IBRIMI 12 - Sümi Tiqhelimi Bible

¹ Tighenguno, ningu ye thopimi aqokitikhi hijejehi no ningu sümxa pe anike ghenguno, ningu lakha chekeu thimeqo eno mülalei kitimeve chekeu xinéqo kümtsü ikhipe peveni nolo. Eno ningu pelo pokuxu penike ghenguno amichi shipüa keu gholo tsükhoi shi no poni nolo,

² eno Jisü amsüu eno aküpülü kupukülai kütsüu shou ningu nhethi süküqümo no juni nolo. Alokiqi pa zülo qhipüatsü keu ghenguno pa ye kros kukujo phitsümo no kutuuluve eno Alhou küká lakhü lo au ajeu küdau iqave ke.

³ Khuu no axinemiqo ghenguno hitoi keu ghokichile kutuuluve keno kümsüjulo, tishianguno nongu ye lhovemo eno amlo mutomlave keu shimo nani ke.

Alhou no Pa Nuliqo Ghasü Cheni

⁴ Nongu no axiné sasü kumjo akeu lo, nongu ye itehi kutólo nongu jì pele ghi axiné mujochile keu kutólo shi mphie.

⁵ Eno nongu ye apù no panu lau pike toi nongu vilo ishi shikumto keu tsa pikeu kümsümavea keshea? Ishi pipüani, “I nu, Ampeu’w ghaküsü mülalei shive kevilo, eno pa no alomipi kelo aghüthi sükevilo,

⁶ kughengu Ampeu ye pa no kimiye kemi ghasü cheni ke, eno panu ipi ikhilu kemi kümtsü pa no shikümzü cheni ke.”

⁷ Ghasükulu michi shi ghi shiluküsa puqhelu lo; Alhou ye pa nuliqo toi no kihi anike. Kughengu kiutoi keu nuliqo no panongu papù no ghasü chemo kea?

⁸ Tsalá Alhou no pa nuliqo kümtsü ghasü chekeu toi nongu ghasü cheghimo aye, nongu ye khilemu kuchou nu ngò angáqo kumo püzü tüqhanu ake.

⁹ Tinguno alau, ningu kümtsü ghasü chekeu ayeghi lo apù acheni, eno ghaküsü ghenguno ningu no panongu gihu cheni. Tishiaye ningu ye hinguno alau khijehi ninguw aghungu lo Apù lau aghokulu shi xü moayesa kea!

¹⁰ Ayeghi lo apùnoqo ye ado kitila ghenguno panongu no akiviu ipi kümsü akeu kiqi lono ningu ghasü cheni ke; ikemu Alhou ye ningu kivipu ghenguno ghasü cheni ke, tishianguno ningu pelo pa kimthe lo küsajelu peniye ke.

¹¹ Ghaküsü shi akeu dolo ye khilemu aloviqhiyi chemo, ikemu sakütü cheni. Tishiaghimu kutou ye, tino achipiumikucho ghile hu cheni eno hipau no khunoqo qopheva keno panongu ghenguno alokiqi süghi cheni.

¹² Tighenguno, nonguw miqemilei keu aumlo eno qeinai keu khonheqo shikumtolo.

¹³ “Nongu pukhu ghenguno alaghi müzüchoi shilo,” tishianguno apukhu kinitave kemi pelo ithamlave keu shivepemo no viluve peniye ke.

Pikichi Keu eno Shikumto Keu

¹⁴ Timi kümtsü sasü külakishi shi no akimthe shi xü nikeu thowkha lo pükapütsa alo; kughengu akimthe shimo kelo ye khuu nomu Ampeu ithumla nani.

¹⁵ Khuu pelo nomu Alhou’w küpükini ithumlave keu shipemo nike eno khumtsai keu kuhu lhoipeghi no aküpüna shivepemo nike eno timi kümtsü shikuchubeve pemo nike jukuto alo.

¹⁶ Khuu pelo nomu kipito küxü lo mithemove keu shipemo nike, momu Esau, khuu anu akichiú shi anamu akhuna lakhi ghenguno pa mheghi chipiu jeve keno, pa toi Alhou sümsamo keu shipemo nike jukuto lo.

¹⁷ Nongu no ithi ake toi, hipathiu kughou pa no paw kükümgha hipau ighí niye shi kelo, pa milive ke. Pa no anhezü ipeghino kükümgha phuju kemu, pa ye pa no mülaqhive keu kilimlave ke.

Akümsa eno Alokiqi Naghuto

¹⁸ Nongu ye bulu chekeu, ami iqü akeu, zümoi keu, àküzǘ eno pasapagha akeu naghuto lakhi lo ighi anike kumoe;

¹⁹ afuko küigha keu momu asütsa lakhi no atsa pi kelo khunoqo no ti chilu keno panongu lau tinguno alau atsa pitsü kevilo ipi qhüiniju keu naghuto kumoe,

²⁰ kughengu panongu ye panongu lau kiu azah tsü keno tipau puqhemlave ke: “Tsalá lhoxü nomu naghuto bulu aye, tiye atu pesü veqhi pìthíve moayesa ke.”

²¹ Moses no ithulu keu ye ighono akichiqhipu ke ghenguno pa no ishi pi, “Ni ye akümsa lono khokhoshi anie.”

²² Ikemu nongu ye Zion naghuto, xü akeu Alhou’w mishighüna, kungugha Jerusalem lo ighivea ke. Nongu ye kungumi qhethonhe shou qhethonhe no alokiqipu shi kumqo pe akeu lo ighivae,

²³ nongu ye amsüu khunoqo je kungugha lo yèpe qhivea keno tipaqo kukuho lo ighi ani. Nongu ye kümtsü shou küghaküthau, amikuchomiqo pelo kupukülailu pe chekeu aghungu eno Alhou lau ighivae,

²⁴ nongu ye Jisü puloshoqhi akitheuw alakipiu eno Abel jì nguno akiviu shi atsa piche keu küzüteve keu jì lau ighivae.

²⁵ Nongu ye khuu no atsa pi cheni keno pa milimo nike jukuto lo. Kughou ayeghi lo khuu no panongu pikichi keno pa milive keu lo ghí pokajo mülave aye, ningu ye kíshi no khuu kungugha lono ningu pikichi cheni keno pa lau no tsüghüsü wuve no polu nani kea?

²⁶ Tipau ghuloki lo pa sütsa no ayeghi süküghütha ke, ikemu itehi ye pa no ishi piqhivae, “I no itaghi ghuthu lakhi ayeghi likhi kumo no kungughaqo ghí süküghütha nani.”

²⁷ “Itaghi ghuthu lakhi,” ipi akeu tsa kiqi ye kiu no süküghüthalu nani keno tipau ikhive nikeu ke—tiye lhosüpüa keu thimeqo—tishi keu vechewo kiu süküghütha müla nani keno tiye ache peniye ke.

²⁸ Tighenguno, ningu ye süküghütha müla nikeu kükaphu ithulu anike ghenguno, ningu shikimthiqhiyi ani nolo. Ikehu agigihu eno sükümsa lono ikhikulupushi Alhou müláni nolo,

²⁹ kughengu ningu “Lhou ye pitipühave chekeu ami lakhi ke.”