IBRIMI 7 - Sümi Tiqhelimi Bible

Melchizedek Achineu

¹ Melchizedek hipau ye Salem lo akükau eno shishe Akiqheu Lhou’w achineu ke. Pa no kükamiqo theqhive no ide woche kelo Abraham sholu no pa kümgha tsüke,

² eno Abraham no thime kümtsüw chighí saje pesü pa tsüke. Atüghishi, Melchizedek je kiqi ye, “achipiumikucho kükau”; tisheno itaghi, “Salem kükau” kiqi ye “aloino keu kükau.”

³ Apù momu azá küha, alagha küha no, hukuthu tsalaqo momu aküxü kishekha küha no, Alhou Nu kimihi shi ghi, pa ye alhokupuju ghenguno achineu lakhi shike.

⁴ Melchizedek ye kiutoi kijè keno kümsüjulo: Asǘ Abraham kutólo ghí pa no lepu ighi keu lo chighí saje pe pa tsüke.

⁵ Itehi ye ayeza kiqi lono Levi polokughukomi khunoqo no achinemi shini keno panongu ghí Abraham tikughukomi shi aghí namu panongu pelo panongu küsàmi Israelmi lau no chighí saje pekütsülupe cheni.

⁶ Tishimu, Melkhizedek ye Levi lagha lono ighimo ke, ike tishiaghimu pa ye Abraham lau no chighí saje pekütsü ke eno Abraham khuu tushokiqhiqo akeno pa kümgha tsüke.

⁷ Tishiaye kükümgha tsü akeu ye kükümgha ithulu akeu nguno akitilau kepi ithithaivae.

⁸ Lakhi sheamzü lo ye, chighí saje ye thiveni kemi timiqo no pekütsü cheni; ikemu kütau sheamzü lo ye, pa ye xüani ipi shukiphe shi akeu no pekütsü cheni.

⁹ Ningu ye Levimi khunoqo no chighí saje pekütsü cheni keno panongu ye Abraham vechewo chighí saje tsüva kepi ghi pilu nani,

¹⁰ kughengu kughou Melchizedek no Abraham sholu keno, Levi ye punú mphi kemu papù-asü phi lo ake.

Jisü ye Melchizedek Toi

¹¹ Levimi chine kümlapù vechewo kupukülailuve kepu shi aghí aye—eno kuchou lo ye timiqo lau ayeza tsü keu no achine kümlapù tipau huthuphe tsüke—kushiye itaghi Aaron no shikeu ghola kumo no Melchizedek no shikeu ghola lono achineu kütami lakhi ighi moayesave kea?

¹² Kughengu kughou achine kümlapù shi chekeu kiliveni keno, ayeza ghí kilive moayesa nani.

¹³ Khuu ghili hipaqo piani keno pa ye kütami shiayemi ke, eno tipau shiaye lono khiumu akümlá-khache lo hukuthu kümlà shi mphie.

¹⁴ Kughengu ningu Mpeu ye Judah polokughuko lono ighi kepi mütsüqhei ani, eno tipau shiaye vehu lo Moses ye achinemiqo tsa lo kiumu pimoe.

¹⁵ Eno ningu no pive keu lo tsalá Melchizedek toi keu achineu kütami ipeghi aye ighono mütsümisheive nani,

¹⁶ tiye khuu pa pù-asüqo yezashi kiqi lono kumo no kütsave müla keu küxü küká vechewo achineu shilu keu hu ke.

¹⁷ Kughengu ishi shuphevae: “No ye pülhapuju ghenguno Melchizedek no shikeu ghola lono achineu lakhi ke.”

¹⁸ Wove keu yezashi ye miqemilei eno avehu küha ke ghenguno qhive ke

¹⁹ (kughengu ayeza ye kiumu kupukülai shitsümo ke), eno lajupu akiviu lakhi kilethi tsüke, tipau vechewo ningu ye Alhou lau kupunú wu chenie.

²⁰ Eno tiye ashoqhi küha keu kumoe! Kütamiqo ghí ashoqhi tikithipu sümo namu achinemi shive ke,

²¹ ikemu kughou Alhou no pa vilo ishi pi keno pa ye ashoqhi lakhi àghi achineu shive ke: “Ampeu no tushokiqhi shivae eno pa kükümsü kilimo nani: ‘No ye pülhapuju ghenguno achineu ke.’ ”

²² Ashoqhi hipau ghenguno Jisü ye puloshoqhi akiviuw pimhekütsü sükushou shivea ke.

²³ Hitoi keu achinemiqo kutomo acheke, ikemu akithí no panongu pelo hiyam hipau lo pepushulu pemove ke;

²⁴ ikemu Jisü ye alhokupuju ghenguno xü acheni ke ghenguno pa ye alhokuthu acheni keu achine kümlakishiu lakhi ke.

²⁵ Tighenguno pa ye khunoqo no Alhou vechewo pa lau ighini keno panoqo kümtsü xaluve cheni ke, kughengu pa ye alhokuthu panongu ghenguno alakipi shitsü nike ghenguno xü acheni ke.

²⁶ Hitoi keu achinetomiqo shou atou ye ningu vehupu shilu cheni—pa ye Akimtheu, tukutiye küha, kitiqemo keu, axinemiqo lau no kütashi qhive keu, eno atsütsǘ nguno kunguu sheqhe pukuve keu ke.

²⁷ Achinetomiqo shou atou kütamiqo toi pa ye tsalà kipetsü atüghishi pa xiné ghenguno eno tithiu no timiqo xinéqo ghenguno aghakishi pesü Alhou mülá kepu vehu kühae. Pa ye kughou pa likhi pa ikhiphe pe tsüve keno tile no ghuthukhavi lono kümtsü xinéqo ghenguno aghakishi shive tsüke.

²⁸ Kughengu ayeza ye miqemilei kemi timiqo kümtsü pelo achinetomiqo shou atou shipe nike süküsü shi cheni; ikemu ashoqhi khikhi ayeza thiu no ighi keno, tino Anu khuu alhokupuju ghenguno kupukülai shipe qhivea keno pa süküsü shike.