John 3 - Sümi Tiqhelimi Bible

Jisü no Nicodemus Kütsü

¹ Ike Phariseemi lakhi pa je Nicodemus ipikeu ache, pa ye Jewmi yekipe mijekütsü mqo lo kihiküsümi lakhi ke.

² Pa no putho lono Jisü lau ighino ishi pi, “Rabbi, no ye Alhou lau no ighi keu kükütsümi lakhi kepi ningu ye ithi anie. Kughengu Alhou no timi lakhi gholo aghimo ke aye nono amichipuqo shi akeu ye khilemu shimlae.”

³ Jisü no khochile, “Kuchou no I no O vilo pìní, punú kithemo kelo ye khunomu Alhou kükaphu ithumla nani.”

⁴ Nicodemus no ishi iniju, “Timi lakhi ye kichimi shive no kíshi püzü punú kithelu nani kea? Mütsüqhei no panongu ye panoqo pazá tita lo punú nike ghenguno akiniù ilo kithe müla nanie!”

⁵ Jisü no khochile, “Kuchou no I no O vilo pìní, azü eno Aghungu lono punú kithemo kelo ye khunomu Alhou kükaphu lo ilo müla nani.

⁶ Ashi no ashi punú cheni, eno Aghungu no aghungu punú cheni.

⁷ I no O vilo, ‘No ye punú kithe moayesae,’ ipi akeu lo no ye akümzaqhiyi akepu kumoe.

⁸ Amlhü ye khile-khilemu pa no pulo keu-a lo fupuku chenie. No ye amlhü sütsa chilu cheni, ikemu no ye amlhü ye khilau no ighi momu khilau wucheni keno pi mülae. Ike Aghungu lono punú kitheve kemi kümtsü hitoi ke.”

⁹ Nicodemus no iniju, “Hiye kíshi no ishilu nani kea?”

¹⁰ Jisü no ishi pi, “No ye Israelmi’w shikükau shi püzü thime hipaqo vethalumo keshea?

¹¹ Kuchou no I no O vilo pìní, ningu ye nino ithi akeu pi cheni, eno ningu ye kiu ithulu keno tipau thopi shi cheni, ike tishi keghi nongu timiqo ye ningu shepe ikhilu chemoe.

¹² I no ayeghi lo ghiliqo pe O vilo pikeu thotsü pülümo aye no ye kíshi püzü I no kungugha ghiliqo pikeu pülüni kea?

¹³ Kungugha lono ighi keu Timi Nu hu kumo aye khunomu kungugha lo wuju mphie.

¹⁴ Moses no küghünamokeu-a lo apighi ikhiqhe puku keu hutoi, Timi Nu ghí ikhiqhe puku moayesa nanie,

¹⁵ tishianguno pa pülülu kemi kümtsü lhokta küxü ithulu peniye ke.”

¹⁶ Alhou no ayeghilomi kimiyekütü keu ghenguno pa Nu lakhi likhi akeu pesü tsüke, tighenguno khukhumu pa shou pülübelu keu ye pühavemo nani ikemu lhokta küxü ithulu nani.

¹⁷ Kughengu Alhou no pa Nu puwu keu ye ayeghilomi kiléqhi penike ghenguno kumoe, ikemu pa vechewo ayeghilomi xalu peniye ke.

¹⁸ Khuno no pa pülüni keno kiléqhivemoe, ikemu khuno no pülümo nike no kiléqhive aghí cheni kughengu panongu no Alhou Nu lakhi likhi akeu je shou pülümo ke.

¹⁹ Xakütha ye hike: Aküvü ye ayeghi lo ighivae, ikemu timiqo no aküvü kimiye nike züqhulo àküzǘ kimiye ke, kughengu panongu kümlàqo no küsakügha ke.

²⁰ Küsakügha shi chekemi kümtsü no aküvü mithi ke, eno panongu kümlàqo pepheve nikeu kümsà lau no aküvü lo ighi chemoe.

²¹ Ikemu khuno no amikucho shi xü cheni keno pano ye aküvü lo ighi cheni, tishianguno panongu no kiu müla keno tiye Alhou nhekithe lono müla ke ipi mütsümishei ithulu peniye ke.

John no Itaghi Jisü Shepe Shitsü

²² Hipathiu Jisü ngò pa khopemiqo no Judea phughi sükümxa lo ilo, tilehi pa no ado hami panongu gholo ngoe, eno pa no timiqo baptiz shitsüe.

²³ Ike John ghí Salim phivilo Aenon lo baptiz shi tsüae, kughengu tilehi azü kupukuno shi ake eno timiqo no baptiz shi niye ighi ake.

²⁴ (Hiye akughuki lo John sǘ mphi züu ke.)

²⁵ John khopemiqo ngò Jewmi khami dolo qhukimthe keu chine-chini vehu lo kütsala keu hami ipeghive.

²⁶ Panongu no John lau ighino pa vilo ishi pi, “Rabbi, timi lakhi O gholo Jordan hukukuu ngo akeu eno nono ashepe shitsü keu hu julo, pa ye baptiz shitsü ani eno kümtsü no pa lau wu anie.”

²⁷ Ike John no khochile, “Timi lakhi ye kungugha lono kiu tsüvea keno tilikhi ithulu nanie.

²⁸ I no, ‘Ni ye Messiah kumoe ikemu ni ye pa züu no puwu ke,’ ipikeu nongu likhi nongu no ashepe shilu nani.

²⁹ Külaliu ye külapu’w ke. Shompami khuu no külapuu khe eno ini cheni keno pa ye kughou külapuu sütsa chiluni keno alokiqi no chhitoive cheni. Alokivi tipau ye iw ke eno tiye kupukülaivae.

³⁰ Pa ye chuqumghai kitheve moayesa; eno ni ye chuninei kitheve moayesae.”

³¹ Khuu kunguu no ighi keno pa ye kümtsü nguno akiqheu ke; ayeghi lono ighi keu ye ayeghilomi ke, eno ayeghilomi toi pi acheni. Kungugha lono ighi keu kümtsü nguno akiqheu ke.

³² Pa ye pa no kiu chilu eno ithulu keno tipau shepe shike, ikemu khunomu pa shepe ikhilumoe.

³³ Tipau ikhilu kemiqo ye Alhou ye kuchou kepi akupulo shepe shive tsüae.

³⁴ Kughengu Alhou no khuu puwu keno pa ye Alhou tsa pi cheni, kughengu Alhou ye kihikütha küha no Aghungu tsü cheni.

³⁵ Apù ye Anu kimiye cheni eno thowkha kümtsü pa u lo sǘvetsüae.

³⁶ Khukhumu Anu shou pülü keu ye lhokta küxü ani, ikemu khukhumu Anu milive keu ye aküxü ithumla nani, kughengu panongu shou Alhou loghukighide acheni ke.