John 12 - Sümi Tiqhelimi Bible

Bethany lo Jisü Nukishe Keu

¹ Jisü ye Hechekulu ghulhu tonikeu atsala tsügho akelo pa no akithí lono xüputhuve keu Lazarus no ngo chekeu-a Bethany lo ighi.

² Tilehi Jisü gihu ghi avela ghulhu lakhi kutò tsüe. Martha no lojia, eno Lazarus ye Jisü gholo kibepu lo mungupe akemiqo gholo ngoa.

³ Ike Mary no lekitemo keu nard abo chhitoi keu ikhilu, tiye amekusho xokütsüngü ke; li no ti pesü Jisü pukhu lo lepuku tsü no li sà no pa pukhu isüve tsü. Ikelo axokütsüngü xo hu no aki kichhi shive.

⁴ Ikemu pa khopemiqo dolo itou pa thechu shive niye akeu Judas Iscariot no pa lachile ghi ishi pi,

⁵ “Kushiye axokütsüngü hipau jeve püzü jelu keu pisa pesü kumlhomiqo tsüvemo kea? Tiye ampe lakhi jume qhemi ke.”

⁶ Pa no hi pikeu ye kumlhomi ghenguno alokümsü akeu ghenguno kumoe ikemu pa ye küpkami lakhi ke ghenguno ke; pa no pisabo kipeu kehu tile kiu sǘ keno pa no pa vehupu shiluve cheke.

⁷ Jisü no khochile, “Li püna kevilo. Li no shi akeu hiye I sükumo kuqho tsalà ghenguno axokütsüngü hipau müsape qhitsü anike.

⁸ Athokhami ye alhokuthu nongu gholo ache nani, ikemu ni ye alhokuthu nongu gholo aní keu kumoe.”

⁹ Tishi akelo Jewmi timi kutomo no Jisü ye tile akeu ithive no ighi. Panongu ye Jisü ghengu likhi no kumo püzü Jisü no akithí lono xüputhuve keu Lazarus ghí ju niye ighike.

¹⁰ Ike achinetomiqo no Lazarus ghí pìthíve niye aküpüghü shie,

¹¹ kughengu Lazarus ghenguno Jewmi kutomo Jisü shou pülübe no pa lau wuve ke.

Jisü ye Akükau toi Jerusalem lo Ighi

¹² Tishiwo thoghiu timi kutomo tiqhitini ghenguno ighi akemiqo no Jisü ye Jerusalem lo cheni ipikeu chiluve.

¹³ Panongu no amsabo lokaqo ikhilu no pa sasü kusho nike ishi igha sü wue, “Hosanna!” “Khuu no Ampeu je lono cheni keno pa ye akümghau ke!” “Israel kükau ye akümghau ke!”

¹⁴ Jisü no khurha lhothe lakhi ithulu no tipau shou iqa, tiye Kuchoyesü lo ishi yèpüani ke:

¹⁵ “Msà kevilo, Zion Ngá; julo, O kükau ye khurhati lakhi shou iqa no chenie.”

¹⁶ Atüghi lo pa khopemiqo ye hipaqo lakhimu vethamla no ake. Jisü no ajuküvü shive kethiu likhi no hipaqo kümtsü pa ghili yèpüa keu eno pa lau shive keu kepi panongu no kümsüchilelu ke.

¹⁷ Kughou pa no akumo lo Lazarus ku eno akithí lono pa xüputhu keno tile aqokitikhi pa gholo akemiqo no tipau tsa pesü veküpha auve.

¹⁸ Timi kutomo no pa no amichipu kümlà hipau shikeu chilu keu ghenguno pa sasü kusho niye wu.

¹⁹ Ikehu Phariseemiqo no lakhi no lakhi vilo ishi pi, “Julo, ningu ye hiye kiumu shimlavae. Ayeghiqha kuchopu no kíshi pa pape auvea keno julo.”

Jisü no Pa Kithí Ghili Pichho

²⁰ Ike tiqhitini lo mülá niye iqho kemiqo dolo Greekmi khami ghí ae.

²¹ Panongu no Bethsaida nó ghami Galilee lono ighi keu Philip lau qhüiniju keu lakhi pesü ighi. Panongu no qhüiniju ghi pi, “Akijeu, ningu ye Jisü ju nishi anie.”

²² Philip no wu no Andrew vilo pi; eno Andrew ngò Philip pama no Jisü vilo pi.

²³ Ikelo Jisü no khochile, “Timi nu juküvüpu shini keu tüqhüdo ighivae.

²⁴ Kuchou no I no nongu vilo pìní, athì lothi lakhi ye ayeghi lo ikiqi ilo no thivemo ke thaqhülo tiye athi likhi athoshi acheni. Ikemu tsalá tipau no thive aye, tino athi kutomo pithí cheni.

²⁵ Khukhumu pano küxü kimiye keu ye pühave nani, ikemu khukhumu ayeghi hipau lo pano küxü mithive aye lhokta küxü ananie.

²⁶ I qe chekemi ye I pape moayesa; eno I no khile ani keno, I qemi ghí tile anani. I qe chekemiqo ye I pù no gihu nani.

²⁷ “Itehi ye I mloküsa shivae, eno ni ye kiu pìní kea? ‘Apùo, asüchedo hipau lono I xalulo ipini keshea’? Moe, ni ye asüchedo hipau ghenguno ighike.

²⁸ Apùo, O jekipipu shipelo!” Ikelo kungugha lono asütsa lakhi ighi, “Ni ye tipau juküvüpu shivae, eno itaghi tipau juküvü shitsü nanie.”

²⁹ Tile aqokitikhi akeqo no ti chilu no hiye tsütsü-küsü ke ipi; kütamiqo no hiye kungumi no pa pütsa anie ipi.

³⁰ Jisü no pi, “Asütsa hipau ye nongu pelo alá shilu penike ghenguno thono I ghenguno kumoe.

³¹ Itehi ye ayeghiqha shou küghatha nikeu do shivae; eno itehi ye hipau yeghiqha kükapuu hapheve nani.

³² Eno kughou I süqheveni keno, I no timi kümtsü I lau sünhe sasü ighive nani.”

³³ Jisü no hipau pikeu ye pa ye kiu ghola lono thive niye ani keno pi ake.

³⁴ Aqokitikhi no ishi pi ipeghi, “Ningu no Ayeza lono chilu keu ye Messiah ye pülhapuju acheuve nani ipie, tishiaye no ye kíshi no, ‘Timi nu ye süqheve moayesa nani,’ ipi ani kea? ‘Timi Nu’ ipi akeu hiye khuu kea?”

³⁵ Tisheno Jisü no panongu vilo pi, “Aküvü ye ado kitila ghengu likhi nongu gholo aniae. Àküzǘ no nongu theqhive mphi züu, aküvü ake lono alà chelo. Khunoqo no àküzǘ lo checheni keno panongu ye khila wucheni keno mthae.

³⁶ Nongu gholo aküvü aphi lono aküvü pülüluve lo, tishianguno nongu pelo aküvü nuli shilu peniye ke.” Kughou pa no atsa pitave keno, Jisü ye wuve no panongu lau no ithsüve.

Jewmiqo Dolo Küpülümi eno Pülümo Kemiqo

³⁷ Jisü no panongu nhekithe lono amichipu kümlà kutomo shi kethiu ghí panongu ye pa shou pülümoe.

³⁸ Ike hiye Isaiah tungkupuu tsa shikupu niye ke: “Ampeu, khuu no ningu kükütsü sütsa pülü tsü kea eno khunoqo lau Ampeu küká pephe-piye kea?”

³⁹ Hi ghenguno panongu ye pülü müla ke, kughengu Isaiah no a-a kütau ishi yèpüani:

⁴⁰ “Pa no panoqo nhethi kighicheve tsü, eno panoqo mlo shikümkave tsüke, ghenguno panongu nhethi nomu ithulu kepu shimo nani, momu panongu mlo nomu vethamla nani, momu xaideghimo nani—eno I no panongu shipivi tsü nani.”

⁴¹ Isaiah ye Jisü juküvü ithulu keu ghenguno Jisü ghili hipau pike.

⁴² Tishi namu tipau lo timi kutomo eno sakiphemiqo dolo ghí pa shou pülüluve. Ikemu panongu ye Phariseemiqo no panongu pesü synagog lono hapheve nikeu kümsà lau no panongu ye pekiphe shi panongu küpülü shuphemoe;

⁴³ kughengu panongu ye Alhou no sheqhe keu nguno alau timi no sheqhe keu kimiye cheni ke.

⁴⁴ Tisheno Jisü no ighamuku pi, “Khukhumu I shou pülübeluve keu ye I shou likhi pülü anike kumoe, ikemu khuu I puwu keno pa shou pülü ani.

⁴⁵ Timi khuu no I shou jupuku ani keno pa ye I puwu akeu ithulu ani.

⁴⁶ I pülü kemiqo pelo àküzǘ lo ngo pemo nike ghenguno ni ye aküvü lakhi shi püzü ayeghi lo ighivae.

⁴⁷ “Tsalá khuala no I tsaqo chilu püzü tipaqo papemo namu ni ye timi tipau shou küghathabemo nani. Kughengu ni ye ayeghiqha shou küghathani ye ighike kumoe ikemu ayeghiqha xalu niye ighike.

⁴⁸ Khuu no I miliveni eno I tsa ikhilumoni keno panongu ghenguno küghakütha ani; I no pive keu tsa hu no ashekha tsalà lo panoqo kiléqhive nani.

⁴⁹ Kughengu ni ye I likhi I ghò shi pichemoe, ikemu I no piakeu kümtsü Apù khuu I puwu keno pa no I vilo pilo pi azah tsüve keu ke.

⁵⁰ I no ithi akeu ye pa yeza no lhokta küxüpu lo sawu cheni. Ike I no kiu pi cheni keno tiye Apù no I vilo pilo pikeu ke.”