John 17 - Sümi Tiqhelimi Bible

Ajuküvüpu Shilu Penike Ghenguno Jisü no Inikhu

¹ Jisü no hipau pive kethiu pa no kungugha küdau jupuku no inikhu: “Apùo, ado hu ye ighivae. O Nu juküvü shitsülo, tishianguno O Nu pelo O juküvü shi tsülu pe kepu shi.

² Kughengu nono timiqo kümtsü shou kükagha puloza pesü pa tsüke eno pa pelo lhokta küxü pesü nono pa tsüke miqo kümtsü lau tsülu peniye ke.

³ Lhokta küxü ye hike: no kuchou Alhou ithi nikeu eno nono puwu keu Jisü Khristo ithi nikeu ke.

⁴ Ni ye nono I pichetsü keu kümlà shikupulu keu vechewo ayeghi lo ajuküvü pe O tsüke.

⁵ Ike itehi ye, Apùo, ayeghi lho mphi züu O gholo I juküvü achekeu pe O zülo no I juküvü shitsülo.

Jisü no Pa Khopemiqo ghenguno Inikhu tsü

⁶ “Ayeghilomi khunoqo ikhiphe pesü I tsü keno tipaqo lau I no O je pephe-piyevae. Panongu ye ow ke; no no panongu pe I tsü eno panongu no O tsa ghokulu shike.

⁷ Itehi panongu ye no no I tsü keu kümtsü O lau no ighi keu ke ipi ithivae.

⁸ Kughengu nono I tsü keu tsaqo panoqo tsüke eno panongu no tipaqo ikhilue. Panongu ye mütsüqhei no ni ye O lau no ighi kepi ithi ani, eno panongu ye nono I puwu kepi pülüluve ake.

⁹ Ni ye panoqo ghenguno inikhu ani. Ni ye ayeghiqha ghenguno inikhu amoe, ikemu nono khunoqo pe I tsü keno panongu ghenguno inikhu ani, kughengu panongu ye ow ke.

¹⁰ I no akeu kümtsü ow ke, eno nono akeu kümtsü iw ke. Eno panongu vechewo ajuküvü I lau ighike.

¹¹ Ni ye ayeghi lo ngo ani chemoe, ikemu panongu ye ayeghi lo aphie, eno ni ye O lau chenie. Apù Akimtheu, O je küká vechewo panongu süsho tsülo, aje tiye nono I tsü keu ke, tishianguno nikujo no lakhi shi ake toi panongu ghí lakhi shilu peniye ke.

¹² I no panongu gholo akelo, I no panongu süsho eno nono aje I tsü keu pesü panongu sükusho shipe qhike. Kuchoyesü shikupu nike ghenguno ti lakhi pühaveni keu shi akeu kütsakungove keu kumo aye khumu pühave keu shi mphie.

¹³ “Niye itehi O lau chenie, ikemu panongu pelo panongu lolo alokiqi akimighi chhitoi alu penike ghenguno I no ayeghi lo panongu gholo aphi lono thime hipaqo pi anie.

¹⁴ I no O tsa pesü panongu tsüvae eno ayeghilomi no panongu mithi ke, kughengu I no ayeghi laumi kumo ketoi panongu ghí ayeghi laumi kumovae.

¹⁵ I no inikhu akeu ye O pelo panongu pesü ayeghi lono ikhisüwuve penike ghenguno kumoe ikemu küsakügha lau no panongu süsho tsü penike ghenguno ke.

¹⁶ I no ayeghi laumi kumo ketoi panongu ghí ayeghi laumi kumovae.

¹⁷ Kuchou vechewo panoqo shikimthe tsülo kughengu O tsa ye kuchou ke.

¹⁸ Nono ayeghi lo I puwu keu toi, I no panongu pesü ayeghi lo puwuvae.

¹⁹ Panongu pelo kuchou no ikhiphe pe tsü penike ghenguno ni ye I likhi ni ikhiphe pe tsüvea ke.

Jisü no Küpülümi Kümtsü ghenguno Inikhu

²⁰ “Ni ye panongu ghengu likhi no inikhu anike kumoe. I no inikhu akeu ye khuno no panongu kükütsü sütsa vechewo I pülüni keno tipaqo ghengu ghí inikhu anie,

²¹ Apùo, nono I lolo ake toi eno I no O lolo ake toi, panongu kümtsü pelo lakhi shilu pelo. Panongu ghí nikujo lolo apelo tishianguno ayeghilomi pelo nono I puwu kepi pülülu penike.

²² Nono ajuküvü I tsü keu pesü I no panongu tsüvae, tishianguno nikujo no lakhi shi akeu toi panongu ghí lakhi shi ape niye ke—

²³ I no panongu lolo ani eno nono I lolo ani—tishi keu vechewo panoqo pelo qhoi küqhakulu shilu peniye ke. Tishianguno ayeghilomi ye nono I puwu eno nono I kimiye ketoi panongu kimiye kepi ithi nani.

²⁴ “Apùo, ni ye nono khunoqo pesü I tsü keno panoqo pelo I no khilehi ani keno tile I gholo ape nishi ani eno I juküvü ithulu penishi ani, tiye nono ajuküvü I tsü keu ke, kughengu nono ayeghi pulhosü mphi züu no I kimiye ke.

²⁵ “Achipi shi chekeu Apùo, ayeghilomi no O mtha aghí namu, I no no ithi ani, eno panongu ye nono I puwu kepi ithi anie.

²⁶ I no panongu pelo O je ithivepe ae, eno tamo no no ithi ape nani tishianguno nono kikimiye I ghenguno akeu toi panongu lolo apenike, eno ni ampi no panongu lolo ape niye ke.”