IBRIMI 4 - Sümi Tiqhelimi Bible

Alhou Timiqo Ghenguno Akulhokiqi

¹ Tighenguno, pa kulhokiqhi-a lo ilo nikeu shoqhi ye itehimu aphike ghenguno, ningu khumu ikiqive aghí keu shipemo nike ghenguno tsaqütsaleini nolo.

² Kughengu panongu lau shikeu toi ningu kümtsü lau ghí atsakiviu shuphevea ke; ikemu panongu no akükütsü sütsa chilu keu ye panongu ghenguno kumu ameküha ke, kughengu panongu ye khunoqo no aghokulu shi keno panongu küpülü gholo küsajemo ke.

³ Itehi ye ningu khunoqo no pülüluvea keno ningu no tipau kulhokiqhi-a tipau lo ilo ke. Tiye Alhou no ishi pipüa keu ke, “Ike I no I mlo kighide lono ashoqhi shike, ‘Panongu ye khilemu I kulhokiqhi-a lo ilomo nani.’ ” Eno tishiaghimu pa kümlàqo ye ayeghi lho ake ghuloki lono shiqhivae.

⁴ Kughengu khile keno pa no atsala akütsüniu vehu lo hipaqo tsa pipüani: “Atsala akütsüniu lo Alhou ye pa kümlàqo kümtsü lono akulhoqhive ke.”

⁵ Eno itaghi atsajo mqo hipau shou pa no ishi pi, “Panongu ye khilemu I kulhokiqhi-a lo ilomo nani.”

⁶ Khami ghengu ye itehi kutólo akulhokiqhi-a tipau lo ilo niye ngo aphike, eno püzüu khunoqo atsakiviu chilu kemu panongu hekibide ghenguno akulhokiqhi-a lo ilomlave keno tipaqo ghenguno,

⁷ Alhou no itaghi atsala akimchi lakhi qhike, tiye “Ishí tsalà,” ipi kupüani ke. Hiye pa no ado kushuwa züu no David vechewo pikeu lono shivae, atsajo mqo lo atsatho pive keu toi: “Ishí tsalà lo nongu no pa sütsa inilu aye nongu mlo mükamüghai kevilo.”

⁸ Kughengu tsalá Joshua no akulhokiqhi panongu tsüve aghí aye, Alhou ye kutou atsala kütau ghili pimoni cheke.

⁹ Tishiaye Alhou’w timiqo ghenguno Sabbath-kulhokiqhi aphie;

¹⁰ kughengu khukhumu Alhou kulhokiqhi-a lo ilo kemi ye Alhou no pa kümlàqo lono akulhoqhi ketoi panongu kümlàqo lono akulhoqhi cheni.

¹¹ Khiu pelomu panongu ghokulu kumo kiche-kipiye pape keu vechewo pühave pemo niye ke, tishianguno ningu ye akulhokiqhi-a tipau lo ilo nike thowkha lo pükapütsa ani nolo.

¹² Kughengu Alhou tsa ye aküxü eno aküka ani. Puto-puto kihizüta nguno akütsüghau ke, tino angulho ngò aghungu kikime ngò aqǜ-anhüki kikime kutólo ghitha ilo cheni; tino timi mlo lo kümsüpù akeu ngò shinishiqhiyi akeu shou küghathabe cheni.

¹³ Lhosüpüa keu kümtsü lakhimu Alhou zülo no küsüpüamoe. Thime kümtsü küzüvemo no lhaphe pe khuu lau ninguw kihikülai tsü moayesa keno pa nhekithe lo ani.

Achinetomiqo Shou Atou Akijeu Jisü

¹⁴ Tighenguno, ningu ye achinetomiqo shou atou akijeu, Alhou Nu Jisü, khuu kungugha lo ikuvea keno, pa anike ghenguno ningu ye ningu no piche keu küpülü mutotoi tsüqüpe ani nolo.

¹⁵ Kughengu ninguw achinetomiqo shou atou ye ninguw miqemilei keqo vethalu tsü cheni, kughengu ningu ghuju ketoi alaghi kümtsü lono pa ghí ghuju ke, tishi namu pa ye axiné shimoe.

¹⁶ Tishiaye ningu ye pülükibe àghi Alhou’w küpükini küká lakhü kupunú ighini nolo, tishianguno ningu no avehupu shike ghuloki lo ningu kuphulu nikeu kikimiye ngò küpükini ithulu kepu shini ke.