IBRIMI 8 - Sümi Tiqhelimi Bible

Puloshoqhi Akitheuw Achinetomiqo Shou Atou

¹ Ningu no kiu piani keno akimiji akhotou ye hipau ke: Ningu ye achinetomiqo shou atou lakhi ani, pa ye kungugha lo Anguagha küká lakhü lo au ajeu küdau iqa ani,

² eno pa ye timi no mülà keu akimthe-a kumo püzü Ampeu no puloshoqhi-chebo kuchou mülà tsü keu akimthe-a lo achinetou shou atou kümlà shi acheni.

³ Achinemiqo shou atou kümtsü aghò ngò aghakishiqo pesü Alhou mülá peniye süküsü shi cheni ke, eno tighenguno achinetomiqo shou atou hipau ghí kiuala Alhou mülá moayesa kepu shive ke.

⁴ Tsalá pa no ayeghi lo aghí ke aye, pa ye achinemi lakhi shimoni cheke, kughengu ayeza no kiche tsüpüa keu toi aghò pesü Alhou mülá chekemi achinemiqo kutomo ake.

⁵ Panongu ye akimthe-a lo hukuthu kümlà shi cheni ke eno tiye kungugha lo kiu ani keno tipau kíshi shikeu eno tipau yekükhü ke. Hi ghenguno Moses ye kughou pa no puloshoqhi-chebo shiqhepuku niye shi akeno pa no ishi pikichi ke: “Nongu ye thowkha kümtsü naghuto lo puloshoqhi-chebo ghola nongu pìyeve ketoi shini ke jukuto lo.”

⁶ Ikemu kuchou lo ye pichebekümlà Jisü no ithulu keu ye panongu lau pichetsü keu nguno akiqheu ke kughengu Jisü no puloshoqhi khipauw alakipiu shi ani keno tiye puloshoqhi aqau nguno akiqheu ke, kughengu puloshoqhi akitheu ye pikiqhi akiviuqo shou shiqhepuku pe püani ke.

⁷ Kughengu tsalá puloshoqhi atüghiu lo achipi shimo keu kiumu küha ke aye, puloshoqhi akiniù avehupu shimoni cheke.

⁸ Ikemu Alhou no timiqo gholo akipimí phulu no pi: “I no Israel timiqo ngo Judahmiqo gholo puloshoqhi akithé lakhi shini keu tsalaqo cheni, ipi Ampeu no shuphe ke.

⁹ Tiye kughou I no panongu pù-asüqo sasü panonguw au lono sünhepe no Egypt lono panongu sasü ipeghi ke toi keu puloshoqhi kumoe, panongu no iw puloshoqhi lo amikucho shimo ke ghenguno I no panongu lau no tsüghüsü wuve ke, ipi Ampeu no shuphe ke.

¹⁰ Tipau do thiu I no Israel timiqo lau puloshoqhi hipau shini, ipi Ampeu no shuphe ke. I no panongu kükümsü lo I yezaqo sǘtsü nani eno panongu mlo lo tipaqo yèpuku tsü nani. I no panongu Lhou shi nani, eno panongu ye iw timi shi nani.

¹¹ Panongu ye panongu kisüghümi shikamove nani momu panongu lakhi no lakhi vilo, ‘Ampeu ithilo,’ ipi pimove nani, kughengu panongu kümtsü no ni ithive nani, tiye panongu dolo akuchunumi lono akuchuqumi kutólo ni ithive nani.

¹² Kughengu I no panonguw küsaküghaqo qhivetsü nani eno panongu xinéqo khilemu kümsüchilemo nani.”

¹³ Puloshoqhi hipau “akitheu,” ipi kulùve keu vechewo pa no puloshoqhi aqau ye qhivae; eno kiu qhivea püzü peithamovea keno tiye ado kushuwa kumo lo hauve nani.