IBRIMI 9 - Sümi Tiqhelimi Bible

Ayeghilow Puloshoqhi-chebo lo Mülá Keu

¹ Ike puloshoqhi atüghiu ye akümlá ngò ayeghilow akimthe-a ghengu ghí yezashi acheke.

² Puloshoqhi-chebo lakhi shiqhepuku ke. Tipau chebo atüghiu lo akulu ghopeqhi keu ngò akibepu eno tipau gholo kishekimtheve keu sho ngò ishi ae; hipau ye Akimthe-a ipi ku cheke.

³ Nhaqhiphi akiniù thiu achebo lakhi Akimthe nguno Akimtheu-a ipi ku che,

⁴ tilehi müsüghütaw ameshoyi kümlá-khache eno ameshoyi no küzüpüa keu puloshoqhi bohu ake. Puloshoqhi bohu hipau alou manna sǘ kepu ameshoyi bohu, Aaron’w aküsǘ nipa isheipeghive keu, eno puloshoqhiw atu liphaqo acheke.

⁵ Puloshoqhi bohu shou Alhou juküvü cherubim no aghakishi yekhüpe akeu khonha pesü anike. Ikemu ningu ye itehi thime hipaqo chixechilei küptsa müla nani.

⁶ Kughou thime kümtsü hitoi kithiveni keno, achinemiqo no alhokuthu panongu kümlàpu shini ke ghenguno khalau chebo lo ilo cheni.

⁷ Ikemu achebo alou ye achinetomiqo shou atou likhi no ilo cheni, eno ti ghí ampe lo ghuthu lakhi likhi ilo cheni, eno pa likhi pa ghenguno ngò timiqo no panongu kümtha ghenguno axiné shive keqo ghenguno Alhou mülá nikeu jì pemo kelo ye khilemu ilo chemoe.

⁸ Hipau vechewo Aghungu Kimthe ye Akimthe Nguno Akimtheu-a lo ilo nikeu laghi ye puloshoqhi-chebo atüghiu peitha ake kutólo pephe-piye mphi kepi pìye anike.

⁹ Hiye itehi do ghuloki ghenguno kimghi pìye akeu lakhi ke, tiye aghò eno aghakishiqo Alhou mülá akeu vechewo Alhou mülá chekemi lolo kighithi mütsümishei müla kepi kichetsü anike.

¹⁰ Tipaqo ye chuqu-kusho eno chine-chini shikimthe keu jeliqo vehu likhi ke—hiye azah kithé do tomo ke kutólo ashou yezashi pepimhe akeu ke.

Khristo Jì

¹¹ Ikemu kughou Khristo no thime kiviqo itehi hile akeqow achinetomiqo shou atou shisü ighi keno, pa ye timi u no mülàmo keu nguno akijeu eno ighono kupukülai keu puloshoqhi-chebo lo ilo ke, hi piakeu ye, tiye hipau yeghi gholo lhophepüa keu kumo ke.

¹² Pa ye anetsü ngò amishitiqo jì vechewo ilo ke kumoe; ikemu pa ye ghuthukhavi kümtsü ghenguno pa likhi pa jì vechewo Akimthe Nguno Akimtheu-a lo ilo ke, tishi keu lono lhokta xakulu ithulu ke.

¹³ Anetsü ngò amishitsüqo jì eno amishi-alí pitive keu ayevǜ ye khunoqo no chine-chini vechewo mithemove keno panoqo pelo ashou mitheluve penike ghenguno panongu shou küzüte puku cheni.

¹⁴ Tishiaye Khristo jì khikhi lhokta Ghungu vechewo tukutiye kühamithe no pa likhi pa pesü Alhou mülá keu ye khikuto lo ningu pelo xü akeu Lhou qe penike ghenguno ningu pelo akithí lo sawuve chekeu lau no ningu lolo kighithiqo shikimthe tsülu nani kea!

¹⁵ Hi ghenguno Khristo ye puloshoqhi akitheuw alakipiu ke, tishianguno khunoqo kulùvea keno panongu pelo piqhipüa keu lhokta mheghi ighílu peniye ke—kughengu panongu pelo puloshoqhi atüghiu qholo axiné shive keqo lono kuqhophe nike ghenguno pa ye xakipheu lakhi shi thive ke.

¹⁶ Akupulo kiyé hipau sheamzü lo ye khuu no tishi keno pa kithí kimchitsü moayesa ke,

¹⁷ kughengu akupulo kiyé lakhi ye timi lakhi no thive keu vechewo likhi no peithakulupu shi cheni; timi khuu no akupulo kiyé shi keno pa no xü ake thaqhülo ye akupulo kiyé tipau ye khilemu peithalu chemoe.

¹⁸ Hi ghenguno puloshoqhi atüghiu ghí ajì sümo kelo ye peithalu chemo ke.

¹⁹ Kughou Moses no azakütsü yeza kümtsü timiqo vilo shuphevetsü keno, pa no amishitsü eno aneqo jì gholo azü, huchuhuyi keu amhiyeho eno ailo lokaqo pesü liküküzü kaku ngò timiqo kümtsü shou küzüte ke.

²⁰ Pa no pi, “Hiye puloshoqhi jì khikhi Alhou no nongu pelo pape peniye tsü keu zakütsü ke.”

²¹ Hipau ghola lono, pa no ajì pesü puloshoqhi-chebo ngò tipau chine-chiniqo kinikujo lo peitha chekeu thime kümtsü shou küzüte puku ke.

²² Kuchou lo, ayeza kiqi lo ye ajì pesü thime kümtsü shikimthe moayesa ke, eno ajì kichijimo kelo ye akipimí qhikütsü küha ke.

²³ Tighenguno kungugha thime kishishiqo ye aghakishi hipaqo vechewo shikimthe moayesa ke, ikemu kungugha thimeqo ye pano ghenguno aghakishi hipaqo nguno akiviu avehupu ke.

²⁴ Kughengu Khristo ye timi u no kuchou kishishi mülà keu akimthe-a lo ilomo ke; pa ye ningu ghenguno Alhou gizülo ipeghi niye kungugha ampiu lo ilo ke.

²⁵ Momu pa ye achinetomiqo shou atou no Akimthe Nguno Akimtheu-a lo ampe atsütsǜ ajì khikhi pa jì kumo keno pesü ilo cheke toi pa likhi pa pesü anguno-anguno Alhou mülá nike ghenguno kungugha lo ilomoe.

²⁶ Tishimo aye Khristo ye ayeghiqha lhopheve keu thiu ghuthu kutomo ime moayesave niche ke. Ikemu pa ye ghuthukhavi lono alhokupuju ghenguno pa likhi pa no aghakishi shive keu vechewo axiné peve nike ghenguno tiqheli kishekha lo ipeghi ke.

²⁷ Timiqo ye ghuthu lakhi thive nikeu kughuchope qhive keu toi, eno tithiu ye küghakütha sholu niye akeu toi,

²⁸ Khristo ye timi kutomo xiné peve tsüní ke ghenguno ghuthu lakhi aghakishi shike; eno pa ye ghuthu akiniù ipeghi nani, axiné puluve tsü nike ghenguno kumo, ikemu khunoqo no pa ngokhe ani keno panongu lau xakulu süghitsü nike ghenguno ighi nani.