IBRIMI 6 - Sümi Tiqhelimi Bible

^1-2 Tighenguno ningu ye Khristo ghiliw hukuthu kükütsüqo qhive no tekhoive keu kükütsü küdau wuni nolo eno akümlà khikhi akithí lo sawuve cheni keno tipau lono amlo pebideve no Alhou pülü keu, baptiz shikeu shikakütsü, au betsü keu, kithimi xüleputhu keu, eno lhokta kutólo küghathabeni keqo hu itaghi aboqha qhakithemoni nolo.

³ Eno Alhou pulou shi aghí aye ningu tekhoive keu küdau wu kepu shini.

⁴ Timi khunoqo no ghuthu lakhi ye kuchou vethaluvea, khunoqo no kungugha ghò micheluvea, khunoqo no Aghungu Kimthe ghò küsajevea,

⁵ khunoqo no Alhou tsa ye akivi kepi micheluvea eno ighi niye akeu tiqheli kükaqo ithive

⁶ eno khunoqo no ikiqivea keno, tipaqo saideghi püzü amlo pebideve pe nikeu ye kushokütsüpu ke. Panongu haküsapu shi panongu ye itaghi huthu kithethu shi Alhou Nu yedapithi ani eno mìshí zülo no pa shikukujo anie.

⁷ Tsütsüghu no ayeghi shou ghuqhi puku püzü tipau chiche kemi ghenguno tüxatini lhoipeghi keu ye Alhou’w kükümgha ithulu anike.

⁸ Ikemu ayeghi khilehi asahu ngò asahubo lhoipeghi cheni keno tiye ameküha eno ghushove nikeu ke. Tiye ashekha lo pitive nani.

⁹ Kimiye chekemi shompamiqo, ningu no ishi pi aghí namu, nongu shélo ye thime akiviu shi aghí nani kepi pülülu ani—tiye xakulu vehuqo ke.

¹⁰ Alhou ye achipiu kumo shichemo ke; pa ye nongu kümlàqo eno nongu no paw timiqo kuphu keu eno tamo no kuphu akeu vechewo kikimiye pa pìyeve keu khilemu kümsümamo nani.

¹¹ Ningu ye nongu lakhi-khi pelo ashekha kutólo hitoi azükini pìye penishi ani, tishianguno nongu no kiu laju ani keno tipau kuchopu ithilu peniye ke.

¹² Ningu ye nongu pelo akipichi shive penishi amoe, ikemu timi khunoqo no aküpülü ngò kutuukulu vechewo piqhipüa keu mheghi ighíluni keno tipaqo toi shipe nishi ani.

Alhou’w Pikiqhi lo Lajupu

¹³ Kughou Alhou no Abraham lau paw pikiqhi shi keno, pa ye pa nguno akijeu lau tushoqhi kepu kühave ke ghenguno pa likhi pa lau ishi pi no ashoqhi shike,

¹⁴ “I no kuchou no O kümgha tsü nani eno atikughuko kutomo O tsü nani.”

¹⁵ Ikehu kutuukulu shi khea kethiu, Abraham ye pa lau kiu piqhipüa keno ithulu ke.

¹⁶ Timiqo ye panongu likhi panongu nguno akijeu khami shou tushoqhi cheni, eno ashoqhi kiu pivea keno tipau ithitoilu keu no kütsala kilé keu kümtsü ashekha shive tsü cheni.

¹⁷ Kughengu Alhou ye paw kilimo keu lhoaye kimiji pesü tushoqhi püakeu mheghi ighilu akemi lau mütsümishei nike ghenguno paw tushokiqhi vechewo shikumto ke.

¹⁸ Ikehu Alhou no pikiqhi eno tushokiqhi shike, eno thime hiküma ye kilivekümlapu eno hipau lo Alhou ye akimki shivemla nani ke. Ikehu ningu khunoqo no lajupu ningu zülo qhipüa keu mutotoi tsüqüluve nike ghenguno wuve keno tipaqo pelo shishe shikumtoluve peniye ke.

¹⁹ Ningu ye angulho ghenguno lajupu hipau no akütshüpu-yi lakhi toi mutotoi eno sükusho ani. Tiye akimthe-a alou nhaqhiphi thiu ilo cheni,

²⁰ tiye Jisü no ningu züu no ningu züqhu shi ilovea ke. Pa ye pülhapuju ghenguno Melchizedek no shikeu ghola lono achinetomiqo shou atou shivea.