John 10 - Sümi Tiqhelimi Bible

Ambe Kheu Kiviu eno Pa Mbeqo

¹ “Phariseemiqo! Kuchou no I no nongu vilo pìní, khukhumu ambe khagho lono ambe khaküthabo lo ilomo püzü alaghi kütau lono milisü iloghini keno, pa ye küpkami eno süxakulumi lakhi ke.

² Khuu no khagho lono iloghini keno pa ye ambeu kheu ke.

³ Khagho kheu no pa ghenguno khagho khaqhi tsü cheni, eno ambe no pa sütsa ini cheni. Pa no ajeku ghí pa mbeqo ku püzü panoqo sasü khalau ipe cheni.

⁴ Kughou pa no paw ambeqo kümtsü khalau sasü ipeghiveni keno, pa no panoqo züu shi no wucheni, eno paw ambeqo no pa pape cheni kughengu panoqo no pa sütsa ithi anike.

⁵ Ikemu panongu ye khilemu tüsümi papemo nani ikemu panongu ye tüsümi lau no pove nani, kughengu panongu ye tüsümi lakhi sütsa kimchilu chemo ke.”

⁶ Jisü no kimghi keu tsa hipau peitha ghi pi, ikemu Phariseemiqo ye Jisü no panoqo vilo kiu pi akeno vethamlave.

⁷ Tighenguno Jisü no itaghi pi, “Kuchou no I no nongu vilo pìní, ni ye ambeqow khagho ke.

⁸ I züu ighi kemi kümtsü küpkami eno süxakulumiqo ke, ikemu ambeqo ye panoqo tsa ini tsümo ke.

⁹ Ni ye khagho ke; khukhumu I vechesü ilo kemi ye sükusho anani. Panongu no iloghi eno ipeve anani eno atsüni kümtsha phulu nani.

¹⁰ Küpkami ye püka, heqhipithí eno kütsakungo nike ghengu likhi no ighi cheni; I no ighi keu ye panongu pelo aküxü ape niye ke, eno aküxü tipau hu kupukuno shi ape niye ke.

¹¹ “Ni ye ambe kheu kiviu ke. Ambe kheu kiviu ye ambeqo ghenguno pa küxü tsüve cheni.

¹² Aqe kiqemi ye akheu kumo ke eno ambeqo pighi chemoe. Ike kughou pa no tüngtügha chekeu ithuluni keno pa ye ambeqo likhi qhive no pove cheni. Tisheno tüngtügha no ambe lojiqo le no hapiyepighive tsü chenie.

¹³ Timi hu ye pove cheni kughengu pa ye aqe kiqemi ke eno pa ye ambeqo ghenguno kiumu tucho-mjo chemoe.

¹⁴ “Ni ye ambe kheu kiviu ke; I no I mbeqo ithi ani eno I mbeqo no ni ithi ani—

¹⁵ tiye I pù no ni ithi eno I no I pù ithi akeu toi ke—eno I no ambeqo ghenguno I küxü tsüve cheni.

¹⁶ Ni ye khaküthabo hilehi küha keu ambe kütauqo anie. Ni ye panongu ghí süghi moayesa ani. Panongu ghí I sütsa ini nani, eno tilehi ye ambe loji lakhi ngò ambe kheu lakhi anani.

¹⁷ I pù no I kimiye keu hu ye I no I küxü pesü tsüve keu ghenguno ke—tiye xüleputhuveni keu ghengu likhi no aküxü tsüve ke.

¹⁸ Khunomu I lau no aküxü ikhiluve mülae, ikemu I no I ghò shi no ikhiphe pe tsüve anike. Ni ye ikhiphe pe tsü nikeu ngò ikhi chileluve kepu kükagha anie. Ni ye I pù lau no azakütsü hipau ithulu ke.”

¹⁹ Jewmi khunoqo atsa hipaqo chilu keno itaghi panongu dolo kijethave.

²⁰ Panongu kutomo no pi, “Pa ye tüghaküsa no tsüghape akemi eno aghüzünikhami ke. Kushiye pa tsa ini ani kea?”

²¹ Ikemu kütamiqo no pi, “Atsa hipaqo ye tüghaküsa no tsüghape akemi no piche keu tsa kumoe. Tüghaküsa ye anhethi icheve kemi nhethi khaqhilu nani keshea?”

Jisü no Pükha Keu Vehu lono Alau Küpüna Keu

²² Ikelo Jerusalem lo Ikhiphekütsü Tiqhitini ghuloki tove. Tiye süsü ghuloki shia,

²³ eno Jisü ye achineki khalau Solomon ki sheqho lo alà che ghi ae.

²⁴ Tilehi Jewmi akemiqo no pa homüxaluve no pi, “No ye ado khitohi ningu pelo avehu küghüzü shi apeni kea? Tsalá nono Messiah shi aghí aye mütsümishei ningu vilo pilo.”

²⁵ Jisü no khochile, “I no nongu vilo pike, ikemu nongu no pülümoe. I no I pù je lono müla keqo hu no I shepe shitsü cheni,

²⁶ ikemu nongu no pülümoe, kughengu nongu ye iw ambeqo kumo ke.

²⁷ iw ambeqo no I sütsa ini cheni; I no panongu ithi ani, eno panongu no I pape cheni.

²⁸ I no lhokta küxü panongu tsü, eno panongu ye khilemu pühavemo nani; khunomu I u lono panoqo süxa pewumo nani.

²⁹ I pù khuu no panoqo pesü I tsü keno pa ye kümtsü nguno akijeu ke; khunomu I pù u lono panongu süxa müla nani.

³⁰ Ni eno I pù ye lakhi ke.”

³¹ Itaghi Jewmi pa lachile chekemiqo no atu pesü pa veni ke ikhiqheluve,

³² ikemu Jisü no panoqo vilo pi, “I no I pù lau no akümlà kivi kutomo nongu pìyevae. Tipaqo ghenguno nongu ye atu pesü I veqhi niye ani keshea?”

³³ Panongu no khochile, “Ningu ye akümlà kivi ghenguno atu pesü O ve niye shi amoe, ikemu Alhou pipütha keu ghenguno ke, kughengu no ye timi lakhi keghi Alhou kepi pükha ke.”

³⁴ Jisü no panoqo khochile, “Nongu Yeza lo, ‘I no nongu ye “alhouqo,” ke ipi piva, ishi yèpüani ke kumo keshea?’

³⁵ Tsalá pa no Alhou tsa süghi kemiqo vilo ‘alhouqo,’ ipi ku cheni aye—Kuchoyesü ye akou qhivemlae—

³⁶ Imaye Apù no pakütashi pa likhi paw shiqhive no ayeghi lo puwu keu ye kíshiveni kea? Tishiaye nongu ye kushiye I no, ‘Ni ye Alhou nu ke,’ ipikeu ghenguno ni ye Alhou pipütha ani kepi I nguku ani kea?

³⁷ I no I pù kümlàqo shimo ke thaqhülo I pülü kevilo.

³⁸ Ikemu tsalá I no tipaqo shi aye nongu no I pülümo namu akümlàqo pülülo, tishianguno nongu no Apù no I lolo akeu eno I no Apù lolo akeu ithi no vethalu nani ke.”

³⁹ Itaghi panongu no Jisü küghaluve niye pükapütsa, ikemu pa no panongu pelo pa tsüqüluve pemo no pokajoluve.

⁴⁰ Tisheno Jisü ye John no hukuthu lo Jordan qhalo baptiz shi chekeu küdau idechile wove. Pa ye tilau ngove,

⁴¹ eno timi kutomo no pa lau ighi. Panongu no pi, “John ye khilemu amichipu kümlà lakhimu shimoe, ikemu pa no timi hipau ghili pikeu kümtsü kuchou ke.”

⁴² Ikelo tipau-a lo timi kutomo no Jisü pülüluve.