IBRIMI 5 - Sümi Tiqhelimi Bible

¹ Achinetomiqo shou atou kümtsü timiqo dolo no kishe cheni eno timiqo züqhu shi aghò jeliqo pe Alhou mülá keqo ghola vehu eno axinéqo ghenguno aghakishi shipe nike süküsü shi cheni.

² Kughengu achinetomiqo shou atou ghí pa ampi no miqemilei kemi kehu, pa ye khunoqo no kümthami eno kawuve ani keno panoqo mütshaminhei tucholu cheni.

³ Hi ghenguno pa ye pa likhi pa xinéqo ghenguno eno timiqo xiné ghenguno ghí aghakishi tsü moayesave cheni ke.

⁴ Eno timi khunomu agigihu hipau pa likhi pa kutoshi luve chemo, ikemu pa ye Aaron toi kughou Alhou no kulùve keno tile no ithulu cheni.

⁵ Tipau tho lono, Khristo ye pa no achinetomiqo shou atou shilu keu jekipi hu pa kutoshi no luvemoe. Ikemu Alhou no pa vilo pi, “No ye I nu ke; ishí no I no O pù shiluvae.”

⁶ Eno a-a kütau lo pa no ishi pipüani, “No ye Melchizedek no shikeu ghola lono alhokupuju ghenguno achineu lakhi ke.”

⁷ Jisü no ayeghi lo xü ake ghuloki lo, pa ye shishe qa eno anhezü-piji ghi khuu no akithí lono pa xalu nani keno pa lau akighini gholo no qhüiniju puku ke, eno pa no Alhou sümsa ghi aqhokighe shikeu ghenguno pa kighini chilutsü ke.

⁸ Pa ye Anu shi aghí namu pa ye pa no ime keu vechewo aghokulu shikaluve ke,

⁹ eno ghuthu lakhi kupukülai shive tsü kethiu, pa ye pa gholu chekemi kümtsü ghenguno alhokupuju xakulupu ipekighiu shive ke

¹⁰ eno Alhou no Melchizedek no shikeu ghola lono pa pesü achinetomiqo shou atou shi süküsü shitsü ke.

Veqhive Akeu Vehu lo Pikichi Keu

¹¹ Ningu ye hipau vehu lo kutomo pi kepu ani, ikemu nongu pelo mütsümishei ithilu pe nikeu ye kushokütsü ke, kughengu nongu no vethalu nikeu lo pükapütsa keu shimovea ke.

¹² Kuchou lo ye itehi nongu ye kükütsümiqo shi aghive kepu ke, nongu ye khuala no nongu vilo huthu kithethu shi Alhou tsa kuchou boqhaqo pe nongu lau shika pe nikeu avehupu shi ani. Nongu ye akümka chuqu kumo no akichhizü avehupu shi ani.

¹³ Khukhumu angá kughunu shi ghi akichhizü shou bepe xü chekemi ye achipiumikucho shiküka ghili ithi mphi ke.

¹⁴ Ikemu akümka chuqu ye asatheve kemi khunoqo no tamo no pükapütsa keu vechewo küsakügha lau no akivi kimchilu nikeu lo pano likhi panongu peitha qopheluvea keno panongu ghenguno ke.