John 15 - Sümi Tiqhelimi Bible

Atsayibo eno Alokaqo

¹ “Ni ye atsaibo kuchou ke, eno I pù ye atsailukichiu ke.

² Pa no I lolo athi pithímo keu lokaqo kümtsü micheve cheni, eno aloka athi pithí akeqo kümtsü pelo alau kutomo pithílu penike ghenguno pa no kixiphe chenie.

³ I no nongu vilo pive keu tsa vechewo nongu ye mitheluvae.

⁴ I gholo kimepe achelo kughengu ni ghí nongu gholo kimepe anike. Aloka ye pa likhi pa kutoshi athi pithílu chemoe; tiye atsaibo gholo kimepe aghí moayesa ke. Titoi nongu ghí I gholo kimepemo ke thaqhülo ye athi pithí mülae.

⁵ “Ni ye atsaibo eno nongu ye alokaqo ke. Nongu no I gholo kimepe aye eno I no nongu gholo aye, nongu ye axathi kutomo pithí nani; I sümo kelo nongu ye kiumu shimlae.

⁶ Nongu no I gholo kimepemo aye, nongu ye aloka peve püzü thizümüive keu toi ke; aloka tipaqo ye kiche pesü ami lo vesüve no pitive cheni.

⁷ Nongu no I gholo kimepe aye eno I tsaqo no nongu lolo aye, nongu no kiu-kiumu pulo keu khulo, eno nongu ghenguno tipau shitsü nani.

⁸ Nongu no athi kutomo pithí keu hu no nongu ye I khopemiqo kepi pìyelu cheni eno hipau vechewo I pù juküvüpu shitsü cheni ke.

⁹ “Apù no I kimiye ketoi, ni ghí nongu kimiye ke. Itehi ye iw kikimiye gholo kimepe alo.

¹⁰ I no I pù zakütsüqo pape no paw kikimiye gholo kimepeke toi nongu no I zakütsüqo pape aye nongu ye iw kikimiye gholo kimepe anani.

¹¹ I no nongu vilo hi piakeu ye I lokiqi nongu lolo apenike eno nongu lokiqi kupukülailu peniye ke.

¹² I zakütsü ye hike: I no nongu kimiye ketoi nongu lakhi no lakhi kimiyekilé lo.

¹³ Timi lakhi no paw shompamiqo ghenguno pa küxü tsüve keu kikimiye nguno akijeu kühae.

¹⁴ Nongu no I no azah tsü keqo pape aye nongu ye iw shompamiqo ke.

¹⁵ Ni ye nongu vilo aqemiqo ipi kuchemovae, kughengu aqemi lakhi ye pa mpeu kümlàqo ithi chemoe. Tishini ke züqhulo, I no nongu vilo shompamiqo ipi ku cheni, kughengu I no I pù lau no shikalu keqo kümtsü I no nongu pelo ithivepe ake.

¹⁶ Nongu no I kishelu ke kumoe, ikemu I no nongu kishelu eno nongu pelo wu no axathi ado kushuwa pithí chekeu pithipe niye süküsü shilu ke eno tishi keu vechewo nongu no I je lono kiu-kiumu khu aye I pù no nongu tsü nani.

¹⁷ I yeza ye hike: Lakhi no lakhi kimiye lo.

Ayeghiqha no Akhopemiqo Mithi ke

¹⁸ “Ayeghiqha no nongu mithi aye ayeghiqha ye I mithi paghi kepi nongu mlo lo qhilo.

¹⁹ Nongu no ayeghiqha’w shi aghí aye ayeghiqha ye paw toi nongu kimiye nani. Nongu ye ayeghiqha’w kumoe, ikemu I no ayeghiqha lau no nongu kishepheluvae. Tighenguno ayeghiqha no nongu mithi ke.

²⁰ I no nongu vilo kiu pi keno kümsülulo: ‘Aqemi lakhi ye pa mpeu nguno akijeu kumoe.’ Panongu no I pishi-puju aye, panongu ye nongu ghí pishi-puju nani. Panongu no I kükütsü gholu aye, panongu ye nongu kükütsü ghí gholu nani.

²¹ I je ghenguno panongu no hitoi nongu pishi-puju nani, kughengu panongu ye khuu no I puwu keno mtha ke.

²² I no ighino panongu vilo pimo ke aye panongu ye panongu xiné phumlani cheke; ikemu itehi ye panongu ye panongu xiné ghenguno ajeku kühavae.

²³ I mithi chekemi ye I pù ghí mithi chenie.

²⁴ Khunomu shimo keu akümzapu kümlàqo I no panongu gholo shimo ke aye panongu ye panongu xiné kühani cheke. Panongu ye ti ithuluve ake, tishi keghi panongu ye I pù ghí eno ni ghí mithi cheni ke.

²⁵ Ikemu hiye panongu Yeza lo ishi yèpüa keu shikupu nikeu ghenguno ke: ‘Panongu no ajeku küha no I mithi ke.’

Aghungu Kimthe Kümlà

²⁶ “Kughou I no Apù lau no puwu keu Shikumtokütsüu—Apù lau no ighi keu kuchou Ghungu—ighini keno pa no I shepe shi nani.

²⁷ Eno nongu ghí I shepe shi moayesa nani, kughengu nongu ye abothu lono I gholo ake.”