John 1 - Sümi Tiqhelimi Bible

Atsa hu no Ashi Shive

¹ Abothu lono Atsa hu ye ae, eno Atsa hu ye Alhou gholo ae, eno Atsa hu ye Alhou ke.

² Pa ye Alhou gholo abothu lono ae.

³ Pa vechewo thime kümtsü lhophe ke; lhosüpüa keu thimeqo lakhimu pa sümo no lhosü pe püamoe.

⁴ Pa lolo aküxü ae, eno aküxü tipau no timi jeli kümtsü ghenguno aküvü hu ke.

⁵ Aküvü hu no àküzǘ lo yepüvü, eno àküzǘ ye khilemu tipau küzüphove mülae.

⁶ Alhou no puwu keu timi lakhi pa je John ipikeu ache.

⁷ Pa vechewo timi kümtsü pelo pülülu penike ghenguno pa ye aküvü ghili pesü ashepe shipe nike ghenguno thopimi lakhi shisü ighie.

⁸ Pa ampi ye aküvü hu kumoe; pa ye aküvü’w thopi shini ke ghengu likhi no ighike.

⁹ Timi kümtsü lau aküvü tsü chekeu kuchou küvü hu ayeghi lo ighike.

¹⁰ Pa ye ayeghi lo ae, eno pa vechewo ayeghiqha lhophe kemu ayeghilomi no pa ikhilumoe.

¹¹ Pa ye pa likhi paw timiqo gholo ighike, ikemu pa likhi paw timiqo no pa ikhilumoe.

¹² Tishimu pa ikhilu kemiqo, eno pa je lo pülübelu kemiqo pelo Alhou nuliqo shilu pe nikeu chipiu tsüe—

¹³ panongu no Alhou nuli shilu keu ye timi lhoaye lono punúlu keu kumoe, tikumo no timiw xakütha momu timi pulou lono kumoe, ikemu Alhou vechewo ke.

¹⁴ Atsa hu no ashi shive eno ningu gholo xüke. Ningu no pa juküvü ithuluvae, ajuküvü tiye Anu lakhi likhi akeu ke, Anu ye küpükini ngò kuchou no chhitoi shi püzü Apù lau no ighike.

¹⁵ (John no pa vehu pesü ashepe shie. Eno pa no ighamuku pi, “I no pa ghili piakeu hu ye I no kughou, ‘Timi lakhi I shelo ighi niye akeu ye I nguno akiqheu ke, kughengu pa ye I züu no acheghivae,’ ipikeu hu ke.”)

¹⁶ Paw kupukülai keu ghenguno püzüu küpükini tsüve keu theli lo itaghi ningu kümtsü küpükini ithulu ke.

¹⁷ Kughengu ayeza ye Moses vechewo tsüke, ikemu küpükini ngò kuchou ye Jisü Khristo vechewo no ighike.

¹⁸ Khunomu Alhou ithumla aphie, ikemu Apù ye Anu lakhi likhi akeu lau pa pephe-piyevae, Anu ye Alhou ke eno pa ye Apù sasü kupunukhoi kütshükime pe acheni.

John Baptiz Kishiu no Messiah Kumoe pi Milive keu

¹⁹ Kughou Jewmi sakiphemiqo no Jerusalem lo achinemi ngò Levimiqo pelo John ye khuu keno iniju peniye puwu keno, John no hitoi pa shepe shie.

²⁰ Pa ye pipheni keu süchilevemoe ikemu, “Ni ye Messiah kumoe,” ipi vejoi pipheve tsüe.

²¹ Panongu no pa vilo iniju, “Tishiaye no ye khu kea? No ye Elijah keshea?” Pa no pi, “Ni ye Elijah kumoe.” “No ye Tungkupu hu keshea?” Pa no khochile, “Kumoe.”

²² Ashekha lo panongu no pi, “No ye khuu kea? Ningu puwu kemiqo lau pewo kepu shi khokichile ningu tsülo. O likhi no ye khuu ipi cheni kea?”

²³ John no Isaiah tungkupuu tsau no khochile, “Ni ye küghünamokeu-a lo ‘Ampeu ghenguno alaghi müzüchoi shitsülo,’ ipi akeu sütsa hu ke.”

²⁴ Ike Phariseemiqo no puwu kemiqo no ishi

²⁵ John vilo iniju, “Tishiaye no ye Messiah mu kumo, Elijah mu kumo momu Tungkupu mu kumo aye kushiye baptiz shitsü ani kea?”

²⁶ John no khochile, “Ni ye azü lono baptiz shi chenie, ikemu nongu no mtha keu lakhi nongu gholo puthugho anie.

²⁷ Pa ye I shelo ighi niye akeu ke, ni ye pa pukhukuqho kütsügha kighimu kuqho nike aküzüpu kumoe.”

²⁸ Hi kümtsü Jordan hukukuu Bethany lo John no baptiz shitsü akeu-a lono shikupu keu ke.

John no Jisü Shepe shitsü

²⁹ Tishiwo thoghiu Jisü no pa küdau chekeu ithulu kelo John no ishi pi, “Julo, Alhou’w Ambeti khuu ayeghilomi xiné pevetsü keno hi chenie!

³⁰ Hiye kughou I no, ‘Timi lakhi khuu I shelo ighini keno pa ye I nguno akiqheu ke, kughengu pa ye I züu no acheghivae,’ ipikeu ke.

³¹ I likhi ni ghí pa mtha ke, ikemu I no azü lono baptiz shi ighi keu kiqi ye Israel lau pa pephe-piye tsü nikeu ghenguno ke.”

³² Tisheno John no ashepe hipau tsü: “Kungugha lono Aghungu hu no miqhedu lakhi toi iqighi no pa shou ngo akeu I no ithulue.

³³ Eno I likhi ni ghí pa mtha ke, ikemu I pelo azü lono baptiz shipe nike I puwu keu no I vilo pi, ‘Timi khuu shou Aghungu ikighi no ngo keu no no ithuluni keno pa no Aghungu Kimthe lono baptiz shitsü nani.’

³⁴ I no ithuluvea eno thopi shi anike hiye Alhou Nu ke.”

John Khopemiqo no Jisü Pape

³⁵ Tishiwo thoghiu John ye itaghi pa khopemi kini sasü tilehi puthugho ae.

³⁶ Kughou Jisü no tipa-a kathasü wuche keu ithulu keno, John no ishi pi, “Julo, Alhou’w Ambeti!”

³⁷ Kughou John no hi pikeu chilu keno, akhopemi pama ye Jisü papesü wuve.

³⁸ Jisü no tsüghǜ idewo pama no pape chekeu ithulu no iniju, “Nokujo ye kiu avehupu shi ani kea?” Pama no pi, “Rabbi” (hipau kiqi ye “Akükütsüu”), “no ye khile ngo niye ani kea?”

³⁹ Jisü no khochile, “Ighilo, eno nokujo no ithulu nani.” Tiye avelau ayì bidí qhalo shi ake. Ike pama no wu püzü Jisü no ngo chekeu-a ithulu, eno pama ye tipau vela kupuju Jisü gholo puwove.

⁴⁰ Simon Peter thiküzüu Andrew ye timi kini dolo lakhi khuu John no kiu pi keno tipau chilu püzü Jisü pape wuve keu ke.

⁴¹ Andrew no thime atüghiu shikeu ye pamu Simon phu no pa vilo, “Ningu ye Messiah phuluvae” (tiye Khristo ke), ipi ke.

⁴² Eno pa no Jisü lau Simon saighi. Jisü no Simon ju no pi, “No ye John nu Simon ke. No ye Cephas ipi kuniae,” (aje hipau pebide kelo ye Peter ke).

Jisü no Philip ngò Nathanael Ku keu

⁴³ Tishiwo thoghiu Jisü ye Galilee lo wuni keu shive. Philip ithulu no Jisü no pa vilo pi, “I papelo.”

⁴⁴ Andrew ngò Peter toi Philip ye Bethsaida mishiphu lono ighi kemi ke.

⁴⁵ Philip no Nathanael ithulu püzü pa vilo ishi pi, “Ningu ye Moses no Ayeza lo timi lakhi ghili yèpüa keu eno khuu tungkupumiqo ghí pa ghili yèpüa keno pa ithuluvae—pa ye Nazareth nó ghami Joseph nopu Jisü ke.”

⁴⁶ Nathanael no ishi iniju, “Nazareth ya! Tilehi no kiula akivi ighilu nani keshea?” Philip no pi, “Ighi püzü julo.”

⁴⁷ Kughou Jisü no Nathanael no pa küdau chekeu ithulu keno pa no Nathanael ghili ishi pi, “Israelmi kuchou no hi chenie. Pa lolo pishikiqhi kühae.”

⁴⁸ “No ye kíshi püzü ni ithi ani kea?” ipi Nathanael no iniju. Jisü no khochile, “Philip no O ku mphi züu nono mububo qholo akelo nomu ni ye no ithuluvae.”

⁴⁹ Ikelo Nathanael no asheshu ghi ishi pi, “Rabbi, no ye Alhou Nu ke; no ye Israel kükau ke.”

⁵⁰ Jisü no pi, “No ye I no O vilo mububo qholo no ithulu ipikeu ghenguno pülü anie. Ikemu no ye thime tipau nguno akijeu ithuluni aphie.”

⁵¹ Tisheno pa no pikibe ghi pi, “Kuchou no I no O vilo pìní, nono ‘kungugha khaqhive no Alhou’w kungumiqo no Timi Nu shou iku iqi,’ akeu ithulu nanie.”