John 7 - Sümi Tiqhelimi Bible

Jisü no Puloshoqhi-chebo’w Tiqhitini lo Wu

¹ Hipathiu Jisü ye Galilee qhalo wue. Jewmi sakiphemiqo no pa pìthíve niye kuchughu ake ghenguno pa ye Judea qhalo wuni shimo no ake.

² Ikemu kughou Jewmiqo’w Puloshoqhi-chebo Tiqhitini kupunúve keno,

³ Jisü thiküzümiqo no pa vilo pi, “O khopemiqo pelo nono müla keqo ithulu pe kepu shi Galilee qhive no Judea lo wuvelo.

⁴ Mìshí sakiphemi shinishi chekemi lakhi ye khumu tuqhou no müla-itha chemoe. Nono thime hipaqo shi ani kehu, no ye ayeghiqha lau O likhi O pìyelo.”

⁵ Pa likhi pa thiküzümiqo kutólo pa pülümo ke.

⁶ Tighenguno Jisü no panongu vilo pi, “I do ye ighi mphie; nongu ghengu ye kiu-kiu do shi aghimu achipi ke.

⁷ Ayeghiqha ye nongu mithi müla nani, ikemu I no ayeghiqha kümlàqo ye küsakügha kepi ashepe shitsü keu ghenguno ayeghiqha no I mithi cheni.

⁸ Nongu ye tiqhitini lo wulo. Ni ye tiqhitini hipau lo iqhoni chemoe, kughengu I do ye tokuchou shimphi ke.”

⁹ Pa ye hi pive püzü no Galilee lo ngove.

¹⁰ Ikemu pa thiküzümiqo no tiqhitini lo wuve kethiu Jisü ghí mìshí zülo pekiphe shimo püzü tuqhou no wu.

¹¹ Ike tiqhitini lo Jewmi sakiphemiqo ye Jisü phuju ghi ishi iniju, “Pa ye khile ani kea?”

¹² Aqokitikhi dolo Jisü ghili asheshi no pisü qhakuchho shi kügha wove. Khami no pi, “Pa ye timi kivimi ke.” Kütamiqo no khochile, “Kumoe! Pa ye timi pishiqhi chenie.”

¹³ Ikemu Jewmi sakiphemiqo kümsà ghenguno khumu mìshí zülo ye pa ghili pimoe.

Jisü no Tiqhitini-a lo Kütsü

¹⁴ Tiqhitini pini akeu amtamu shimphi lono Jisü ye achineki khala lo iqho no kütsü thuve.

¹⁵ Tilehi Jewmi sakiphemi akeqo ye akümzave no ishi iniju, “Timi hipau ye kíshi no shikamo keghi ishi ithikutholu kea?”

¹⁶ Jisü no khochile, “Iw shiküka ye I likhi iw kumo ke. Hiye I puwu keu lau no ighike.

¹⁷ Khukhumu Alhou pulou shini ke kisheluve kemi ye I kükütsü ye Alhou lau no ighi keo I likhi I tsapi keno phupheluve nani.

¹⁸ Khukhumu pa likhi pa no pi aye tiye pa likhi pa jekipi ghenguno pi anike, ikemu khuu no pa puwu keu jekipi phu cheni keno pa ye kuchou timi ke; pa ye kimikimi kumoe.

¹⁹ Moses ye ayeza pesü nongu tsüke kumo keshea? Ikemu nongu lakhimu ayeza papemo ke. Nongu ye kushiye I pìthíve niye pükapütsa ani kea?”

²⁰ Aqokitikhi no khochile, “No ye tüghaküsa no tsüghape anie. Khuu no O pìthíve niye pükapütsa ani kea?”

²¹ Jisü no panongu vilo pi, “I no akümzapu kümlà lakhi shie, eno nongu kümtsü akümzave.

²² Moses no aphighüyiko-küghá (kuchou lo ye hiye Moses lau no ighimo, ikemu apù-asüqo lau no ighike) pesü nongu tsü keu ghenguno nongu ye Sabbath tsalà lono anu kipitimi phighüyiko gha acheni.

²³ Tishiaye tsalá Moses yeza hexamo nike ghenguno Sabbath tsalà lo anu kipitimi lakhi phighüyiko ghalu cheghi aye, nongu ye kushiye I no Sabbath tsalà lono timi lakhi phimpi kuchopu shipivi tsü keu lo I ju amloide ani kea?

²⁴ Ashou ithukulu shou bepe no küghatha kevilo, ikemu tishini ke züqhulo achipi shi küghatha lo.”

Jisü ye Khuu Kea?

²⁵ Tipau tüqhüdo lo Jerusalemiqo khami no ishi iniju thuve, “Timi hipau ye Jewmi sakiphemiqo no pìthíve niye pükapütsa akeu ke kumo keshea?

²⁶ Pa ye hi anie eno mìshí zülo atsa pi anie, ikeghi panongu ye atsa lakhimu pa vilo piamoe. Ayekipemiqo ye kuchou no pa ye Messiah kepi xathava keshea?

²⁷ Kughou Messiah hu ighini keno timi khumu pa ye khilau no ighi keno ithimo nanie, ikemu ningu ye timi hipau khilau no ighi keno ithi anie.”

²⁸ Jisü ye hi kutólo achineki khalau kütsü ake, ike pa no ighamuku pi, “Iyei! Nongu ye ni ithi anie, eno nongu ye I no khilau no ighi keno ithi anie. Ni ye I likhi iw kükagha lono hilehi ighiamoe, ikemu khuu I puwu keno pa ye kuchou ke. Nongu ye pa mthae,

²⁹ ikemu ni ye pa ithi ani kughengu ni ye pa lau no ighi eno pa no I puwu ke.”

³⁰ Tishi akelo panongu no Jisü kügha niye shi, ikemu pa do ighimo no ake ghenguno timi lakhimu pa shou au bepukumoe.

³¹ Tishimu, aqokitikhi dolo timi kutomo no pa pülüluve. Panongu no pi, “Kughou Messiah ighini keno, pa ye timi hipau nguno akichiù amichipu kümlàqo shi nani keshea?”

³² Aqokitikhi no chhu-chhu shi Jisü ghili küptsa akeu Phariseemiqo no chiluve. Ikelo achinetomi eno Phariseemiqo no Jisü küghape niye achineki khemiqo puwuve.

³³ Jisü no pi, “Ni ye ado ikhonhei nongu gholo anani, eno tisheno ni ye I puwu keu lau wuve nani.

³⁴ Nongu no I phu nani, ikemu nongu ye I phu müla nani; eno I no khile anani keno nongu ye ighi müla nani.”

³⁵ Jewmiqo dolo lakhi no lakhi vilo ishi pi, “Timi hipau ye ningu no phu müla keu-a khila wuve niye kümsü ani kea? Pa ye niw timi Greekmiqo gholo apanaghave kemiqo lau wu no xü püzü Greekmiqo kütsü niye shi ani keshea?

³⁶ Kughou pa no, ‘Nongu no I phu nani ikemu nongu ye I phu müla nani,’ eno ‘I no khile anani keno nongu ye ighi müla nani,’ ipi keno tiye kiu kiqi kea?”

³⁷ Tiqhitini pinedo ashekhau eno ajekipi tsalà lo, Jisü no puthugho no ighamuku pi, “Khukhumu tüghüthi kemi ye I lau ighino yelu pelo.

³⁸ Kuchoyesü no pikeu toi, khuno khunomu I pülü kemi ye aküxüpu zü ghoki no panongu lolo no qowu nani.”

³⁹ Pa no hipau pikeu kiqi ye kutou pa pülü kemiqo no Aghungu ithulu niye shi akeu tsa ke. Jisü ye ajuküvü lono xüputhumo no ake ghenguno tipau do kutólo ye Aghungu tsümo no ae.

⁴⁰ Pa tsaqo chilu no timi khami no ishi pi, “Kuchou no timi hipau ye Tungkupu hu ke.”

⁴¹ Kütamiqo no pi, “Pa ye Messiah hu ke.” Tishimu timi kütamiqo no ishi iniju, “Kíshi no Messiah ye Galilee lono ighini kea?”

⁴² Kuchoyesü lo Messiah ye David no achekeu mishiphu Bethlehem lo David tikughuko lono ighi nani ipi püani ke kumo keshea?

⁴³ Tishikehu Jisü ghenguno timiqo dolo kijethave.

⁴⁴ Khami no Jisü kügha niye shi, ikemu khumu pa shou au bemove.

Jewmi Sakiphemiqo Pülükümla

⁴⁵ Ashekha lo achineki khemiqo ye achinetomi eno Phariseemiqo lau idewove. Achinetomi eno Phariseemiqo no akhemiqo vilo ishi iniju, “Nongu ye kushiye pa süghimo kea?”

⁴⁶ Akhemiqo no khochile, “Timi hipau no pikeu tsa ghola toi keu ye khunomu pipüamoe.”

⁴⁷ Phariseemiqo no müghachhoi khochile, “Tiye nongu ghí pa no pishiqhivea piani keo?

⁴⁸ Ayekipemi momu Phariseemiqo khiuala ye pa pülüve keshea?

⁴⁹ Moe! Ikemu hi ayeza kiumu mtha kemi mtomushu lojiqo no pa shou pülübe ke—panongu shou Alhou ngusü anie.”

⁵⁰ Nicodemus, khuu püzüu Jisü lau wu eno khuu panonguw kihiküsümi lakhi keno, pa no iniju,

⁵¹ “Ni yeza lo timi lakhi no kiu shi acheni keno phupheni ke ghenguno atüghishi pa tsa iniju paghimo no pa pipüsa cheni keshea?”

⁵² Panongu no khochile, “No ghí Galileemi keshea? Hilehi jusü julo, eno tungkupu lakhi ye Galilee lono ipeghi chemo kepi nono phulu nani.”

⁵³ Tishive no panongu kümtsü aki lo wove,