IBRIMI 3 - Sümi Tiqhelimi Bible

Jisü ye Moses Nguno Akijeu

¹ Tighenguno akimthemi athiküzümi eno achelimi khunoqo no kungugha no ku akeu lo küsaje ani keno, eno Jisü khuu ningu no ninguw apostol eno achinetomiqo shou atou kepi ikhilu cheni keno pa shou nongu kükümsü bepe qhilo.

² Moses no Alhou kiqo kümtsü lo pükhübekulu shi ketoi, Jisü ye pa süküsü shikeu lau pükhübekulu shike.

³ Aki kishimi lakhi ye aki nguno alau agigihu kijè achekeu toi, Jisü ye Moses nguno alau agigihu kijè ithulu küzüpu shi phulu ke.

⁴ Kughengu aki kümtsü timi khami vechewo shiqhepuku acheni, ikemu Alhou ye thowkha kümtsü shiqhepuku chekeu ke.

⁵ “Moses ye Alhou ki kümtsü lo pükhübekulu qeu lakhi shike,” pa ye Alhou no ighi nikeu lo kiu pi niye shi akeno tipau thopi shi akeu ke.

⁶ Ikemu Khristo ye Anu lakhi kehu Alhou kibolomi shou ghí pükhübekulu shike. Ningu no ninguw pülükibe eno ningu no ajuküvü shi achekeu shou lajupu qhi akeu lo ithamo no tsüqüpe aye mütsüqhei no ningu ye pa kibolomi ke.

Pülümo Keu Vehu lo Pikichi Keu

⁷ Ike, Aghungu Kimthe no pikeu toi: “Ishí nongu no pa sütsa ini aye,

⁸ nongu mlo shikümka kevilo tiye küghünamokeu-a lo peju keu do ghuloki lo nongu no hekibide shi ketoi,

⁹ ampe lhobidi kutólo nongu pù-asüqo no I no kiu shive keno ithuluve keghi, panongu no I peju eno I chheju ke.

¹⁰ Tighenguno ni ye tipau tiqhelimiqo shou aghaide püzü ishi pi, ‘Panongu mlo ye alhokuthu kawuve acheni, eno panongu ye I laghiqo ithi mphi ke.’

¹¹ Ike I no I mlo kighide lono ashoqhi shike, ‘Panongu ye khilemu I kulhokiqhi-a lo ilomo nani.’ ”

¹² Athiküzümi eno achelimiqo, kutokupui lo, nongu gholo milakhi nomu axiné ngò pülü müla keu mlo xapu aghí no xü akeu Lhou lau no tsüghüsü wuve nosake.

¹³ Ikemu “Ishí tsalà,” ipi ake thaqhülo tsalá kipetsü lo lakhi no lakhi shikumtolo, tishianguno nongu lakhimu axiné pishikiqhi pelo nongu mlo shikümkave pemo niye ke.

¹⁴ Kuchou lo ye ningu no atüghi lo pülütoilu keu hu ashekha kutólo ithamo no tsüqüpe aye ningu ye Khristo gholo küsaje niye ighiluvea ke.

¹⁵ Hitoi pipüa keu toi: “Ishí tsalà lo nongu no pa sütsa ini aye nongu no hekibide lo shi ketoi nongu mlo shikümka kevilo.”

¹⁶ Chiluve no hebideve kemiqo ye khunoqo kea? Panongu kümtsü Moses no Egypt lono sasü ipeghi kemiqo ke kumo keshea?

¹⁷ Eno pa ye khunoqo lau ampe lhobidi amloide kea? Tiye khunoqo no axiné shive no küghünamokeu-a lo panongu phimpi pühave keno tipaqo ke kumo keshea?

¹⁸ Eno Alhou ye khunoqo vilo pa kulhokiqhi lo khilemu iloghimla nani ipi tushoqhive kea? Tiye hebideve kemiqo vilo pike kumo keshea?

¹⁹ Ike ningu no ithulu keu ye panongu pülükümla ghenguno panongu ye ilomlave ke.