John 2 - Sümi Tiqhelimi Bible

Jisü no Azü pe Atsayizü Kughulho

¹ Atsala aküthüniu Galilee lo Cana ipikeu phu lo külakupu lakhi shia. Ikelo Jisü pazá ghí tilehi ae,

² eno külakupu lo Jisü ngò pa khopemiqo ghí kusü pe püae.

³ Kughou atsaizü kühave keno, Jisü pazá no pa vilo ishi pi, “Panongu ye atsaizü kühavae.”

⁴ Jisü no khochile, “Totimio, no ye I vilo kiu piani kea? I do ye ighi mphie.”

⁵ Pazá no lokijimiqo vilo pi, “Pa no nongu vilo kiu shilo pi keno tipau shilo.”

⁶ Tipau phivilo Jewmiqo no qhukimthe keu chine-chini ghenguno peitha chekeu atu no mülà keu alikoli tsügho ghope püa, alikoli lakhi lo azühu muku ngò shighi dolo pichhilu cheke.

⁷ Jisü no lokijimiqo vilo pi, “Azü pesü alikoliqo shepichhi lo”; ike panongu no amütsü kutólo pichhive.

⁸ Tisheno pa no panongu vilo pi, “Itehi ye azü khami shophe pesü lokijimi shou atou lau pewu lo.” Panongu no tishie,

⁹ eno lokijimi shou atou no azü pesü atsaizü kughulhove keu michejue. Lokijimi khunoqo no azü sholu keno panongu ye ithi ae, ikemu lokijimi shou atou ye azü khilau no süghi keno vethamlave. Tisheno pa no külapuu ku sawo

¹⁰ no pi, “Kümtsü no atüghishi atsaizü kishe pesü akiviu peighi cheni eno inamiqo no aghakiqi shi yeve kethiu no atsaizü ame kümlá shikeu peighi chenie; ikemu no ye itehi kutólo atsaizü akiviu msá pe püanie.”

¹¹ Jisü no hile Galilee qhalo mishiphu Cana lo kiu shi keno tiye pa juküvü pephe-piye keu michipuqo gholo atüghiu ke; ikelo pa khopemiqo no pa shou pülüluve.

¹² Hipathiu pa ye pazá ngò pa thiküzümiqo eno pa khopemiqo gholo no Capernaum lo iqive. Panongu ye atsala hami ghenguno tilau ngove.

Jisü no Achineki Khalaqo Shikimthe

¹³ Kughou Jewmi Hechekulu ghulhu do kupunúve keno, Jisü no Jerusalem lo iqho.

¹⁴ Jisü no achineki khala lo timiqo no pichepighi, ambe eno miqheduqo je aghí keu ithulu, eno kütamiqo no kibepu lo iqa no pisa kili aghí keu ithulu.

¹⁵ Ike pa no akighikipiliqo pesü aküküzapu lakhi müla püzü timiqo gholo no ambe eno pichepighi kümtsü achineki khala lono hapheve; pa no pisa kikilimiqow ghükayiqo kutholeve tsü eno panonguw kibepuqo tukulove tsü.

¹⁶ Miqhedu je akemiqo vilo pa no ishi pi, “Hipaqo pesü hile no ipevelo! I pù ki pesü alhikishi-a kughulho kevilo!”

¹⁷ Pa khopemiqo no hitoi yèpüa keu kümsülu: “O chineki ghenguno alomsü keu hu no I pitipüzaqhi nanie.”

¹⁸ Tipathiu Jewmiqo no Jisü khochile, “Hipaqo kümtsü shikulupu kükagha akeu kimchitsü nike ghenguno no ye kiu amichipu ningu pìyelu nani kea?”

¹⁹ Jisü no panongu khochile, “Achineki hipau kuboleve lo. I no atsala küthü dolo no itaghi hipau müla pukuve tsü nanie.”

²⁰ Panongu no khochile, “Achineki hipau müla puku nike ampe lhobidi tsügho lue, eno no ye atsala küthü dolo no achineki hipau müla pukuve niye keshea?”

²¹ Ikemu pa no achineki ipi akeu ye pa phimpi pi ake.

²² Akithí lono pa xüputhuve kethiu, pa khopemiqo ye pa no kiu pi akeno kümsüchilelu. Tisheno panongu no Kuchoyesü ngò Jisü no piakeu tsaqo shou pülübelue.

²³ Ike pa no Jerusalem lo Hechekulu ghulhu Tiqhitini lo akelo timi kutomo no pa no amichipuqo shikeu ithulu no pa shou pülübeluve.

²⁴ Ikemu Jisü ye pa likhi pa pesü panongu shou pükhübemoe, kughengu pa ye timi kümtsü ithi ake.

²⁵ Pa ye timiqo shepe kiumu avehupu shimoe, kughengu pa ye timi lakhi-khi lolo kiu akeno ithi ake.