John 5 - Sümi Tiqhelimi Bible

Azükhe lo Shipivi Keu

¹ Ado hami thiu Jisü no Jewmi’w tiqhitini lakhi lo sǘ niye Jerusalem lo iqho.

² Ike Jerusalem lo Ambe Khagho phivilo azükhe lakhi ae, tiye Arameami tsau no Bethesda ipi cheni eno tiye atsükucho pungu no ajò shi homüxa no küzüpe ache.

³ Hilehi aphi-au apukhu kinitave kemi kutomo no ihozü ache—tiye anhethi kighichemi, apukhu kinitave kemi, eno aphimpi ithamlave kemiqo.

⁴ Panongu ye azü küghütha khea. Kughengu ado-ado lo Ampeu’w kungumi lakhi no iqighi püzü azü xukutho cheke. Eno timi khuu no atüghishi azü küghütha keu lo iloni keno kiu-kiu küsǜ lono sǜ aghimu viluve cheke.

⁵ Tilehi timi lakhi ampe shighi tache sǜ ache.

⁶ Kughou Jisü no pa no tilehi ihozü akeu ithulu eno pa ye ado kushuwa tilehi vimla no achekeu ithive keno Jisü pa vilo ishi iniju, “No ye viluve nishi anima?”

⁷ Aküsüu hu no khochile, “Akijeu, ni ye azü xukutho ke ghuloki lo timi khumu I kuphu sasü azükhe lo iloni kemi kühae. I no ilo niye pükapütsa ake dolo no kütami no I züu no ilove chenie.”

⁸ Ikelo Jisü no pa vilo pi, “Ithuvelo! O züa ikhiqhe no alà chelo.”

⁹ Paikhavi lono timi hu ye vive; pa no pa züa ikhiqheluve no alà chesü wuve. Shikipivi kümlà hipau shikeu ye Sabbath tsalà lono ke,

¹⁰ ikehu Jewmi sakiphemiqo no viluve keu vilo ishi pi, “Ishi ye Sabbath tsalà ke; ayeza kiqi lo no ye O züa pewu müla nanie.”

¹¹ Ikemu pa no khochile, “I shipivi keu timi hu no I vilo ishi pike, ‘O züa ikhiqhe no alà chelo.’ ”

¹² Ike panongu no pa vilo iniju, “O vilo O züa ikhiqhe no alà chelo ipikeu timi hipau ye khuu kea?”

¹³ Viluve keu timi hu ye pa shipivi keu ye khuu keno kitilamu mthae, kughengu Jisü ye tilehi aqokitikhi akeu dolo tsüghǜ ilove ke.

¹⁴ Ado hami thiu Jisü no achineki lo pa ithulu no pa vilo ishi pi, “Julo, no ye viluvae. Axiné shi kevilo tishimo aye alhoküsa hinguno aküsàu O shou ikughi nosake.”

¹⁵ Timi hu no wuve püzü Jewmi sakiphemiqo vilo pa shipivi tsü keu ye Jisü ke ipi pive.

Anu’w Kükagha

¹⁶ Ike Jisü no Sabbath tsalà lono thime hipaqo shikeu ghenguno Jewmi sakiphemiqo no pa pishi-puju thuve.

¹⁷ Pa süsho ghi Jisü no panongu vilo pi, “I pù ye ishí tsalà kutólo tamo no pa kümlà shi achenie, eno ni ghí mülà anie.”

¹⁸ Hipau vehu ghenguno Jisü pìthíve nikeu lo panongu ye alau pükapütsa auve. Kughengu pa ye Sabbath yeza hebide keu likhi kumo püzü pa ye Alhou vilo pa likhi Papù ipi ku keu vechewo pa pesü Alhou qhemi lo qhike.

¹⁹ Jisü no hitoi khokichile panongu tsü: “Kuchou no I no nongu vilo pìní, Anu ye pa likhi pa kutoshi kiumu shimlae; pa ye Papù no mülà keu kiu ithulu keno tilikhi shilu nani, kughengu Apù no kiu shi keno Anu ghí tipau shi cheni.

²⁰ Kughengu Apù no Anu kimiye cheni eno pa no mülà keu kümtsü Anu pìye cheni. Iye, eno pa ye hinguno akümlà kijè alau Anu pìye nani, tishianguno nongu pelo akümzaqhiyive pe nani ke.

²¹ Kughengu Apù no kithimi xüputhu no aküxü panongu tsü keu toi, Anu ghí pa no tsünishi kemiqo aküxü tsü chenie.

²² Tinguno alau, Apù ye khuu shoumu küghathabe chemoe, ikemu küghakütha kümtsü Anu pichevetsüae,

²³ tishianguno kümtsü no Apù gihu cheke toi Anu gihu peniye ke. Khukhumu Anu gihumo keu ye Apù khuu pa puwu keno pa ghí gihu chemoe.

²⁴ “Kuchou no I no nongu vilo pìní, khukhumu I tsa chilu püzü I puwu keu pülüni keno lhokta küxü ithulu nani eno küghathabemo nani ikemu akithí vechesü aküxü lo ikuvae.

²⁵ Kuchou no I no nongu vilo pìní, ado lakhi cheni eno itehi hi ighivea, ike tiye kithimi no Alhou Nu sütsa chilu nani eno khunoqo no tipau chiluni keno xülu nani.

²⁶ Kughengu Apù no pa lolo aküxü akeu toi, pa no Anu ghí alolo aküxü alu pe nikeu zà tsüvae.

²⁷ Eno Apù no küghathalu penike kükagha pa tsüvea kughengu pa ye Timi Nu hu ke.

²⁸ “Hipau lo akümza kevilo, kughengu ado lakhi cheni, tiye akumoki lo akemiqo kümtsü no pa sütsa chilu

²⁹ püzü khalau ipeghi nikeu ke. Akümlà kivi shi kemiqo pelo xü penike xüputhuve nani, eno küsakügha kümlà shi kemiqo kiléqhive nike xüputhuve nani.

³⁰ I likhi I vechewo ni ye kiumu shimlae; Ni ye I no chilu keu likhi küghathabe cheni, eno iw küghakütha ye achipi ke, kughengu ni ye I likhi I pulou kumo püzü I puwu keu pulou shini keu phu chenie.

Jisü Shepeqo

³¹ “Tsalá I no I likhi I shepe shi aye, I shepe ye kuchou kumoe.

³² Kütami lakhi I saphu ghi I shepe shitsü chekeu ani, eno pa no I shepe shitsü keu ye kuchou kepi I no ithi anie.

³³ “Nongu ye John lau aghinimi puwue eno pa no kuchou shepe shivea ke.

³⁴ Ni ye timi shepe ikhilu akeu ghenguno kumoe; ikemu nongu pelo xaluve penike ghenguno pi anie.

³⁵ John ye akulu lakhi no iqü püzü aküvü tsü keu ke, eno nongu no pa küvü lo aloinolu nike ghenguno ado hami kishelu ke.

³⁶ “Ni ye John nguno ashepe akimishiu anie. Kughengu I no itehi müla akeqo ye Apù no I pelo shiqhive penike akümlà tsü keqo ke eno tino Apù no I puwu kepi ashepe shitsü ani.

³⁷ Eno Apù khuu I puwu keno pa likhi pa no I shepe shitsü ke. Nongu ye khilemu pa sütsa chimla aphi momu pa ju ghola ithumla aphi,

³⁸ momu pa tsa nongu lolo ngo chemoe, kughengu nongu no pa no puwu keu shou pülümo ke.

³⁹ Nongu no azükini shi Kuchoyesüqo phi cheni kughengu nongu no tilehi no lhokta küxü ani pi kümsü cheni ke. Kuchoyesü hipaqo no I shepe shitsü ani,

⁴⁰ tishiaghimu nongu no I lau ighi püzü aküxü aluve nikeu milive ke.

⁴¹ “Ni ye timiqo lau no shekiqhe ikhilu chemoe,

⁴² ikemu I no nongu ithi ani. Nongu mlo lo Alhou kikimiye küha keu I no ithi anie.

⁴³ Ni ye I pù je vechewo ighi ani, ikemu nongu no ni ikhilumo ke; tsalá khuala no pa likhi pa je lono ighi aye, nongu ye pa ikhilu nanie.

⁴⁴ Nongu ye lakhi no lakhi lau sheqhe keu ikhilu cheni ikemu shekiqhe Alhou lau likhi no ighi chekeu ye phumo ke kíshi no pülüni kea?

⁴⁵ “Ikemu ni ye Apù zülo nongu nguku nani kepi kümsü kevilo. Nongu ngukuni keu ye Moses ke, nonguw lajupuqo ye pa shou bepe anie.

⁴⁶ Nongu no Moses pülü cheghi aye, nongu ye I pülüni cheke, kughengu pa no I ghili yè ke.

⁴⁷ Ikemu nongu ye pa no yè keu papú pülümo ke kíshi püzü I no pikeu pülüluni kea?”