James 5 - Sümi Tiqhelimi Bible

Timi Qhaküsümi Kiními lau Pikichi Keu

¹ Itehi ye nongu kinímiqo no inilo, nongu lau aveküsa chekeu ghenguno qalo eno amloghuju shilo.

² Nonguw küakini ye tsümavae, eno amila no nongu phiminiqo tsakhavae.

³ Nonguw ameshoyi eno ghükayiqo ye ayisa no chuvae. Ayisa no chuve keu tipaqo no nongu lachile ghi thopi shi nani eno ami toi nongu shi chuve nani. Nongu ye ashekha tsalaqo lono aküakini pekütsüvae.

⁴ Julo! Nongu no akümlàmi khunoqo nongu luche lo atsüniqo gheve tsü keno tipaqo ajume tsümo keu ghenguno nongu lau igha qa anie. Ghile kuhumiqo küqa no Akughushuu Mpeu kìní tovae.

⁵ Nongu ye ayeghi lo kinikülü eno alikhi aghapiqi keu lo xü auvae. Nongu ye ghikiqhi tsalá ghenguno atha pubeyiluvae.

⁶ Nongu no akipimí küha kemi khunoqo nongu mjochile chemo keno tipaqo kiléqhive no ghiqhi pìthíve ke.

Aghime lo Kutuukulu

⁷ Tishiaye athiküzümi eno achelimiqo, Ampeu ighimo ke kutólo kheakulu shilo. Alukichiu no kíshi ayeghi lo ameküa tüxatini lhoipeghi penike ghenguno kutuu ghi mütsü ngò tsülu tsütsüghuqo khe acheni keno julo.

⁸ Nongu ghí kutuukulu shi no ithamo no puthugho lo, kughengu Ampeu ighi nikeu ye kupunúvae.

⁹ Athiküzümi eno achelimiqo nongu lakhi no lakhi lau nhenheshi kevilo tishiaye no ye küghathabeve nani. Küghaküthau ye ahukikha lo puthugho ani!

¹⁰ Athiküzümi eno achelimiqo, tungkupumi khunoqo no Ampeu je lono asheshu keno tipaqo pesü kiche-kipiye shi ikhilu no aghime gizülo kutuukulu shilo.

¹¹ Nongu no ithi akeu toi, ningu ye khunoqo no tsükhoi shi no aghime puqhelu keno tipaqo ye akümghau kepi kihi cheni. Nongu no Job’w tsükhoi keu ghili chiluvea eno Ampeu no ashekha lo kiu shive keno nongu no ithuluvea. Ampeu ye kimiyeqhiyi keu eno kimiyekini no chhitoi ke.

¹² Athiküzümi eno achelimiqo, kümtsü nguno alau, kungugha momu ayeghi momu kiu-kiumu pesü tushoqhi kevilo. Nongu no pi moayesa keu ye mülalei shi “Iyei” momu “Moe” likhi pi moayesae. Tishimo aye nongu kiléqhive nani.

Aküpülü Kighini

¹³ Nongu dolo khuala ye aküküpüna lo ani keshea? Panongu pelo akighini shipelo. Nongu dolo khuala alovi ani keshea? Panongu pelo sheqhe keu leqo phe pelo.

¹⁴ Nongu dolo khuala ye küsükini shi ani keshea? Panongu pelo akukuho lo kichimiqo ku no panongu shou akighini shi no thazü pesü Ampeu je lono panongu nukümtsha pelo.

¹⁵ Eno aküpülü lono akighini shikeu vechewo aküsǜu pelo viluve pe nani; Ampeu no panongu xüputhu nani. Tsalá panongu no axiné shipüaghi aye, panongu xiné qhivetsü nani.

¹⁶ Tighenguno nongu xinéqo pesü lakhi no lakhi vilo piphe lo eno nongu ye viluve nike ghenguno lakhi no lakhi ghenguno akighini shilo. Amikuchomi kighini lo aküka kijè eno shikulupu anie.

¹⁷ Elijah ghí ningu toi timi lakhi ke. Pa no tsüghu pemo nike ghenguno pulopiniyi inikhu kelo tipau yeghi lo ampe küthü tüxa ghuqhimove ke.

¹⁸ Itaghi pa no akighini shi, eno kungugha no tsütsüghu tsü, eno ayeghi lono tüxatiniqo ipeghi ke.

¹⁹ I thiküzümi eno I chelimiqo, tsalá nongu dolo timi lakhi no kuchou lono itsüsü wuve no timi khami no timi tipau sachile süghi kepu shi aye,

²⁰ hipau kümsüchilelu lo: Khukhumu axinemi lakhi shipimi keu laghi lo cheche keu lono sachile saighi aye axinemi tipaqo küxü akithí lono xalu anie, eno axiné kutomo pevetsülu kepu shilu anie.