a-a küha ke.

³⁸ Ni ye nongu vilo I pù küa lono kiu ithulu keno ti pi anie, eno nongu ye nongu papù lau no kiu chilu keno tishi anie.”

³⁹ Panongu no khochile, “Abraham ye ningu papù ke.” Jisü no pi, “Tsalá nongu no Abraham nuliqo shi aghí ke aye, nongu ye Abraham no kiu shi keno tipau shini cheke.

⁴⁰ Ikemu nongu ye I pìthíve nike ghenguno alaghi phu chenie. Ni ye Alhou lau no kuchou tsa chilu keu pesü nongu vilo pi cheni ke. Abraham ye hitoi keu kümlà shipüamoe.

⁴¹ Nongu ye nongu likhi nongu papù kümlàqo shi anie.” Panongu no alomishi ghi pi, “Ningu ye ashou ngaqo kumoe. Ningu ye Apù lakhi likhi anie, ike tiye Alhou ampi ke.”

⁴² Jisü no panongu vilo pi, “Tsalá Alhou no nongu papù shi aghí aye nongu ye I kimiyeni cheke, kughengu ni ye Alhou lau no hilehi ighike. Ni ye I likhi I kutoshi ighimoe; Alhou no I puwu ke.

⁴³ I tsa ye nongu ghenguno kushiye mütsümisheimo kea? Tiye nongu no I no kiu piani keno ini nishimo keu ghenguno ke.

⁴⁴ Nongu ye nongu papù tüghami’w ke, eno nongu ye nongu papù no shinishiqhiyi achekeqo shi anishi cheni ke. Pa ye abothu lonomu hekiqhimi ke, kuchou papemo ke, kughengu pa lolo kuchou küha ke. Kughou pa no alatsa pìní keno pa ye pano tsau no pi cheni kughengu pa ye alatsa kipimí lakhi ke eno akimikiqo papù ke.

⁴⁵ Tishimu I no kuchou tsa nongu vilo pikeu ghenguno, nongu ye I pülümo ke!

⁴⁶ Nongu khuala no ni ye axiné shivea ipikeu kipimí I tsülu nani keshea? I no kuchou tsa pi aghí aye nongu ye kushiye I pülümo kea?

⁴⁷ Khukhumu Alhou laumi ye Alhou tsa ini cheni. Nongu no inimo keu ye nongu no Alhou laumi kumo keu ghenguno ke.”

Jisü no Pa Likhi Pa Pükha

⁴⁸ Jewmiqo no pa khochile, “No ye Samariami eno tüghaküsa no tsüghape akemi kepi ningu no pikeu ye achipi ke kumo keshea?”

⁴⁹ Jisü no pi, “Ni ye tüghaküsa no tsüghape amoe, ikemu ni ye I pù gihu cheni eno nongu no I gihu chemoe.

⁵⁰ Ni ye I likhi I ghenguno ajekipi phu anike kumoe; ikemu ajekipi phu chekemi lakhi anie, eno pa ye küghaküthau ke.

⁵¹ Kuchou no I no nongu vilo pìní, khukhumu I tsa gholu keu ye khilemu akithí ithulumo nanie.”

⁵² Jisü no hi pi kelo panongu no ishi ighamuku pi, “No ye tüghaküsa no tsüghape ani kepi ningu no ithivae! Abraham ye thivea eno tungkupumiqo ghí thivea, tishi keghi no ye khukhumu O tsa lukeu ye khilemu akithí michemo nani ipi ani.

⁵³ No ye ningu papù Abraham nguno akijeu keshea? Pa ye thivea eno tungkupumiqo ghí thivea ke. No ye khuu ipi kümsü ani kea?”

⁵⁴ Jisü no khochile, “Tsalá I no I likhi I juküvü shi aye, I juküvü ye kiumu akiqi kühae. I pù khikhi nongu no nongu Lhou kepi pükha cheni keno pa no I juküvü shitsü chenie.

⁵⁵ Nongu no pa mtha aghimu, ni ye pa ithi anie. Tsalá I no pa mtha ipi aghí aye, ni ye nongu toi akimikimi lakhi shini ake, ikemu ni ye pa ithi ani eno pa tsa lucheni ke.

⁵⁶ Nongu papù Abraham no I tsalà ithulu nikeu kümsü no alovishe ke; pa no ti ithulu eno alokivishi ke.”

⁵⁷ Panongu no Jisü vilo pi, “No ye ampe lhopungumu shimphi püzü Abraham ithuluva ya?”

⁵⁸ Jisü no khochile, “Kuchou no I no nongu vilo pìní, ni ye Abraham punú mphi züu no acheghivae.”

⁵⁹ Hi pi kelo panoqo no atu pesü Jisü veqhi niye atu kichethuve, ikemu Jisü no achineki khala lono tsüghüsü wuve no pa likhi pa küghütshüluve.