James 3 - Sümi Tiqhelimi Bible

Amili Chhikughuvüni Keu

¹ I küsàmi küpülümiqo, nongu kutomo no kükütsümi shive kepu kumoe, kughengu nongu no ithi akeu toi ningu khunoqo no kütsü cheni keno ningu ye kütami nguno alau shi mükamüghai küghathabe nani ke.

² Ningu kümtsü alaghi jeli kutomo lo shipimive cheni. Timi khuno no pano no pikeu lo khilemu shipimi chemo keno pano ye kupukülai kemi ke, pano phimpi kuchopu ghasülü cheni ke.

³ Kughou khurshiqo pelo ningu gholu peniye akichi lo ayitachu khatsü cheni keno, ningu no lhoxü phimpi kuchopu khilau wu kepu keno sawulu cheni.

⁴ Momu kiche-kipiye lo zükiluqo julo. Zükiluqo ye ighono kijè shi aghí namu tipaqo ye amlhü kumto no sawuve cheni, eno tiye zükilu küsàu no helisa ighono kitila lakhi vechewo pa no khila wu nishi keno satsüghüsü wuve cheni.

⁵ Titoi, amili ye aphimpi lo thime aghulo lakhi ke, ikemu tiye ighono aqheküza shi cheni. Ami kiyiqü kitila lakhi no aghasü kijè pitive chekeu kümsüjulo.

⁶ Amili ghí ami lakhi ke, amili ye aphimpi dolo küsakügha yeghiqha lakhi ke. Amili no aphimpi kuchopu shikuchubeve cheni ke, timi lakhi küxü kupuju lo ami sǘvetsü cheni, eno amili ghí amiyizü mi no pitive cheni ke.

⁷ Lhoxü, aghau, itikiche, eno azüghi lo lhoxü jeli kümtsü chhikughuvü ghi acheni eno timiqo no chhikughuvü keu shijuvae,

⁸ ikemu timi khunomu amili chhikughuvü mülae. Amili ye ngosükümla küsakügha ke, tiye akithipu tüghü no chhitoi ke.

⁹ Amili vechewo ningu no ningu Mpeu eno Apù sheqhe cheni, eno amili tipau pesü ningu no Alhou julho lono lhosüpüa kemi timiqo ghusho cheni.

¹⁰ Akichi lakhi lono sheqhe keu eno ghusho keu ipeghi cheni. I thiküzümi eno I chelimiqo, hi shikepu kumoe.

¹¹ Azüpuki lakhi lono akungó zü eno amitì zü kinikujo qowu ipeghilu nani keshea?

¹² I thiküzümi eno I chelimiqo, mububo ye olive xathi pithílu nani keshea, momu atsaibo lakhi lono mubuthi pithílu nani keshea? Momu amitì züpuki lono akungó zü qowu ipeghi müla nani ke.

Alokütsü Ajeli Kini

¹³ Nongu dolo khuu no alokütsümi eno vethakulumi kea? Panongu pelo aküxü kivi vechewo ti pìye pelo, tiye alokütsü vechewo ipeghi chekeu aqhokigheu kümlàqo shilu keu vechewo no ke.

¹⁴ Ikemu tsalá nono O mlo lo mijimülai keu nhekushu eno alakimine kimiji ghakütsüpe qhi aye, tipau ghenguno qheza kevi momu kuchou milive kevilo.

¹⁵ Titoi keu “lokütsü” ye kungugha lono iqighi chemoe ikemu ayeghilow ke, tiye akimthe kumo eno tüghaküsa ghawu lau no ke.

¹⁶ Kughengu khilehi anhekushu eno alakimine kimiji ani keno, tilehi kübangü keu eno küsakügha kümlà jeli ithulu cheni.

¹⁷ Ikemu kungugha lono ighi chekeu lokütsü tipau ye atüghishi akimthe ke; tipau shelo külakishi kimiye keu, kümsükulu, aghokulu, kikimiye no chhitoi keu ngò axathi kivi, agikuju küha keu eno amikucho ke.

¹⁸ Külakishimi khunoqo no külakishi lono xusü cheni keno panongu ye achipiumikucho ghile hulu cheni.