James 4 - Sümi Tiqhelimi Bible

O Likhi O Pesü Alhou Tsülo

¹ Kiu ghenguno nongu dolo kiyi eno kütsala cheni kea? Tiye nongu lolo küsakügha kükümsü akeu tipau no aghüshi keu lono ighi cheni ke kumo keshea?

² Nongu no lunishi cheni ikemu küha, tighenguno ghiqhi cheni. Nongu no mine cheni ikemu nongu no kiu lunishi keno ithulu chemo, ikehu nongu no kiyi eno kichighi cheni. Nongu no Alhou vilo khumo ke ghenguno nongu ye küha ke.

³ Kughou nongu no khuni keno, nongu ye ithulu chemo, kughengu nongu no achipikumo kükümsüqo xapu khu cheni, tishi keu vechewo nongu no kiu lono alokivipu ithulu cheni keno tipau lo puwove niye khu cheni ke.

⁴ Nongu shupu chekemiqo, nongu ye ayeghiqha sasü shomipami shikeu kiqi ye Alhou lachile keu ghümi shi ani kepi mtha keshea? Tighenguno, khukhumu ayeghiqha sasü aküsàu lakhi shini ke kishelu keu ye Alhou ghümi shive cheni ke.

⁵ Ikeo nongu ye Kuchoyesü ye kiumu akiqi küha no Alhou no anheshuqhiyi aghungu ningu lolo qhitsü keu kümsükütü acheni kepi pipüani kepi kümsü ani kea?

⁶ Ikemu pa no küpükini alau ningu tsü cheni. Tighenguno Kuchoyesü lo ishi pipüani: “Alhou no aqheküzami lachile cheni ikemu aqhokighemi kimiye tsü cheni.”

⁷ Tishiaye O likhi O pesü Alhou qhoqhü lu lo. Tüghami mjochile lo, eno pa ye O lau no pove nani.

⁸ Alhou lau kupunú ighilo eno pa no nongu lau kupunú ighi nani. Nongu axinemiqo, nongu uqo mütsüvelo eno nongu mlo shikimthe lo, nongu amlo kini puche kemiqo.

⁹ Amlokighishi shi qalo, mloqa lo eno amloghuju shilo. Nongu kunú pesü mloküqa shive pelo eno nongu lokiqi pesü agi küzü shive pelo.

¹⁰ Nongu likhi nongu pesü Alhou zülo aqhokigheu shilo, eno pa no nongu xaqhe nani.

¹¹ Athiküzümi eno achelimiqo, nongu lakhi no lakhi pipüsa kevilo. Timi khuno no athiküzümi momu achelimi lachile keu tsa pi cheni momu panongu shou küghathabe cheni keno tiye ayeza lachile ghi piani eno küghatha anike. Kughou nono ayeza shou küghathabeni keno, no ye ayeza pape anike kumoe, ikemu tipau küghakütha shou iqa anike.

¹² Ayeza kütsüu eno Küghaküthau lakhi likhi ani, pa ye xaluve momu kütsave kulupu ani. Ikemu no ye—no khuu keno O kisüghümi shou küghathabeni kea?

Thoghiu Ghenguno Qheza Keu

¹³ Itehi ye inilo, nongu khuu no, “Ishí momu thoghiu ningu hipau momu hupau mishighüna lo wu no ampe lakhi tilau ngove no lhidi shia no pisa qeni,” ipi cheni kea.

¹⁴ Nongu ye thoghiu kiu shi nani keno mtha keghi kushiye ishi pi cheni kea. Nongu küxü ye kiu kea? Nongu ye akimhi lakhi no ado kitila ghenguno ipeghino tipathiu hauve ketoi ke.

¹⁵ Tishini ke züqhu, nongu ye, “Tsalá Ampeu pulou shi aghí aye, ningu ye xü aghí no hipau momu hupau shi nani,” ipi moayesa ke.

¹⁶ Tihutoi nongu ye nonguw akuchhoma kukughu lo qheza cheni ke. Hitoi keu qheküza kümtsü küsakügha ke.

¹⁷ Tishiaye, khuno no pa ye akivishi kepu shi akeu ithi anamu tipau shimoni keno, tiye pano ghenguno axiné ke.