John 6 - Sümi Tiqhelimi Bible

Jisü no Timi 5,000 Loji

¹ Ado hami thiu Jisü ye Galilee züghi (tiye Tiberias züghi ghí pi cheni) mükü küdau kathasü putou wue,

² ikelo timi kutomo no Jisü no küsükinimi shipivi keu vechewo amichipu kümlàqo shikeu ithulupüa kehu panongu ye Jisü pape ighie.

³ Tipathiu Jisü no naghuto küdau iku püzü pa khopemiqo gholo iqa ae.

⁴ Jewmi Hechekulu ghulhu Tiqhitini ye kupunukhoi ake.

⁵ Kughou Jisü no timi kutomo pa küdau chekeu pishipuwo ithulu keno, pa no Philip vilo pi, “Ningu ye timi hipaqo ghenguno khile no achuqupu qhüni kea?”

⁶ Jisü ye pa peju nike ghengu likhi no hi iniju ke, kughengu pa ye kiu shinishi akeno pa mlo lo kümsü pe ngove no ake.

⁷ Philip no pa khochile, “Kümtsü pelo asho kimiki lakhi chulu penike qhü kepu shi namu ampe tüxa jume nguno akichiù avehupu shi nanie.”

⁸ Pa khopemi kütau, tiye Simon Peter thiküzüu Andrew, no pi,

⁹ “Apù lakhi barleythi shopa aghulo pungu eno akha aghulo kini pesü hi anie, ikemu hilikhi pesü kíshi timi hijejehi lojílu nani kea?”

¹⁰ Jisü no pi, “Timiqo pelo iqave pelo.” Tipau-a lo atsüni kutomo akehu panongu ye tilehi iqave (tilehi kipitimi 5,000 qhalo ae).

¹¹ Tisheno Jisü no asho ikhilu, shikimthi tsü, eno iqa akemiqo no chunishi ke thaqhü kijé tsü. Hitoi akha ghí kijé tsü.

¹² Kughou panongu kümtsü no aghakiqi shi chuve keno, Jisü no pa khopemiqo vilo pi, “Chuve no alà ipeghi keu munomughoqo kümtsü kumqolo. Lakhimu kilheve pe kevilo.”

¹³ Ike panongu no kiche kumqo kelo timiqo no barleythi shopa pungu chu keu lo alà ipeghi keu no ashoghi chighikini pichhilu.

¹⁴ Jisü no amichipu kümlà shikeu ithuluve kethiu timiqo no ishi pi, “Kuchou no hiye ayeghi lo ighi niye piakeu Tungkupuu ke.”

¹⁵ Jisü ye timiqo no tsükhomo pa pesü akükau shive niye shi akeu ithive no naghuto lakhi küdau itaghi pa likhi wuve.

Jisü no Azü Shou Alache

¹⁶ Kughou avelau shive keno, pa khopemiqo ye ayizükucho lo iqi

¹⁷ püzü tilau no ashuka lakhi lo ikuve no ayizükucho katha süsü Capernaum lo wuve. Hipau ghuloki lo zümoive, eno Jisü ye ti kutólo panoqo gholo kümtsa müla no ae.

¹⁸ Amlhü kijè lakhi ighi ae eno azü fuchighi thuve.

¹⁹ Kughou panongu no mile küthü ngò bidí qhalo ashuka tuha ighi keno, Jisü no azü shou no alà che süsü ashuka küdau ighi keu ithulu püzü panongu ye shishe msàve.

²⁰ Ikemu Jisü no panongu vilo pi, “Ni ke; Msà kevilo.”

²¹ Tipathiu panongu no ashuka lo Jisü sasü nike pulove eno paikhavi lono ashuka ye panongu no wuche keu küdau ayizükucho mükü tove.

²² Tishi thoghiu azükucho mükü hukukuu aqokitikhi akeqo ye ashuka lakhi likhi akeu kümsüchilelu püzü Jisü ye pa khopemiqo gholo ashuka lo ikumo no panongu ye panongu likhi wuve keu ithive.

²³ Ampeu no shikimthi keu tsü püzü timiqo no asho chuve keu-a phivilo Tiberias lono ashukaqo hami ighi.

²⁴ Kughou aqokitikhi no Jisü ngò pa khopemiqo ghí tile küha keu ithive keno, panongu no ashukaqo lo ikuve no Jisü phusü Capernaum lo wuve.

Jisü ye Aküxüpu Sho

²⁵ Kughou panongu no ayizükucho tüxa küdau Jisü ithulu keno panongu no Jisü vilo ishi iniju, “Rabbi! No ye kughou no hilau wo tova kea?”

²⁶ Jisü no khochile, “Kuchou no I no nongu vilo pìní, nongu ye I no amichipu kümlàqo shikeu ithulu keu ghenguno kumo püzü nongu no asho chu no nongu kive pichhilu keu ghenguno I phu chenie.

²⁷ Shipüsave chekeu chuqu ghenguno müla kevilo, ikemu lhokta küxü kutólo ngolu chekeu chuqu ghenguno müla lo, tiye Timi Nu no nongu tsü nani ke. Kughengu Apù Alhou no pa shou pulobe mekhavae.”

²⁸ Tipathiu panongu no Jisü vilo iniju, “Ningu ye Alhou no avehupu shi akeu kümlà shini ke ghenguno kiu shi moayesa kea?”

²⁹ Jisü no khochile, “Alhou kümlà hu ye hike: pa no puwu keu shou pülüni keu.”

³⁰ Ike panongu no pa vilo iniju, “Tishiaye ningu no ithulu no O pülü kepu shini ke ghenguno no ye amichipu kiu tsü nani ke? No ye kiu shi nani kea?

³¹ Ni pù-asüqo ye küghünamokeu-a lo manna chue; kughengu ishi yèpüani: ‘Pa no panongu pelo chu penike kungugha lono asho tsüe.’”

³² Jisü no panongu vilo pi, “Kuchou no I no nongu vilo pìní, kungugha lono asho tsü keu ye Moses no kumo ke, ikemu I pù no kungugha lono kuchou sho pesü nongu tsü cheni.

³³ Kughengu Alhou’w asho ye kungugha lono iqighi cheni eno ayeghilomi lau aküxüpu tsü chenie.”

³⁴ Panongu no pi, “Akijeu, asho hipau alhokuthu ningu tsülo.”

³⁵ Tisheno Jisü no asheshu ghi pi, “Ni ye aküxüpu sho ke. I lau ighi kemi ye khilemu müzüthimo nani, eno I pülü kemi ye khilemu tüghüthimo nani.

³⁶ Ikemu I no nongu vilo pive ketoi, nongu ye ni ithuluve keghi I pülümo ke.

³⁷ I pù no I tsüke miqo kümtsü I lau ighi nani, eno ni ye I lau ighi kemiqo ye khilemu hapuwuvemo nani.

³⁸ Kughengu ni ye I pulou shini ke ghenguno kungugha lono iqighimoe ikemu I puwu keu pulou shini ke ighike.

³⁹ Eno hino I puwu keu pulou ke, tiye pa no I tsü kemi lakhimu pühavemo püzü ashekha tsalà lono panoqo xüputhuni keu ke.

⁴⁰ Kughengu I pù pulou ye Anu lau jupuku no pa pülülu kemi kümtsü lhokta küxü alu pe nikeu ke, eno I no ashekha tsalà lono panongu xüputhu nani.”

⁴¹ Jisü no, “Ni ye kungugha lono iqighi keu sho ke,” ipikeu ghenguno tilehi Jewmi akeqo ye nhenheshi Jisü ghili kügha thuve.

⁴² Panongu no ishi pi, “Hiye Joseph nopu Jisü ke kumo keshea, ningu ye papù eno pazá ithi anike kumo? Kíshi no pa ye itehi ye, ‘Ni ye kungugha lono iqighi ke,’ ipini kea?”

⁴³ Jisü no khochile, “Nongu dolo nhenheshi akeu tavelo.

⁴⁴ I puwu keu Apù no sasü ighimo ke thaqhülo ye timi khumu I lau ighi mülae, eno ashekha tsalà lo I no panongu xüputhu nani.

⁴⁵ Tungkupu kakuqo lo ishi yèpüani: ‘Panongu kümtsü Alhou no shika nani.’ Apù tsa chilu kemi eno pa lau no shikalu kemi kümtsü I lau ighi cheni.

⁴⁶ Alhou lau no ighi keu likhi no kumo aye khumu Apù ithumla aphie; pa likhi no Apù ithulu püani.

⁴⁷ Kuchou no I no nongu vilo piani, timi khuu no pülüni keno pa ye lhokta küxü anie.

⁴⁸ Ni ye aküxüpu sho ke.

⁴⁹ Nongu pù-asüqo ye küghünamokeu-a lo manna chuke, tishimu panongu ye thive ke.

⁵⁰ Ikemu kungugha lono iqighi keu sho hi anie, eno hipau chukulumi khumu thimo nani.

⁵¹ Ni ye kungugha lono iqighi keu aküxüpu sho ke. Khukhumu asho hipau chu keu ye lhokta kutólo xü anani. Asho hipau ye I shi ke, tiye I no ayeghilomi pelo xülu penike ghenguno tsü nani.”

⁵² Ikelo Jewmiqo ye panongu dolo aloqhi kütsala ghi ishi pi, “Timi hipau ye kíshi püzü ningu pelo chu penike pa shi tsüní kea?”

⁵³ Jisü no panongu vilo pi, “Kuchou no I no nongu vilo pìní, Timi Nu shi chumo eno pa jì yemo ke thaqhülo nongu ye lhokta küxü ithumla nani.

⁵⁴ Khukhumu I shi chu eno I jì ye keu ye lhokta küxü anani eno I no ashekha tsalà lo panongu xüputhu nani.

⁵⁵ Kughengu I shi ye kuchou chuqu eno I jì ye yelu kepu kuchou ke.

⁵⁶ Khukhumu I shi chu eno I jì ye keu ye I gholo kimepe ani eno I no panongu lolo ani.

⁵⁷ Xü akeu Apù no I puwu eno Apù vechewo I no xü ake toi, khuu no I no lojí keu chuni keno pa ye I vechewo xülu nani.

⁵⁸ Hiye kungugha lono iqighi keu sho ke. Nongu pù-asüqo ye manna chu no thive ke, ikemu khukhumu asho hipau no lojí keu ye lhokta xüache nani.”

⁵⁹ Jisü ye Capernaum lo synagog lo kütsü ake lono hipau tsa pike.

Apapemi Kutomo no Jisü Pheve

⁶⁰ Hipau chilu kelo pa papemiqo kutomo no ishi pi, “Hiye ighono kushokütsü kükütsü shi ani. Khuu no hi ikhikulupu kea?”

⁶¹ Pa papemiqo no hipau tsa lo nhenheshi akeu ithive püzü Jisü no panongu vilo pi, “Hiye nongu mlo shipüsava keshea?

⁶² Tishiaye tsalá Timi Nu no püzüu pa no achekeu-a lo ikuve keu nongu no ithulu aye kíshive nani kea!

⁶³ Aghungu no aküxü tsü cheni; ashi ye kiumu kihi akepu kühae. I no nongu vilo pive keu tsaqo ye Aghungu eno aküxü no chhitoi ani.

⁶⁴ Tishimu nongu dolo pülümo kemi khami ani.” Kughengu Jisü ye abothu lono khipaqo no pa pülümo eno khuu no pa thechu shi nani keno ithi ake.

⁶⁵ Pa no ishi pikibe, “Hi ghenguno Apù no shilupemo ke thaqhülo ye timi khumu I lau ighi mülae ipi I no nongu vilo pivae.”

⁶⁶ Hipau do thiu ye pa papemiqo kutomo no idechile wove eno pa papemove.

⁶⁷ Jisü no pano chighikini vilo iniju, “Nongu ghí wove nishi ani keshea?”

⁶⁸ Simon Peter no pa khochile, “Ampeu, lhokta küxüpu tsaqo O gholo anike ningu ye khuu lau wuni kea?

⁶⁹ No ye Alhou’w Akimtheu Lakhi kepi ningu no ithivea eno pülüluvae.”

⁷⁰ Ike Jisü no khochile, “Ni ye nongu Chighikini kishelu ke kumo keshea? Ikemu nongu dolo lakhi ye tüghami ke!”

⁷¹ (Jisü ye Simon Iscariot nopu Judas khuu Chighikini dolo lakhi shi anamu, kutou pa thechu shive niye akeu ghili pi ake.)