John 11 - Sümi Tiqhelimi Bible

Lazarus Kithí

¹ Ike timi lakhi Lazarus ipikeu ye sǜ ae. Pa ye Mary ngò pa tsünipu Martha pama phu Bethany lo ache kemi ke.

² (Mary hipau ye tsüngqüi keu thazü pesü Jisü shou lepuku püzü li sà pesü pa pukhu isüve tsü keu hu ke, ike li pèu Lazarus ye sǜ akehu ihozü ae.)

³ Ike pama atsünipu no Jisü lau hitoi asütsa tsüpuwu, “Ampeu, nono kimiye chekeu ye sǜ anie.”

⁴ Jisü no hipau chilu kelo ishi pi, “Aküsǜ hipau ye akithí shivemo nani. Moe! Hiye Alhou juküvüpu ghenguno ke, tishianguno hipau vechewo Alhou Nu juküvü shilu peniye ke.”

⁵ Jisü ye Martha ngò li tsünipu eno Lazarus ishi kimiye cheke.

⁶ Ikemu kughou pa no Lazarus sǜ akeu chilu keno, pa no khile ngoa keno tilehi itaghi atsala kini ngove,

⁷ eno tisheno pa no pa khopemiqo vilo pi, “Ningu Judea lo idewoni shilo.”

⁸ Akhopemiqo no khochile, “Rabbi! kusho kumo lo tilehi Jewmiqo no atu pesü O ve niye pükapütsa keghi no ye tishimu tilau idewoni keshea?”

⁹ Jisü no khochile, “Ayì kihedo chighikini atsala vü acheni ke kumo keshea? Khukhumu atsala küvü lo cheche kemi ye küpüxalumo nani, kughengu panongu ye ayeghi hipau küvü vechewo ithulu cheni.

¹⁰ Ikemu kughou timi no putho lono alà cheni keno panongu no küpüxalu cheni, kughengu pano ye aküvü küha ke.”

¹¹ Pa no hi pive kitheu, pa no panoqo vilo kibe ghi pi, “Ningu küsàu Lazarus ye zühuvae; ikemu ni ye pa küdaputhu nike tilau wucheni.”

¹² Pa khopemiqo no khochile, “Ampeu, tsalá pa no zü aghí aye pa ye alo kitheve nanie.”

¹³ Jisü ye Lazarus kithí ghili pia, ikemu pa khopemiqo no kümsü keu no pa ye alhoaye lono zü achekeu piani küghashive ke.

¹⁴ Ike pa no mütsümishei panongu vilo pi, “Lazarus ye thivae,

¹⁵ eno nongu ghenguno I no tila aghimo keu hu no I lovi ani, tishianguno nongu pelo pülülu peniye ke. Ike ningu pa lau wuni shilo.”

¹⁶ Tipathiu Thomas (Didymus ipi ghí ku chekeu) no akhopemi kütamiqo vilo pi, “Ningu ghí wuni shilo, tishianguno ningu ghí Ampeu gholo thive kepu shini ke.”

Jisü no Lazarus Pafo pama Lokughuno tsü

¹⁷ Pa no ighi kelo Lazarus ye akumoki lo atsala bidí ngo keu aghí keu Jisü no phulu.

¹⁸ Ike Bethany ye Jerusalem lono mile kini nguno akughukhou ghüzüla ke,

¹⁹ eno Jewmi kutomo no ighino Martha ngò Mary pama no apèu kühave keu lo pama lokughuno tsü nike ighi.

²⁰ Kughou Martha no Jisü cheni ipikeu sütsa chilu keno, li no pa sasü kusho nike khalau ipe, ikemu Mary ye aki lo ngove.

²¹ Martha no Jisü vilo pi, “Ampeu! Nono tsalá hilau ngo aghí ke aye I pèu ye thimoni cheke.

²² Ikemu itehimu Alhou vilo nono kiu-kiumu khu aye O tsü nani kepi I no ithi anie.”

²³ Jisü no li vilo pi, “O pèu ye akiniù ithughive nanie.”

²⁴ Martha no khochile, “Pa ye ashekha tsalà lo xülekuthu shi kelo itaghi ithughive nani kepi I no ithi anie.”

²⁵ Jisü no li vilo pi, “Ni ye xülekuthuu eno aküxü ke. Khuu no I pülüni keno panongu ye thive namu xüluve nanie;

²⁶ eno khukhumu I pülü keu vechewo xüni keno khilemu thivemo nani. No ye hipau pülü anima?”

²⁷ Li no khochile, “Iyei, Ampeu, no ye Messiah, Alhou Nu, khuu ayeghi lo ighi niye shi akeno tipau ke ipi I no pülü anie.”

²⁸ Li no hi pive kethiu, idechile wu no li tsünipu Mary ku no pi, “Akükütsüu ye hile ani püzü no ighiju anie.”

²⁹ Kughou Mary no ti chilu keno, li no paikhavi puthughove no pa lau wuve.

³⁰ Ike Jisü ye ti kutólo aphu lo ilomo no ae, ikemu Martha no khile pa sasü kusholu keno tilehi ngo ake.

³¹ Mary lokughuno tsü niye li ki lo ngoa akemi Jewmiqo no li no paikhavi puthugho no khalau wuve keu ithulu kelo, li ye akumo lo mloqa niye wucheni küghashi kümsüve püzü panongu no li papesü wue.

³² Kughou Mary no Jisü no ngo akeu tove püzü pa ithulu keno, li no pa pukhuphi lo ikiqi no pi, “Ampeu, tsalá nono hila ngo aghí ke aye I pèu ye thimoni cheke.”

³³ Jisü ye Mary eno li gholo Jewmi ighi akeqo ghí qa akeu ithulu püzü alokhümüive eno amloghime shive.

³⁴ Pa no iniju, “Nongu ye khilehi pa qhopüani kea?” Panongu no khochile, “Ampeu, ighino julo.”

³⁵ Jisü no qa.

³⁶ Tipathiu Jewmiqo no pi, “Pa ye kiutoi Lazarus kimiyeche keno julo!”

³⁷ Ikemu panongu khami no pi, “Pa ye anhethi kighichemi nhethi xukhove tsü püzü timi hipau pelo thive pemo kepu shimlave keshea?”

Jisü no Akithí lono Lazarus Xüputhuve

³⁸ Jisü ye itaghi alokhümüyive no akumoki lo ighi. Akumoki ye atuki lakhi eno tipau ikulola ye atuqu lakhi pesü nhapepüa.

³⁹ Jisü no pi, “Atuqu ikhive lo.” Ikelo Lazarus akithiu pafo Martha no ishi pi, “Ikemu, Ampeu, itehi ye axo lhoküsa münave aghíni ae, kughengu pa ye tilehi atsala bidí qhivea ke.”

⁴⁰ Ike Jisü no ishi pi, “Tsalá nono pülü aye, no ye Alhou juküvü ithulu nani ke ipi ni ye O vilo pike kumo keshea?”

⁴¹ Ikehu panongu no atuqu ikhive. Tisheno Jisü no pishipuku ju no pi, “Apùo, nono I kighini chilutsü keu ghenguno O shikimthi.

⁴² No ye alhokuthu I kighini chilutsü cheni kepi I no ithi anie, ikemu ni ye hilehi puthugho akemiqo kivipu ghenguno hi piani, tishianguno nono I puwu kepi panongu pelo pülülu peniye ke.”

⁴³ Kughou pa no hi pive keno, Jisü no asütsa kuloghi lono, “Lazarus! khalau ipeghi lo,” ipi.

⁴⁴ Thive keu timi hu no phephei keu phì no pa phi-au küzü no chijepu sü aphì lakhi no pa gi vehomxa pesü khalau ipeghi. Jisü no panongu vilo pi, “Akumo phìqo xaqhive tsülo eno pa pelo wuve pelo.”

Jisü Pìthíve Niye Kümüqü Keu

⁴⁵ Mary xuju niye ighi kemi Jewmiqo ye Jisü no müla keu ithulu püzü pa shou pülüluve.

⁴⁶ Ikemu panongu khami no Phariseemiqo lau wu püzü Jisü no mülà keu ghili pesü panongu vilo pive.

⁴⁷ Ikelo achinetomi eno Phariseemiqo no Jewmi Hoho kukütsü püzü no aküküpütsa shi. Panongu no ishi iniju, “Ningu ye kíshiveni kea? Timi hipau no hilehi amichipu kümlà kutomo shi anie.

⁴⁸ Tsalá ningu no pa pelo hitoi shiauve pe aye, kümtsü no pa shou pülüveni cheni, eno tisheno Rommiqo no ighi püzü ningu chineki eno ni shiye kinikujo pesü wuve tsüní chenie.”

⁴⁹ Ikelo panongu gholo Caiaphas ipikeu khuu tipau mpe lo achinetomiqo shou atou shi akeno, pa no ishi pi ipeghi, “Nongu ye kiumu ithi amoe!

⁵⁰ Nongu ye shiye kuchopu pühaveni keu züqhulo timi lakhi no timiqo kümtsü ghenguno thive keu no akiviu kepi vethalu amoe.”

⁵¹ Pa ye pa kutoshi no atsa hipau pimoe, ikemu pa no tipau mpe lo achinetomiqo shou atou shi ake lono Jisü ye Jewmi shiye ghenguno thive nani kepi tungkuptsa kütüghütsü ke,

⁵² eno tiye shiye tipau ghengu likhi no kumoe ikemu Alhou nuli apanaghave no akeqo ghenguno ghí ke, tishi keu vechewo panongu kümtsa süghi no lakhi shitsü niye ke.

⁵³ Ikehu atsala tipau thiu ye panongu ye Jisü küxü luve tsü niye kümüqü thuve.

⁵⁴ Tighenguno Jisü ye Jewmiqo zülo pekiphe shi iqho-iqi keu shimove. Tishini ke züqhu pa ye küghünamokeu-a phivilo aphu lakhi Ephraim ipikeu qhalo wu püzü pa khopemiqo sasü tilehi ngove.

⁵⁵ Kughou Jewmi Hechekulu ghulhu do kupunú ighive keno, timi kutomo no Hechekulu ghulhu züu no chine-chini kiqi lono shikimthe nike ghenguno hokümxaqo lono Jerusalem lo iqhoe.

⁵⁶ Panongu no tamo no Jisü phujua, eno panongu no achineki khala lo puthugho akelo panongu lakhi no lakhi vilo ishi iniju, “Nongu ye kíshi kümsü ani kea? Pa ye tiqhitini lo ighi niye shiamo keshea?”

⁵⁷ Ikemu achinetomi eno Phariseemiqo ye Jisü küghaluve nike ghenguno khukhumu Jisü no ngo akeu-a phulu aye asütsa pìthitsü penike azah tsüve no ake.