John 21 - Sümi Tiqhelimi Bible

Jisü eno Akümzapushi Akha Khalu keu

¹ Tipathiu Jisü no Galilee züghi phivilo itaghi pa khopemiqo lau ipeghi. Hipa ghola lono ipeghi ke:

² Simon Peter, Thomas (Didymus ipi chekeu), Galilee lo Cana lono ighi keu Nathanael, Zebedee nu James ngò John, eno akhopemi kütami kini panongu kümtsa ngo ae.

³ Simon Peter no panongu vilo, “Ni ye akha khau nike wuchea,” ipi kelo panongu no, “Ningu ghí O gholo wunie,” ipi. Ike panongu no wu püzü ashuka lo ilo, ikemu panongu ye tipau jì lo kiumu khamlave.

⁴ Inaqhe itheno Jisü ye azü mükü lo puthugho ae, ikemu akhopemiqo ye tiye Jisü kepi mtha no ae.

⁵ Jisü no panongu vilo pi, “Aküsàmiqo, nongu ye akha lakhimu khalu mphi keshea?” “Khalu mphie,” ipi panongu no khochile.

⁶ Jisü no pi, “Nongu khame pe ashuka ajeu küdau vesülo eno nongu no akha hami ithulu nanie.” Kughou panongu no tishi keno, panongu ye akha kutomo khalu keu ghenguno akhame sünhekide mülave.

⁷ Jisü no kimiye chekeu khopeu hu no Peter vilo pi, “Hiye Ampeu ke!” Pa no, “Hiye Ampeu ke,” ipikeu chilu kemtsa Simon Peter no paw hekuuphi pesü pa phi küzüluve (kughengu pa ye aphì xave no ake) eno azü lo ilhe ilove.

⁸ Akhopemi kütamiqo ghí ashuka gholo no akhame lo akha chhitoi sünhe pesü ighi, kughengu panongu ye azü mükü lono aunhekipishe 300 qhalo ake.

⁹ Kughou panongu no azü mükü lo ighi keno, amìyiqo piti iqü akeu shou akha ngò asho hami aghí keu ithulu.

¹⁰ Jisü no panongu vilo pi, “Nongu no itehi akha khalu keu khami peighilo.”

¹¹ Ike Simon Peter no ashuka lo idewo mili iku püzü akhame azü mükü lo sünhe pesü ighi. Akha kijè 153 hu no akhame chhitoi ake, ikemu akha tishi kutomo akeghi akhame ye ixümoe.

¹² Jisü no panongu vilo pi, “Ighino müzüvekütha chulo.” Ike akhopemiqo khumu pa vilo, “No ye khuu kea?” ipi inijuni keumu shimoe, kughengu pa ye Ampeu kepi panongu no ithi ake.

¹³ Jisü no ighino asho ikhilu püzü panongu tsüe, eno titoi akha ghí panongu tsüe.

¹⁴ Jisü ye akithí lono xüputhuve kethiu hino aküthüu shi pa khopemiqo lau ipeghi.

Jisü no Peter Sasüchile

¹⁵ Kughou panongu no chuqhive keno, Jisü no Simon Peter vilo pi, “John nu Simon, no ye thime hipaqo nguno alau I kimiye chenima?” Simon no pi, “Iyei, Ampeu, I no O kimiye chekeu nono ithi anie.” Jisü no pi, “Iw ambetiqo lojí lo.”

¹⁶ Itaghi Jisü no pi, “John nu Simon, no ye I kimiye chenima?” Pa no khochile, “Iyei, Ampeu, I no O kimiye chekeu nono ithi anie.” Jisü no pi, “Iw ambeqo tucho-mjo lo.”

¹⁷ Ghuthu aküthüu Jisü no pa vilo pi, “John nu Simon, no ye I kimiye chenima?” Jisü no ghuthu aküthüu ghi, “No ye I kimiye chenima?” ipi iniju keu lo Peter ye alosüve. Pa no pi, “Ampeu, nono thowkha kümtsü ithi anie; I no O kimiye akeu nono ithi anie.” Jisü no pi, “Iw ambeqo lojí lo.

¹⁸ Kuchou no I no nongu vilo pìní, kughou nongu no alhothe shiche keno nongu ye nongu kutoshi tiphimini pepu no nongu no wu nishi keu-a lo wuche; ikemu kughou nongu no kitemi shiveni keno nongu ye nongu u chhope ngo püzü kütami no nongu ghili kutotsü nani eno nongu no wuni shimo keu-a lo sawu nani.”

¹⁹ Jisü no hi pikeu ye Peter ye kiu ghola lono thive no Alhou juküvüpu shitsü nani keno tipau kichetsü ake. Tipathiu pa no Peter vilo pi, “I papelo!”

²⁰ Peter no idewo ju kelo Jisü no kimiye chekeu akhopeu hu panongu pape chekeu ithulu. (Hiye aghulhu chu akelo Jisü thikhau mungupe no, “Ampeu, khuu no O pesü thechu shi niye ani kea?” ipi iniju keu ke.)

²¹ Kughou Peter no pa ithulu keno, pa no iniju, “Ampeu, pa ye kíshi nani kea?”

²² Jisü no khochile, “Tsalá I no ideghimo ke kutólo pa pelo xüaghi penishi aye, no ye kiu shilo pi kepu ania? No ye I pape moayesae.”

²³ Hi ghenguno, akhopeu hipau ye thimo nani ipi küpülümiqo dolo uyewu tsa kügha wove. Ikemu Jisü ye pa ye thivemo nani ipi pimoe; Jisü ye, “Tsalá I no ideghimo ke kutólo pa pelo xüaghi penishi aye, no ye kiu shilo pi kepu ania?” ipikeu likhi pike.

²⁴ Thime hipaqo thopi shi eno yèpeqhi keu ye akhopeu hipau ke. Paw thopi ye kuchou kepi ningu no ithi anie.

²⁵ Jisü ye thime kütau ghí kutomo shike. Tsalá tipaqo kümtsü yèpe qhike aye, I no kümsüju kelo kaku yèpeqhi keu tipaqo pesü ayeghiqha kuchopu lo qhi kepu chebo kühave nanie.