IBRIMI 11 - Sümi Tiqhelimi Bible

Akümlà Lono Aküpülü Pephe-piye Keu

¹ Tishiaye aküpülü ye ningu no laju akeu shou pülübe keu ngò ningu no ithumla keu shou pülüqhiyi keu ke.

² Hi ghenguno ningu pù-asüqo sheqhe ke.

³ Aküpülü vechewo lhokejeli ye Alhou’w azakütsü qholo no lhophe kepi vethalu cheni, eno kiu ithulu ani keno tiye kiumu küha keu lono lhophe püani ke.

⁴ Aküpülü vechewo Abel ye Cain nguno akiviu shi akümlagho pesü Alhou lau süghi ke. Pa ye Alhou no pa kümlaghoqo kivi ghili pi kelo no aküpülü vechewo amikuchomi kepi sheqhe ke. Eno Abel ye thive aghí namu ishi kutólo pa kümlà no aküpülü vechewo ningu pütsa cheni ke.

⁵ Aküpülü lono Enoch ye akithí michepemo niye hipau küxü lo aphi lono sawuve ke: “Pa phumlave, kughengu Alhou no pa sasü wuve ke.” Kughengu pa sawu mphi lono, pa ye Alhou mloqilu chekemi lakhi kepi sheqhe cheke.

⁶ Eno aküpülü küha kelo ye Alhou mlokiqipu shini keu kushokütsü ke, kughengu khukhumu pa lau ighi kemi ye pa ye xüani eno pa ye khunoqo no puloniqhiyi pa phu ighi cheni keno tipaqo asaxu tsü cheni kepi pülü moayesa ke.

⁷ Noah ye aküpülü vechewo ithumla aphi keu thime ghili pesü kughou pikichi keno akimthe sükümsa vechewo pa kibolomi xalu nike ghenguno ashuka mülà ke. Aküpülü vechewo pa no ayeghiqha kiléqhive ke eno iqemo keu küpülü vechewo achipiumikucho mheghi kiyighiu shilu ke.

⁸ Abraham ye kughou pa vilo kutou pa mheghi shi niye akeu a-a lakhi lo wulo pi ku keno pa ye khila wucheni keno mtha kemu aküpülü vechewo aghokulu shi wuke.

⁹ Pa ye aküpülü vechewo piqhipüa keu yeghi lo tüsümi lakhi toi inami ghakhu lakhi lo pa ki shike; pa ye aphiki lo ngo ke, titoi Isaac ngò Jacob ghí ngo ke, pama ye Abraham toi piqhipüa keu mheghi kiyighiu ke.

¹⁰ Kughengu pa ye aboqha akeu gholo no mishighüna küdau juchho puwu ake, eno Alhou ye mishighüna tipauw ahighomi eno shiqhepukumi ke.

¹¹ Eno aküpülü vechewo Sarah ghí angá mishílu nikeu mpe vecheve kethiu ghí angá mishí kulupu shilu pe ke, kughengu li ye khuu no pikiqhi shipüa keno pa ye pülübekulu kepi ithi cheke.

¹² Eno tighenguno timi hipau ye thive kemi lakhi paphi shi akemu atsütsǘ lo ayepuqo eno azüghi mükü lo kihikhakümla saye toi pa vechewo atikughukomiqo ipeghi ke.

¹³ Timi hipaqo kümtsü thiveni ke kutólo aküpülü vechewo xü ake. Panongu ye panongu lau piqhipüa keu thimeqo ithumla ke; panongu ye anhethi likhi no tipaqo ithulu no putou lono panongu sasülu ke, eno panongu ye ayeghi hipau lo inami eno tüsümiqo kepi ikhilu ghi hi shike.

¹⁴ Timi khunoqo no hitoi keu tsa pi cheni keno panongu ye pano likhi pano ghenguno aghakhu phu cheni kepi pìye anike.

¹⁵ Tsalá panongu no aghakhu qhive keu panongu no kümsü aghí aye, panongu ye idewove kulupu dokivi ake.

¹⁶ Tishini ke züqhulo, panongu ye aghakhu akiviu kümsü acheni ke—kungugha toi keu. Tighenguno Alhou ye panongu Lhou ipi kuni keu lo kujomo ke, kughengu pa ye panongu ghenguno mishighüna kutò pe qhive no ake.

¹⁷ Kughou Alhou no Abraham peju keno pa ye aküpülü vechewo aghakishi lakhi shi ghi Isaac pe Alhou mülá ke. Timi khuu pikiqhi tsüqüluve keno pa ye panu lakhi likhi akeu pe aghakishi shive niye kutò ake,

¹⁸ tiye Alhou no pa vilo, “Isaac vechewo O nuli-kughukoqo kihikülai tsü nani,” ipi pive kethiu no ke.

¹⁹ Alhou ye kithimi kutólo xüputhuluve nani kepi Abraham no kiqiluve, eno pìní aye Abraham ye akithí lono Isaac ithulu chilelu ke.

²⁰ Isaac ye aküpülü vechewo ighi nikeu vehu ghenguno Jacob ngò Esau kümgha tsüke.

²¹ Jacob ye pa no thive niye akelo aküpülü vechewo Joseph nuli kümtsü kümgha tsüke, eno pa no pa küsǘ shou mungupe ghi Alhou mülá ke.

²² Kughou Joseph no pa küxü shekha kupunúve keno pa ye aküpülü vechewo Israelmi no Egypt lono ipeghilu keu ghili pike eno pa saghiqo chhuqhove nikeu tsa lo kichetsü ke.

²³ Moses pù-aza ye aküpülü vechewo pa punúve kethiu aqhi küthü kutó pa peküsü ke, kughengu pa pù-aza ye pa ye inapügha ngá kumo kepi ithive ke, eno pama ye akükau zakütsü msàmo ke.

²⁴ Moses ye kughou kichimi shive keno pa ye aküpülü vechewo Pharaoh nonga nopu ke ipi nikeu milive ke.

²⁵ Pa ye ikhonhei axiné lokivipu lo aloqilu anike züqhulo Alhou’w timiqo gholo sapüsa nikeu kishelu ke.

²⁶ Khristo je ghenguno timi no pa peithapüsa keu lo Egypt yeghi lo akinikhuki kümtsü nguno amekushou kepi kihiluve, kughengu pa ye paw qesaxu huqhe ake.

²⁷ Pa ye aküpülü vechewo akükau loghu msàmo no Egypt qhive ke; pa ye tsükhoi shike kughengu pa ye khuu ithulu chemo keno pa ithulu ke.

²⁸ Pa ye aküpülü vechewo Hechekulu ghulhu eno ajì hu pesü pepimhe ke, tishi keu vechewo anu punú tüghiu kütsave chekeu pelo Israelmiqow anu punú tüghiu bupemo niye ke.

²⁹ Aküpülü vechewo timiqo ye qhai keu yeghi lo cheche keshi Akuhu Züghi katha ke; ikemu kughou Egyptmiqo no katha niye shi keno, panongu pütsüqhive ke.

³⁰ Aküpülü vechewo Israel ghüshimiqo no atsala tsüní Jericho liwo kuputuqo vehomxa alà cheve kethiu ikiqive ke.

³¹ Aküpülü vechewo kütüqhami Rahab ye khunoqo no hebide cheni keno panoqo gholo no pìthívemo ke, kughengu li no pukujumiqo sasǘ ke.

³² Eno ni ye hipaqo nguno alau kiu pìní kea? Ni ye Gideon, Barak, Samson, Jephthah, David, Samuel eno tungkupumiqo ghili pinike ado kühae,

³³ panongu ye aküpülü vechewo akükaphuqo lelu, amikucho yekipe pelu, eno kiu piqhipüa keno tipau ithulu ke; khuu no abongushuu baxaqo kimikeve tsü,

³⁴ ami mili qhapinheve tsü, eno akihizüta mütsü lono pokajoluve cheni kea; khuuw miqemilei keu pesü akumto shive tsü kea; eno khuu no aghüshi lo aküka kumto shive no inami ghüshimiqo theqhive kea.

³⁵ Totimiqo pelo pano kibolomi thive kemiqo itaghi aküxü lo xüputhuve keu ithulu pe ke. Kütamiqo ye ghimeqhi ake, eno panongu ye kuqhopheve nikeu lo milive ke tishianguno panongu ye tinguno akiviu xülekuthu hu ithulu kepu shipe niye ke.

³⁶ Khami ye junu keu eno akighipe küzaqhi keu, eno ayikichhe pe tshü keu eno akughu shikeu kutólo sholu ke.

³⁷ Panongu ye atu pe veqhi pìthíve; panongu ye küxütha pesü kini shive; panongu ye akihizüta pe ghiqhi pìthíve ke. Panongu ye ambe yiko ngò ane yiko xapusü itsü ke eno thokha-thogha shi phishi-puju eno peithapüsa ke—

³⁸ ayeghiqha ye panongu ghenguno amekühave ke. Panongu ye asayeli eno naghutoqo lo atuki eno ayeghi khukiqo lo ngo ghi itsü ke.

³⁹ Panongu kümtsü panongu küpülü ghenguno sheqhe ke, ikemu panongu lakhimu kiu piqhipüa keno tipau ithumla ke,

⁴⁰ kughengu Alhou ye ningu ghenguno kiuala akiviu kughupe qhipüani, tishianguno ningu gholo no aqoshi panongu ghí kupukülai shiluve peniye ke.