IBRIMI 2 - Sümi Tiqhelimi Bible

Amlotsüqhiyi Penike Pikichi Keu

¹ Ningu fupe wuve pemo nike ghenguno ningu no kiu chiluvea keno tipau lo ningu ye ighono amlotsüqhiyi moayesae.

² Kughengu kungumiqo vechewo akükütsü sütsa pive keu ye akumto kuchou ke, eno tipau hexa eno hebide keu ye ithulu küzüpu aghime ithuluvae,

³ tsalá ningu no xakulu kijè hikithipu phimo aye ningu ye kíshi no pokajolu nani kea? Xakulu hipau khikhi Ampeu no atüghishi shuphe keno tiye timi khunoqo pa tsa chilu keno panongu no ningu lau ithitoi shitsü ke.

⁴ Alhou ghí xakulu hu ye amichipu, akichiqhipu, eno akümzapu kümlà jeliqo eno pa pulou kiqi lono kijé tsü keu Aghungu Kimthe ghòqo vechewo thopi shitsü ke.

Jisü no Timi Shive Keu

⁵ Alhou ye kungumiqo pelo, ningu no piakeu ghili, ti ighi niye akeu yeghiqha shou ayekipemi shipe niye anike kumoe.

⁶ Ikemu Kuchoyesü lo khami no ishi pipe püani: “Timi ye kiu keno no ye panongu kümsülu akepu ani kea, Timi nu lakhi keghi no ye kushiye pa tucho-mjo acheni kea?

⁷ Nono kungumiqo nguno kitila aqhou shi panoqo lhosü ke; nono ajuküvü ngò agigihu pesü panongu qhopipe ke

⁸ eno thowkha kümtsü pesü panongu pukhu qhou qhitsü ke.” Thime kümtsü pesü panongu qholo qhivetsü keu vechewo Alhou ye thime lakhimu panongu qhou qhitsümo keu shimoe. Tishiaghi namu itehi ningu ye panongu qhou qhitsü keu thowkha kümtsü ithulu keu shi amoe.

⁹ Ikemu ningu ye Jisü ithulu anie, pa ye ado kitila ghenguno kungumiqo nguno kitila aqhou shi lhosü ke, pa no aghime kithí shi thive keu ghenguno itehi pa ye ajuküvü ngò agigihu pe qhopipevae, tishi keu lono Alhou’w küpükini vechewo pa pelo kümtsü ghenguno akithí michelu peniye ke.

¹⁰ Alhou khuu ghenguno eno khuu vechewo thowkha kümtsü acheghi keno pa no anu eno angáqo kutomo ajuküvü lo süghi nike ghenguno Jisü ghime vechewo panonguw amsüu kupukülai keu xakulu süghitsü keu ye achipi ke.

¹¹ Ikemu Jisü khuu no timiqo akimthe shive tsü eno khunoqo akimthe shivea keno panongu ye akibo lakhi ke. Ikehu Jisü ye panongu vilo athiküzümi eno achelimiqo ipi kuni keu kujove chemoe.

¹² Pa no pi, “I no O je pe I thiküzümi eno I chelimiqo lau asheshu nani; I no aqo-aho zülo no O shekiqhe le phe nani.”

¹³ Eno itaghi, “I no pa lau pükhübe nani. Eno itaghi pa no pi, “Ni eno anuli Alhou no I tsü keqo hilehi ani.”

¹⁴ Anuliqo ye ashi eno ajì pù anike ghenguno pa ghí panonguw timi shi-aji gholo küsaje ke, tishi keu lono pa kithí vechewo timi khuu no akithí küká pesü ani keno pa küká kubove tsü niye ke—tiye tüghami hu ke—

¹⁵ eno akithí kümsà no khunoqo aqüaxe küxü lo tsügha pesü ani keno panongu kuqhopheve niye ke.

¹⁶ Kughengu mütsüqhei no pa ye kungumiqo kuphu chemoe, ikemu Abraham tikughukomiqo kuphu cheni.

¹⁷ Hi ghenguno Jisü ye panongu toi shi moayesave eno thowkha jeli kümtsü lono timi hutoi moayesave ke, tishianguno pa ye Alhou qe akeu lo kimiyeqhiyi keu eno pükhükuluu achinetomiqo shou atou shilu peniye ke. Tisheno pa vechewo timi xinéqo ghenguno aghakishi shipe niye ke.

¹⁸ Kughengu pa ampiu ghí kughou ghuju keno imeve kehu, pa ye khunoqo no ghukuju sholu ani keno kuphulu acheni.