John 4 - Sümi Tiqhelimi Bible

Jisü no Samariami Totimi Lakhi Sasü Küptsa Keu

¹ John nguno alau shi Jisü no akhopemi hekütsülu eno baptiz shitsü ani ipi Phariseemiqo ye chiluva ipikeu Jisü no ithive—

² tishimu kuchou lo ye Jisü no kumo püzü pa khopemiqo no baptiz shitsü ake.

³ Ikehu Jisü ye Judea qhive no itaghi ghuthu lakhi Galilee lo idewove.

⁴ Pa ye Samaria kathasü wu kepu shive.

⁵ Tighenguno pa ye Samaria lo Sychar ipikeu mishiphu lakhi lo ighi, tiye Jacob no ayeghido kitila pesü panu Joseph tsü keu phivilo ke.

⁶ Jacob zükikhi tile ae, eno Jisü ye kicheghüzü shiche kehu akulhoshive no azükikhi phivilo iqa ngo ae. Tiye puchomghü ghuloki shi ake.

⁷ Kughou Samariami totimi lakhi no azü peniye ighi keno, Jisü no li vilo pi, “O shikimthi azü I piyé nima?”

⁸ (Pa khopemiqo ye mishiphu lo achuqupu qhü niye wuve ke.)

⁹ Samariami totimi hu no Jisü vilo pi, “No ye Jewmi lakhi eno ni ye Samariami totimi lakhi ke. No ye kíshi no I vilo azü khu ani kea?” (Kughengu Jewmiqo ye Samariamiqo sasü kühali chemo ke.)

¹⁰ Jisü no li khochile, “Tsalá nono Alhou no tsü keu ghò ithi aghí eno khuu no O vilo azü khu ani keno pa ithi aghí ke aye, no ye pa vilo aküxüpu zü khuni cheke eno pano ti O tsüní cheke.”

¹¹ Totimi hu no pi, “Akijeu, no ye azü shophe kepu kiumu küha eno azükikhi ye thonhei anike. No ye khile no aküxüpu zü hipau ithulu nani kea?

¹² Ningu papù Jacob no azükikhi ningu tsü eno pa ampi no hile no azü ye, eno pa nuliqo ngò paw atsǘ-aquqo ghí hile no azü ye ke. No ye pa nguno akijeu keshea?”

¹³ Jisü no khochile, “Azü hipau yelu kemi kümtsü tüghüthi kitheve nani,

¹⁴ ikemu khukhumu I no tsü keu zü ye kemi ye tüghüthi kithemo nani. I no azü panongu tsü keu hu no panongu lolo lhokta küxü zü qò ipeghi anani.”

¹⁵ Totimi hu no pa vilo pi, “Akijeu, ni ye tüghüthi kithemove püzü azü penike ghenguno hilehi ighi keu shimove nike azü hipau I tsülo.”

¹⁶ Pa no li vilo pi, “Wolo, eno O kimi ku püzü ideghilo.”

¹⁷ “Ni ye akimi kühae,” ipi li no khochile. Jisü no li vilo pi, “Nono akimi küha ipi akeu ye achipi shi ani.

¹⁸ Kuchou lo ye no ye akimi pungu acheke, eno itehi nono sasü akeu kipitimi hu ye O kimi kumoe. Nono itehi kiu pi keno tiye kuchou ke.”

¹⁹ Totimi hu no pi, “Akijeu, no ye tungkupumi lakhi kepi I no ithivae.

²⁰ Ningu pù-asüqo ye naghuto hipau lono mülá cheke, ikemu nongu Jewmiqo no ningu ye Jerusalem lono Alhou mülá moayesa ipi pükha cheni ke.”

²¹ Jisü no khochile, “Totimio, I pülülo, kughengu nongu ye naghuto hipau lo ke kumo no Jerusalem lomu Apù mülámove nikeu do wo chenie.

²² Nongu Samariamiqo ye nongu no mtha keu mülá achenie; ikemu ningu ye ningu no ithi akeu mülá acheni, kughengu xakulu ye Jewmiqo lau no ighike.

²³ Tishiaghimu ado lakhi cheni eno tiye ighivae, tiye kuchou no mülá chekemiqo no Aghungu eno kuchou lono Apù mülá nani, kughengu panongu ye Apù no phu chekeu kümlamíqo ke.

²⁴ Alhou ye Aghungu ke, eno pa mülá chekemiqo ye Aghungu eno kuchou lono mülá moayesa ke.”

²⁵ Totimi hu no pi, “Ni ye Messiah (Khristo ipi ku chekeu) ighi nani ipikeu ithi anie. Kughou pa no ighini keno, pa no thowkha ningu vilo hepho-piye nanie.”

²⁶ Jisü no asheshu, “Ni, O pütsa akeu hu ye pa ke.”

Akhopemiqo no Jisü gholo Ideighi

²⁷ Tishi akelo pa khopemiqo ye ideghive eno pa no totimi lakhi sasü küptsa aghí keu ithulu no shishe akichiqhive. Ikemu khunomu, “No ye kiu avehupu shi ani kea?” momu “No ye kushiye li pütsa ani kea?” ipi inijumoe.

²⁸ Tile no li no azü’w alikoli pe chekeu qhive püzü mishiphu lo idewove no timiqo vilo pi,

²⁹ “Ighilo, I no mülàpüa keu kümtsü I vilo pivetsü keu timi julo. Hino Messiah shi aghí nani keshea?”

³⁰ Panongu no mishiphu lono ipeghino Jisü lau wu.

³¹ Tishi akelo Jisü khopemiqo no pa vilo, “Rabbi, kiula chulo,” ipi qhüiniju ke.

³² Ikemu Jisü no panongu vilo pi, “Ni ye nongu mtha keu chuqu chu kepu anie.”

³³ Ikelo pa khopemiqo dolo ishi iniju kilé, “Timi khami no achuqupu süghi no pa tsüke o?”

³⁴ Jisü no pi, “I puwu keu pulou shikeu eno pa kümlà shiqhiveni keu no I chuqu ke.

³⁵ Nongu ye aholetsa lakhi ishi anike kumo keshea, ‘Ghile hu nikeu aqhi bidí likhivae’? I no nongu vilo pìní, nongu nhethi tsükho no aluqo julo! Tipaqo ye nivea eno ghile do tovae.

³⁶ Itehimu timi khuu no ghile hu keno ajume lu cheni eno lhokta küxü ghenguno athì pekütsü cheni, tishianguno vesü keu ngò ghile hu keu pama alovi küqha niye ke.

³⁷ Ikehu aholetsa, ‘Lakhi no vesü eno kütami no ghile hu cheni,’ ipikeu ye kuchou ke.

³⁸ Nongu no mülàmo keu lo ghile hu peniye I no nongu puwu ke. Kütamiqo no aghime shimlave keu lo nongu no panongu ghime xathi xoluve no alá shiluvae.”

Samariami Kutomo no Pülüluve

³⁹ Totimi hu no, “I no mülàpüa keu kümtsü pa no I vilo pive ke,” ipi ashepe shikeu ghenguno mishiphu tipau lo akemi Samariamiqo kutomo no Jisü pülüluve.

⁴⁰ Ike kughou Samariamiqo no Jisü lau ighi keno, panongu no Jisü vilo panongu gholo ngove tsülo ipi auve, ikehu Jisü no panongu gholo atsala kini ngove.

⁴¹ Eno pa kükütsü tsa ghenguno timi kutomo no küpülümi shiluve.

⁴² Panongu no totimi vilo pi, “Ningu ye nono kiu pi keno tipau ghengu likhi no pa pülü keu shimovae; itehi ye ningu ampi no pa tsa chiluvae, eno ningu no timi hipau ye kuchou no ayeghilomi’w Xakuluu kepi ithivae.”

Jisü no Hiyampemi Lakhi Nopu Shipivi

⁴³ Atsala kini thiu Jisü ye Galilee lo wuve.

⁴⁴ (Ike Jisü ampi no tungkupumi lakhi ye pa likhi pa punugha lo agigihu küha ipi ke.)

⁴⁵ Pa no Galilee lo ighi kelo Galileemiqo no alokivishi pa sasü. Panongu ye Jisü no Jerusalem lo Hechekulu ghulhu Tiqhitini ghuloki lo müla keu kümtsü ithulu ke, kughengu panongu ghí tilehi wuke.

⁴⁶ Jisü ye itaghi Galilee lo mishiphu Cana xujue, tiye pano azü pe atsaizü kughulhove keu-a ke. Tilehi akükau nobolomi hiyampemi lakhi nopu sǘve no Capernaum lo ae.

⁴⁷ Kughou timi hipau no Jisü ye Judea lono Galilee lo ighi ani pi chilu keno, pa no Jisü lau wu püzü pa vilo ighino panu akithí kumlho shi sǜ akeu shipivi tsülo ipi qhüiniju.

⁴⁸ Jisü no pa vilo pi, “Nongu ye amichipu ngò akümzapuqo ithulumo kelo ye khilemu pülümo nani ke.”

⁴⁹ Akükau nobolomi hiyampeu no pi, “Akijeu, I nu thi mphi züu no iqighi tsülo.”

⁵⁰ Jisü no khochile, “Wolo, O nu ye xü nanie.” Timi hu no Jisü no pikeu tsa pülüve püzü wuve.

⁵¹ Pa no alà lo chephi lono pa qemiqo no panu ye xünia ipikeu sütsa pesü pa sasü kushoe.

⁵² Panu no viluve keu do pa no iniju kelo, panongu no pa vilo, “Ighina puchou ayì lakhi kihe lono aghakimiki kühave ke,” ipi.

⁵³ Ikelo apù ye Jisü no pa vilo, “O nu ye xü nanie,” ipikeu do mtsa lono panu ye viluve kepi kümsüchilelu. Ike pa eno pa kibolomiqo kümtsü no Jisü pülüluve.

⁵⁴ Hiye Jisü no Judea lono Galilee lo ighive kethiu amichipu kümlà shikeu akiniù ke.