James 1 - Sümi Tiqhelimi Bible

¹ James, Alhou eno Ampeu Jisü Khristo qeu lakhi, Shiyeqo dolo apanagha pe akemi ashiaye chighí kini lau: Petha tsü ani.

Pekuju eno Ghukujuqo

² I thiküzümi eno I chelimiqo, kugho-kughomu nongu no pekuju jeli sholu kelo tiye akiqheu lokiqi kepi kümsülo,

³ kughengu nongu küpülü peju keu no tsükhoi keu iqiphe chekeu nongu no ithi anike.

⁴ Tsükhoi keu pelo tipau kümlà kishekhave pelo tishianguno nongu pelo kiumu tomo keu shimo no alaye eno kupukülailu peniye ke.

⁵ Tsalá nono alokütsü mikhe aghí aye, no ye Alhou khuu no kümtsü lau akipimí phumo no tsünishiqhiyi tsü cheni keno pa vilo khu moayesa, eno ti O tsü nani.

⁶ Ikemu kughou nono khuni keno, no ye lipimo no pülü moayesa, kughengu timi khuu no lipi cheni keno pa ye amlhü no fu püzü tukucho keu züghi fukucho lakhi toi ke.

⁷ Titoi keu timi ye Ampeu lau no kiumu ithulu nikeu laju kepu kumoe.

⁸ Hitoi keu timi ye amlo kini kupumi ke eno panongu no mülà keu kümtsü lo a-a shimo ke.

⁹ Küpülümiqo ye kuchunu keu tüqhüdo lo panongu ghenguno qhemghai keu-a akeu kümsülu no qheza moayesae.

¹⁰ Ikemu kiními ye panongu pelo kuchunu pe keu lo qheza moayesa—kughengu panongu ye aghasa lo xamunu lakhi toi hauve nani.

¹¹ Kughengu khetsünhe ye ghaqhi keu külǘ gholo no ipeghi cheni eno atsüniqo pelo ighüyive pe cheni; atsüni kùpú ikiqive cheni eno tipau jukivi kütsave cheni. Tipau tho lono, kinímiqo ye panongu no mülà chekeu kümlà lono ighüive nani.

¹² Khunoqo no peju akelo tsükhoi ngoni keno akümghapue, kughengu peju keu lo puthugholu keu vechewo timi tipau ye Ampeu kimiye chekemiqo lau aküxü kütsükuqho ithulu nikeu piqhipüa keu ithulu nani.

¹³ Kughou ghujuni keno, khunomu, “Alhou no I ghuju ani,” ipi kepu kumoe. Kughengu Alhou ye küsakügha pelo pa ghuju pemlae, momu pa ye khumu ghuju chemoe,

¹⁴ ikemu kughou alikhi ampi no küsakügha shinishikütü keu no pa müsü sasü wuve no pa züluveni keno tipau no panongu ghuju cheni.

¹⁵ Shinishiqhiyi keu mishiluve kethiu, tipau no axiné punuqhi cheni; eno kughou axiné no chhikhoi thuwuveni keno tipau no akithí punuqhi cheni.

¹⁶ I no kimiye chekemi athiküzümi eno achelimiqo, nongu pishiqhive pe kevilo.

¹⁷ Akivi eno kupukülai keu ghò kümtsü kunguu no, Apù kungugha küvü, khuu yekükhü kikili toi kilive chemo keno pa lau no iqighi cheni.

¹⁸ Pa no kuchou tsa vechewo ningu punukithelu peniye kishelu ke, tishianguno ningu pelo pa no lhosü keu jeli kümtsüw amsüu xathiqo shilu peniye ke.

Ini Keu eno Shikeu

¹⁹ I no kimiye chekemi I thiküzümi eno I chelimiqo, hipau ithilo: Kümtsü no pai chilu nikeu, asheshi no atsa pìní keu eno asheshi no amloide nikeu shilo,

²⁰ kughengu timi mlo kighide ye Alhou no achipiumikucho lunishi chekeu ipeghilu chemo ke.

²¹ Tighenguno, aphikümqhüpu süqesüli eno küsakügha kümlà ighono qhakuchho shi akeu kümtsü qhivelo eno Alhou tsa O lolo shosüpüa keu aqhokigheu shi ikhilulo, tino O xalu nani ke.

²² Alhou tsa ini keu likhi ini no O likhi O pishiqhi kevilo. Atsa no kiu piani keno tipau shilo.

²³ Khukhumu atsa likhi ini püzü tipau shichemo kemi ye timi lakhi no ahiju lo pa gi ithulu akeu toi ke,

²⁴ pa likhi pa juve kethiu, wuve no paikhavi pa ju ye kiutoi keno kümsümave cheni.

²⁵ Ikemu khuno no kupukülai keu yeza khikhi kuqhokiphe tsü cheni keno tipau lo amlotsüqhiyi ju eno tipau lo tamo no kümsükutoju—panongu no kiu chilu keno kümsümamo no tipau shini keno—panongu ye panongu no kiu mülà keno tipau lo mügha nani.

²⁶ Khuno no pa likhi pa ye achineye lo amlotsüqhiyi kemi ipi kümsü cheni püzü pa mili ghasülu chemo keno pa likhi pa pishiqhi anie, eno pa chineye ye ameküha ke.

²⁷ Ningu Papù Alhou no akimthe eno akipimí küha keu chineye ipi ikhilu chekeu ye hike: mighimi eno chimemiqo no aghime kitikhi shi akelo tucho-heju nikeu eno ayeghilomi pelo o shikuchubeve keu shipemo no putosülu keu ke.