IBRIMI 13 - Sümi Tiqhelimi Bible

Ashekuho Hakuthokütsü

¹ Athiküzümi eno achelimiqo toi lakhi no lakhi kimiyekilé achelo.

² Nongu ki lo inami sasǘ nikeu kughucho kevilo, kughengu tishi keu vechewo timi khami ye mtha püzü kungumiqo sasü keu shilu püani ke.

³ Akughumi gholo nongu ghí akughu shiküqha akeshi tamo no panongu kümsülulo, eno khunoqo pishi-puju acheni keno O likhi nono ime akeshi kümsülulo.

⁴ Kümtsü no külakupu gihu moayesae, eno külakupu lipa kitiqemo no qhi moayesae, kughengu Alhou no shupumi eno kipito kimthe kumo kümlà shi chekemi kümtsü shou küghathabe nani.

⁵ Pisa kimine lono O küxü putosü lo eno nono kiu ani keno tipau lo aghakiqi shilo, kughengu Alhou no ishi pivae, “Ni ye khilemu O qhivemo nani, ni ye khilemu O phevemo nani.”

⁶ Tighenguno ningu no pülükibe àghi ishi pi cheni, “Ampeu ye I kukuphuu ke; Ni ye msàmo nani. Thiveni küamiqo keno I lau kiu shilu nani kea?”

⁷ Nonguw sakiphemi khunoqo no Alhou tsa pesü nongu vilo piche keno panongu kümsülulo. Panongu küxü gholaw visavili kümsüju no panongu küpülü kimihi shilo.

⁸ Jisü Khristo ye ighina, ishí eno alhokuthu lo aphiphi ke.

⁹ Akümza shiküka jeliqo pelo nongu zü sawuve pe kevilo. Küpükini no shikumto keu no ningu mlo ghenguno aloke, tiye chine-chini chuqu chu keu vechewo kumoe, khunoqo ti chu cheni keno panongu ghenguno kiumu alá küha ke.

¹⁰ Ningu ye akümlá-khache lakhi ani eno tipau puloshoqhi-chebo lo aghínishi chekemiqo ye chulu nikeu chipiu küha ke.

¹¹ Achinetomiqo shou atou no lhoxüqo jì pesü axiné kümlagho lakhi toi Akimthe Nguno Akimtheu-a lo ilo cheni, ikemu lhoxü phimpiqo ye aghazü khalau no pitive cheni.

¹² Tighenguno Jisü ghí timiqo pelo pa jì vechewo mithelu penike ghenguno mishighüna khagho khalau no aghime shike.

¹³ Tishiaye, ningu ghí küghüna chekeu nguno khalau pa lau wuni eno pa no jukünatha keu puluve keu küsajeni nolo.

¹⁴ Kughengu ningu ye hilehi alhokuthu aní keu mishighüna küha ke, ikemu ningu ye mishighüna ighi niye akeu ghenguno huqhe anike.

¹⁵ Tighenguno, ningu kichí lono ipeghi keu tsa pesü pa je shuphe ghi Jisü vechewo tamo no shekiqhe ghakishi pesü ningu Alhou müláni nolo.

¹⁶ Eno akümlà kivi shini keu ngò kütami gholo küsaje nikeu kümsüma kevilo, kughengu Alhou ye hitoi keu kümlaghoqo ju pesü amloqi cheni ke.

¹⁷ Nonguw sakiphemiqo shou pülükibe alo eno panongu kükagha ghokulu shilo, kughengu panongu ye khunoqo no panongu kümlàw kihikülai tsü moayesa cheni keno tipaqo toi nongu shou jukuto acheni ke. Panongu kümlà ye amakho kimshi toimo no alokiqishi shilu penike ghenguno hipau shilo, kughengu tiye nongu ghenguno kiumu alá küha nani ke.

¹⁸ Ningu ghenguno inikhu tsülo. Ningu ye alolo kighithi eno thowkha jeli kümtsü lo agigihupu küxü xü nishi keu mütsümishei ani.

¹⁹ Ni ye akhotoshi nongu pelo akighini shipe nike hakite ani tishianguno I pelo kighithe nongu gholo ighilu peniye ke.

Ashekha Kighini eno Ashekhau Petha

²⁰ Itehi ye alokughuno tsü chekeu Lhou, ambeqo Kheu akijeu, khuu lhokta puloshoqhi jì vechewo akithí lono Jisü xüchile saighi keno,

²¹ pa pulou shipe nike ghenguno thime kivi kümtsü pesü nongu pipe peniu, eno pa pelo Jisü Khristo vechewo kiu no pa lokiqipu keno tipau ningu lolo mülàlu peniu; pa lau alhokupuju lono alhokupuju kutólo ajuküvü ache pelo! Amen.

²² Athiküzümi eno achelimiqo, ni ye nongu pelo I no shikumtokütsü tsa piakeu lo kutuu penike kite ani, kughengu kuchou lo ni ye nongu lau ighono ikhonhei keu lono yèpüani ke.

²³ Ningu thiküzüu Timothy ye khaqhiphevea kepi ni ye nongu pelo ithive penishi ani. Tsalá pa no kighithe ighive aye, ni ye nongu sasü kusho nike pa gholo no ighi nani.

²⁴ Nonguw sakiphemiqo kümtsü eno Ampeu’w timiqo kümtsü lau petha tsü ani. Italy lo akemiqo no panonguw petha nongu tsü ani.

²⁵ Alhou’w küpükini nongu kümtsü gholo apeniu.