James 2 - Sümi Tiqhelimi Bible

Agikuju Lakükha

¹ I thiküzümi eno I chelimiqo, ningu akughushu Mpeu Jisü Khristo pülü chekemiqo ye agikuju shikepu kumoe.

² Kümsüju kelo timi lakhi no nongu küküpütsa-a lo ameshoyi ngthi eno aphimini kivi pepu ighini, eno athokhami lakhi ghí niqhinighülai keu phimini aqa pepu ighi aye.

³ Eno tsalá nono aphimini kivi pepu akeu lau pakütashi amlotsüqhiyi no, “Hilehi O ghenguno alakhü kivi ani,” ipi no athokhau timi vilo, “No ye tilehi puthugho lo,” momu “I pukhu phivilo ayeghi lo iqalo,” ipi aye,

⁴ nongu ye nongu likhi nongu dolo kotha-letha anike kumo keshea eno küsakügha kükümsü xapusü küghaküthau shive anike kumo keshea?

⁵ I thiküzümi eno I chelimiqo, hi inilo: Alhou ye ayeghiqha nhethi lo khunoqo no athokhami keno panoqo pelo aküpülü lo kinikülü shi no khunoqo no pa kimiye cheni keno tipaqo lau akükaphu piqhipüa keu ighílu penike kishelu ke kumo keshea?

⁶ Ikemu nongu no athokhami gihumove ke. Kinímiqo no nongu haphe anike kumoe? Nongu sünhe pesü küghaki lo wu keu ye panongu ke kumo keshea?

⁷ Nongu no pülü chekeu akivimi je pipütha akeu ye panongu ke kumo keshea?

⁸ Tsalá nongu no Kuchoyesü lo akiqheu yeza, “O likhi O toi O kisüghümi kimiye lo,” ipi püakeu kuchou no pape aye nongu ye achipi shi ani.

⁹ Ikemu nongu no agikuju shi aye, nongu ye axiné shi ani eno ayeza heküxami toi ayeza no nongu akipimí tsü nani.

¹⁰ Kughengu khukhumu ayeza kümtsü papelu püzü lakhi likhimu qhiveni keno tiye ayeza kümtsü hebide anike.

¹¹ Kughengu khuu no, “No ye shupu kepu kumoe,” ipi keno pa no, “No ye ghiqhi kevilo,” ipikeu ghí pike. Tsalá nono shupu keu kümlà shimo kemu ghikiqhi kümlà shive aye, no ye ayeza hekibidemi lakhi shivae.

¹² Kuqhophelu keu yeza no küghathabe niye akemi toi atsa eno akümlà lono pìyelo,

¹³ kughengu khukhumu kimiyekini küha kemi lau ye kimiyekini pìyemo no küghatha nani. Kimiyekini no küghakütha shou tokulu shilu cheni.

Aküpülü eno Akümlàqo

¹⁴ I thiküzümi eno I chelimiqo, tsalá timi khami no aküpülü ani kepi pükha anamu akümlàqo küha aye tiye kiu akivi ani kea? Aküpülü titoi keu ye panongu xalu nani keshea?

¹⁵ Kümsüju kelo athiküzümi momu achelimi lakhi ye aphimini eno tsalà kipe chuqupu küha.

¹⁶ Tsalá nongu lakhi no panongu vilo, “Aloino ghi wolo; lüvüi ngo alo eno aloshi chu-sho alo,” ipi kemu panongu küxü lo avehupu shi akeu kiumu tsümo aye, tiye kiu alá ani kea?

¹⁷ Tipau tho lono, akümlà sümo aye aküpülü likhi ye akithí ke.

¹⁸ Ikemu timi khami ye ishi pi nani, “Nono aküpülü ani; I no akümlà ani.” Akümlàqo sümo no O küpülü I piyeju lo, eno I no I kümlàqo vechewo I küpülü O pìye nani.

¹⁹ Nongu no Alhou lakhi ani kepi pülü cheni. Aloe! Tüghaküsaqo kutólo tipau pülü chenie—eno msàkhokhoi chenie.

²⁰ O nikhanigha timio, no ye akümlà sümo keu küpülü ye avehu küha ipikeu thopitsa avehupu shi ani keshea?

²¹ Ningu papù Abraham ye kughou pa no panu Isaac pe akümlá-khache shou akümlagho shi ghi bekeu lo kiu shive keno tipau ghenguno amikuchou kepi kihike kumo keshea?

²² Pa küpülü eno pa kümlà küma ye kümtsa mülà küqha akeu nono ithulu ani, eno pa no kiu shi keno tipau no pa küpülü kupukülai tsüke.

²³ Eno Kuchoyesü lo ishi yèpüa keu shikupu ke, “Abraham no Alhou pülüluve, eno tipau no pa ye amikuchomi kepi kihitsüe,” eno pa ye Alhou’w ashou ipi ku ke.

²⁴ Timi lakhi ye pa no kiu mülà keno tipau vechewo amikucho kepi kihi cheni thono aküpülü vechewo likhi no kumo kepi nongu no ithulu ani.

²⁵ Tipau tho lono, kütüqhaliu Rahab ghí li no kiu shipüa keno tipau ghenguno amikuchomi kepi kihilu ke kumo keshea? Tiye li no pukujumiqo akùngó-a tsü no alaghi kütau lono panongu kiche puwuve keu vechewo no ke.

²⁶ Aghungu küha keu phimpi ye akithí kehu toi, akümlà küha keu küpülü ye akithí ke.